Зәбүр 76 - Изге Яҙма

¹ Йырсылар етәксеһенә: Йедуҫундың көйөнә. Асафтың мәҙхиәһе.

² Ауазым минең – Аллаға, ялбарамын; Ҡысҡырамын – Ул мине ишетә.

³ Хәсрәт көнөмдә бөйөк Хакимымды эҙләйем, Йәнемә йыуаныс таба алмай, Төндәр буйы арымай-талмай, Уға ҡулдарымды һонамын.

⁴ Алланы иҫемә алып ыңғырашам, Уйланам һәм рухым төшә бара. Села

⁵ Күҙ ҡабаҡтарымды яптырмайһың, Ҡайғымдан әйтер һүҙ таба алмайым.

⁶ Күптән үткән замандарҙы, Әүәлгеләрҙе уйлайым.

⁷ Төндә йырлаған йырҙарым иҫкә төшә, Үҙ-үҙем менән һөйләшәм, Күңелдәге һорауҙарыма яуап эҙләйем:

⁸ «Мәңгелеккә ваз кистеме бөйөк Хаким? Инде һис кенә лә хуш күрмәҫме?

⁹ Бөтөнләйгә юғалдымы тоғро мөхәббәте? Вәғәҙәләре мәңгегә тамам булырмы?

¹⁰ Алла рәхимлеген оноттомо? Асыуланып, шәфҡәтенә юл яптымы?» Села

¹¹ Шунан үҙ-үҙемә әйттем: «Бына нимә минең өсөн хәсрәт: Юғарыларҙан Юғары уң ҡулы менән Беҙгә элекке һымаҡ ярҙам күрһәтмәй».

¹² Раббының ғәмәлдәрен онотмам, Боронғо хикмәттәрен иҫтә тотормон.

¹³ Бөтә эштәреңде аңларға тырышырмын, Ҡылған ғәмәлдәрең хаҡында уйлармын.

¹⁴ Эй Аллам, юлың мөҡәддәс! Һиндәй бөйөк берәй алла бармы?

¹⁵ Һин мөғжизәләр ҡылған Аллаһың, Халыҡтар араһында ҡөҙрәтеңде таныттың.

¹⁶ Көслө беләгең менән халҡыңды – Яҡуп һәм Йософ улдарын ҡотҡарҙың. Села

¹⁷ Һыуҙар Һине күргәс, эй Алла, Һыуҙар Һине күргәс, сайҡалдылар; Хатта төпһөҙ даръялар тетрәне.

¹⁸ Болоттар һыуҙарын бушатты, Күк күкрәне, Һәр тарафта утлы уҡтарың ялтланы.

¹⁹ Дауылда күкрәүең яңғыраны, Йәшен утың донъяны яҡтыртты, Ер тетрәне һәм сайҡалды.

²⁰ Һин диңгеҙҙә, Тәрән һыуҙарҙа юл һалдың, Әммә аяҡ эҙҙәрең билдәле түгел ине.

²¹ Муса һәм Һарундың ҡулы менән Халҡыңды көтөү һымаҡ алға әйҙәнең.