Зәбүр 84 - Изге Яҙма

¹ Йырсылар етәксеһенә: Ҡорах улдарының мәҙхиәһе.

² Йә Раббы, илеңә миһырбанлыҡ ҡылдың, Яҡуп нәҫеленә муллыҡ-именлек ҡайтарҙың.

³ Халҡыңдың ғәйебен ярлыҡаның, Барлыҡ гонаһтарынан пакланың. Села

⁴ Бөтә асыуыңды ситкә ҡуйҙың, Ярһыуҙарыңдан тыйылдың.

⁵ Эй ҡотҡарыусыбыҙ Алла, Беҙҙе элекке хәлебеҙгә ҡайтар! Беҙгә асыуыңды туҡтат.

⁶ Мәңге шулай асыу һаҡларһыңмы? Ярһыуың быуындан-быуынғаса һуҙылырмы?

⁷ Халҡың Һиндә ҡыуаныс тапһын тип, Беҙҙе ҡабат терелтмәҫһеңме ни?

⁸ Йә Раббы, тоғро мөхәббәтеңде күрһәт, Ҡотҡара күр беҙҙе!

⁹ Раббы Алланың әйткәненә ҡолаҡ һалам. Халҡына, тоғро ҡолдарына именлек вәғәҙә итә, Тик мәғәнәһеҙ юлдарға ҡайтмаһындар.

¹⁰ Ысынлап та, Үҙенән ҡурҡҡандарға Уның ҡотҡарыуы яҡын, Уның шөһрәте беҙҙең еребеҙҙә төйәкләнәсәк.

¹¹ Мөхәббәт менән тоғролоҡ осрашасаҡ, Хаҡлыҡ менән именлек үбешәсәк.

¹² Ерҙән тоғролоҡ үҫеп сығыр, Хаҡлыҡ күктәрҙән аҫҡа эйелер.

¹³ Раббы бәрәкәт күндерер, Еребеҙ мул уңыш бирер.

¹⁴ Хаҡлыҡ Раббының алдынан атлап барыр, Уның өсөн юл әҙерләр.