Зәбүр 77 - Изге Яҙма

1 Асафтың уйланыуҙары.

¹ Асафтың уйланыуҙары. Эй халҡым, тыңла нәсихәтемде, Ҡолаҡ һал ауыҙымдан сыҡҡан һүҙҙәргә.

² Ауыҙымды хикмәт менән асайым, Боронғо серҙәрҙе әйтәйем.

³ Ишеткәнде, белгәндәребеҙҙе, Аталарыбыҙҙың һөйләгәнен

⁴ Килер быуындарҙан йәшермәбеҙ: Раббының данға лайыҡ эштәрен, Ҡөҙрәтен, ҡылған мөғжизәләрен Киләсәк быуындарға иғлан итербеҙ.

⁵ Раббы Яҡупҡа күрһәтмәләрен күндергән, Исраилға ҡанун биргән. Был тәғлимәтте балаларына өйрәтһен тип, Ата-бабаларыбыҙға бойорған.

⁶ Килер быуын, тыуыр балалар белһендәр, Улар үҙ балаларына аңлатһындар:

⁷ Өмөттәрен Аллаға улар бағлаһын, Алла ғәмәлдәрен онотмаһын, Бойороҡтарын бойомға ашырһын;

⁸ Ата-бабалары һымаҡ булмаһындар: Сөнки улар тиҫкәре, фетнәсел быуын булды; Күңелдәре тотороҡһоҙ, Рухтары Аллаға тоғро түгел ине.

⁹ Ана, уҡ-һаҙаҡлы Әфраим улдары Алыш көнөндә арттарына боролоп ҡасты.

¹⁰ Сөнки улар Алла менән килешеүҙе боҙҙо, Уның ҡануны буйынса йәшәүҙән баш тартты.

¹¹ Оноттолар Уның ғәмәлдәрен, Уларға күрһәткән мөғжизәләрен.

¹² Алла Мысырҙа Соған тигеҙлегендә, Ата-бабаларының күҙ алдында, Мөғжизә-хикмәттәрен күрһәтте.

¹³ Диңгеҙҙе ярып, уларҙы ҡоронан алып сыҡты; Һыуҙарҙы диуар һымаҡ үрә торғоҙҙо.

¹⁴ Көндөҙ болот, төндә ут яҡтыһы менән, Уларға гел юл күрһәтеп барҙы.

¹⁵ Сүлдә ҡая ярып һыу сығарҙы; Төпһөҙ даръяларҙан һуғарғандай, Уларға туйғансы һыу эсерҙе.

¹⁶ Ҡая таштан шишмә урғылтты, Һыу йылға һымаҡ сылтырап аҡты.

¹⁷ Әммә улар гонаһ ҡылыуҙарын дауам иттеләр, Сүлдә Юғарыларҙан Юғарыға ҡаршы баш күтәрҙеләр.

¹⁸ Йәндәре теләгән ризыҡ һорап, Тиҫкәреләнеп Алланы һынанылар.

¹⁹ «Алла сүлдә табын ҡора аламы?» – тип, Аллаға ҡаршы бурылданылар.

²⁰ Бына Ул ҡаяға һуҡты – һыу атылды, Гөрләүектәр ашып ташты. «Инде Ул халҡына икмәк бирә алырмы? Халҡына ит ашата алырмы?»

²¹ Раббы быны ишетеп бик асыуланды, Яҡупҡа нәфрәт уты тоҡанды, Исраилға ҡарата ярһыны.

²² Сөнки Аллаға инанманылар, Ҡотҡарырына ышанманылар.

²³ Алла болоттарға бойороҡ бирҙе, Күк ҡабағын киреп асты.

²⁴ Уларға ашар өсөн майҙә яуҙырҙы, Күктең икмәген бирҙе уларға.

²⁵ Әҙәм балалары фәрештәләр икмәген татыны; Тамаҡтары туйғансы шуны ашаны.

²⁶ Көнсығыш елен иҫтерҙе Ул күктәрҙә, Ҡөҙрәте менән көньяҡ елен ҡуптарҙы.

²⁷ Саң-туҙандай ит яуҙырҙы баштарына, Ҡош ебәрҙе диңгеҙҙәге ҡом ҡәҙәрле

²⁸ Тупламдарының уртаһына, Торлаҡтарының әйләнә-тирәһенә.

²⁹ Алҡынғанса ашанылар ҙа туйҙылар; Теләктәрен бойомға ашырҙы Алла.

³⁰ Әммә әле күҙҙәре туйып өлгөрмәгәйне, Әле ауыҙҙарында ине иттәре.

³¹ Алла ҡәһәрен ебәрҙе өҫтәренә: Иң көслөләрен үлтерҙе, Исраилдың егеттәрен йығып һалды.

³² Хатта шунда ла гонаһ ҡылыуҙарын дауам иттеләр, Алланың мөғжизәләренә ышанманылар.

³³ Алла уларҙың көндәрен мәғәнәһеҙ мәшәҡәттә, Йылдарын ығы-зығыла һәләк итте.

³⁴ Алла ҡайһыларын үлтерһә, Шунда ғына ҡалғандар Уға ынтылыр, Йәнә Уны эҙләргә тотонор булды.

³⁵ Алла уларҙың ҡаяһы булғанын, Юғарыларҙан Юғарының уларҙы йолоусы икәнен Иҫтәренә төшөрәләр ине.

³⁶ Ауыҙҙары менән Уға ярамһаҡландылар, Телдәре менән ялғанды һөйләнеләр.

³⁷ Ә йөрәктәре менән Уға берекмәнеләр, Килешеүенә тоғролоҡ һаҡламанылар.

³⁸ Ул рәхимле – ғәйептәрен ғәфү итте; Уларҙы ҡырырға теләмәне; Күп тапҡыр асыуын йотто, Бөтә ярһыуына юл ҡуйманы.

³⁹ Иҫтә тотто: улар тик тән генә, Улар иҫеп киткән һәм кире ҡайтмаған ел һымаҡ.

⁴⁰ Нисә тапҡыр сүлдә Уға ҡаршы фетнә күтәрҙеләр, Ҡыу далала Уны күпме көйҙөрҙөләр!

⁴¹ Ҡабат-ҡабат һынанылар Алланы, Исраилдың Мөҡәддәсен рәнйеттеләр.

⁴² Иҫкә алманылар көслө ҡулын, Үҙҙәрен дошмандан ҡотҡарған көндө,

⁴³ Мысырҙа күрһәткән хикмәттәрҙе, Соған тигеҙлегендә ҡылған мөғжизәләрҙе.

⁴⁴ Мысырҙар һыуҙарын эсә алмаһын тип, Йылғаларын ҡанға әйләндерҙе.

⁴⁵ Уларҙы күгәүендәргә емтек итте, Өҫтәренә тәлмәрйендәр ебәреп, юҡ итте.

⁴⁶ Игендәрен ҡарышлауыҡтарға, Уңыштарын саранчаға бирҙе.

⁴⁷ Йөҙөмдәрен борсаҡтан һуҡтырҙы, Ҡырағай инжир ағастарын боҙ ҡырҙы.

⁴⁸ Малдары боҙ-борсаҡтан ҡырылды, Көтөүҙәрен йәшен һуҡты.

⁴⁹ Мысырҙарҙың өҫтәренә ялҡынлы ярһыуын, Асыуын, нәфрәтен, бәлә-ҡазаларын түкте, Һәләкәт фәрештәләрен ебәрҙе.

⁵⁰ Асыу-ярһыуына юл ҡуйҙы, Йәндәрен үлемдән һаҡламаны, Уларҙы үләткә дусар итте.

⁵¹ Мысырҙарҙың беренсе булып тыуған ир балаларын, Хам сатырҙарындағы ирлек ҡеүәтенең тәү емештәрен ҡырҙы.

⁵² Үҙ халҡын иһә унан ҡуй һымаҡ алып сыҡты, Сүлдә уларҙы көтөү һымаҡ ҡурсып йөрөттө.

⁵³ Хәүефһеҙ алып барҙы – һис ҡурҡманылар; Дошмандарын иһә диңгеҙ йотто.

⁵⁴ Уларҙы мөҡәддәс тупрағына, Уң ҡулы яулап алған тауға килтерҙе.

⁵⁵ Алдарынан башҡа ҡәүемдәрҙе ҡыуҙы, Биләмәгә тупраҡтарын Исраил ырыуҙарына бүлеп бирҙе. Халҡын уларҙың сатырҙарына урынлаштырҙы.

⁵⁶ Әммә улар Юғарыларҙан Юғары Алланы һынауҙан туҡтаманы, Уға ҡаршы баш күтәрҙе, Уның күрһәтмәләрен тотманы.

⁵⁷ Ата-бабалары һымаҡ хыянат итте, һатлыҡ булдылар, Ышанысһыҙ йәйә һымаҡ бөгөлдөләр.

⁵⁸ Боттарға табынған ҡалҡыулыҡтары менән Алланы асыуландырҙылар, Һындары менән көнсөллөгөн уяттылар.

⁵⁹ Барыһын күреп-ишетеп торған Алла Исраилды бөтөнләйгә ситкә типте.

⁶⁰ Шилолағы торлағынан, Кешеләр араһында ҡорған сатырҙан ваз кисте.

⁶¹ Үҙенең ҡөҙрәт-шөһрәт билдәһен Дошмандың ҡулына әсирлеккә бирҙе.

⁶² Үҙ биләмәһе булған халҡына асыуланып, Уны ҡылыс хөкөмөнә дусар итте.

⁶³ Егеттәрен ялҡын ялмап йотто, Ҡыҙҙары туй йырҙарынан мәхрүм ҡалды.

⁶⁴ Ҡаһиндары ҡылыстан ҡырылды, Тол ҡалған ҡатындары матәм йолаһы үткәрә алманы.

⁶⁵ Әммә бер мәл бөйөк Хаким йоҡонан уянған һымаҡ, Шараптан айныған батыр һымаҡ ҡалҡты.

⁶⁶ Дошмандарын тар-мар итте, ҡыуҙы, Уларҙы мәңгелеккә мәсхәрәгә батырҙы.

⁶⁷ Йософтоң сатырын ситкә типте, Әфраим ырыуын һайламаны;

⁶⁸ Үҙенә Йәһүҙәнең тоҡомон, Яратҡан Сион тауын һайланы.

⁶⁹ Изге торлағын бейек күк кеүек ҡорҙо, Ер йөҙө һымаҡ мәңгелек итеп һалды.

⁷⁰ Ҡоло Дауытты һайланы, Уны һарыҡ аҙбарынан алды.

⁷¹ Ул Дауытты һауын һарыҡтары, Ҡуйҙар көткән ерҙән алды; Үҙенең халҡы Исраилға, Биләмәһе Яҡупҡа көтөүсе итеп ҡуйҙы.

⁷² Дауыт уларҙы саф йөрәк менән көттө, Оҫта ҡул менән әйҙәп йөрөттө.