Зәбүр 79 - Изге Яҙма

¹ Йырсылар етәксеһенә: «Килешеү лилиәһе» көйөнә. Асафтың мәҙхиәһе.

^2-3 Тыңла беҙҙе, Исраилдың Көтөүсеһе, Йософ нәҫелен ҡуй көтөүсеһеләй етәкләп йөрөткән Һинһең, Кирубтарҙың өҫтөндә тәхет ҡорғанһың, Әфраим, Бинйәмин, Менашше алдында нурыңды сәс, Ҡөҙрәтеңде күрһәт, беҙҙе ҡотҡарырға кил!

⁴ Беҙҙе элекке хәлебеҙгә ҡайтар, эй Алла! Йөҙөңдән нур сәсеп беҙҙе ҡотҡар!

⁵ Раббы, Күк ғәскәрҙәре Аллаһы, ҡасанғаса Халҡың доғаһына асыулы ҡарарһың?

⁶ Уларға икмәк урынына күҙ йәше бирҙең, Туҫтаҡ тулы әсе йәш эсерҙең.

⁷ Күршеләребеҙҙең талашына сәбәп иттең, Дошмандарыбыҙ бот сабып көлә.

⁸ Күк ғәскәрҙәре Аллаһы, беҙҙе элекке хәлебеҙгә ҡайтар, Йөҙөңдән нур сәсеп беҙҙе ҡотҡар!

⁹ Мысырҙан бер йөҙөм ботағы алып килдең, Ҡәүемдәрҙе ҡыуып, уны тупраҡҡа ултырттың.

¹⁰ Уның өсөн урын әҙерләнең, Тамыр йәйеп илгә таралды.

¹¹ Күләгәһе тауҙарҙы ҡапланы, Ботаҡтары – ғорур кедрҙарҙы.

¹² Тәлгәштәре диңгеҙгә үрелде, Тармаҡтары Евфратҡаса барып етте.

¹³ Ниңә Һин уның ҡоймаларын емерҙең? Емештәрен йолҡа һәр үткенсе,

¹⁴ Ҡырағай сусҡалар төбөн соҡой, Ҡыр йәнлектәре һабаҡтарын кимерә.

¹⁵ Күк ғәскәрҙәре Аллаһы, кире борол! Ҡараһана күктән! Күр ҙә илтифат ит йөҙөм ағасына.

¹⁶ Уң ҡулың ултыртҡан үрсемде, Үҙең ныҡлыҡ биргән уланды ҡурсала.

¹⁷ Ҡырҡып ташланған ул, яндырылған… Быны эшләгәндәр Һинең Асыулы ҡарашыңдан юҡҡа сыҡһындар!

¹⁸ Ҡулың уң яғыңда тороусыны – Үҙең ныҡлыҡ биргән әҙәм улын ҡурсалаһын!

¹⁹ Шул саҡта беҙ Һинән тайпылмабыҙ. Йәшәү бир беҙгә, исемеңде әйтеп саҡырырбыҙ!

²⁰ Йә Раббы, Күк ғәскәрҙәре Аллаһы, Беҙҙе элекке хәлебеҙгә ҡайтар, Йөҙөң беҙгә нурын сәсһен – ҡотолоу табайыҡ!