Зәбүр 80 - Изге Яҙма

¹ Йырсылар етәксеһенә: «Гиттиҫ» көйөнә. Асафтың мәҙхиәһе.

² Ҡөҙрәтебеҙ булған Аллаға ҡыуанышып йырлағыҙ, Шатланышып ҡысҡырығыҙ Яҡуп Аллаһына!

³ Көй башлағыҙ, дөңгөр ҡағығыҙ, Моңло арфа, лира ҡылдарын сиртегеҙ.

⁴ Яңы айҙа, ай тулғанда – Беҙҙең байрам көндәрендә Мөгөҙ борғо ҡысҡыртығыҙ!

⁵ Сөнки был – Исраилға ҡағиҙә; Яҡуп Аллаһының ҡануны был.

⁶ Йософ нәҫеле Мысырҙан ҡотолоп сыҡҡас, Уға быны күрһәтмә итеп бирҙе. Үҙем белмәгән телдә тауыш ишеттем:

⁷ «Яурынынан ауыр йөгөн алдым, Ҡулдары ауыр кәрзиндәрҙән ҡотолдо.

⁸ Бәләгә ҡалғас, Мине саҡырҙың – Мин һине ҡотҡарып алып ҡалдым; Йәшен болотонан яуап ҡайтарҙым, Мерива һыуҙарында һине һынаным. Села

⁹ Тыңла, халҡым, Мин киҫәтәм һине! Эй Исраил, һин Мине тыңлаһаң ине!

¹⁰ Арағыҙҙа ят илаһ булмаһын, Сит ерҙәрҙең илаһына табынма!

¹¹ Һине Мысырҙан алып сыҡҡан Аллаң Раббы Мин. Ҙур итеп ас ауыҙыңды – туйҙырырмын!»

¹² «Әммә халҡым әйткәнемде тыңламаны, Исраил Миңә буйһонманы.

¹³ Шуға уны тиҫкәре булмыштары ихтыярына бирҙем, Үҙ белдегенә йәшәһен, тинем.

¹⁴ Әгәр ҙә халҡым Мине тыңлаһа, Исраил юлдарымдан йөрөһә,

¹⁵ Дошмандарын бик тиҙ йөгөндөрөр, Иҙеүселәрен ҡулым менән йүгәнләр инем!

¹⁶ Миңә нәфрәт тотоусылар бөгөлөп төшөр, Язалары мәңге дауам итер ине.

¹⁷ Һеҙҙе бойҙайҙың иң яҡшыһы менән һыйлар, Ҡаянан аҡҡан бал менән туйҙырыр инем».