Зәбүр 71 - Изге Яҙма

1 Сөләймәндең мәҙхиәһе.

¹ Сөләймәндең мәҙхиәһе. Эй Алла, батшаға ғәҙеллегеңде бир, Ә батша улына хаҡ хөкөмдәр сығарырға өйрәт.

² Һинең халҡыңа ул батша хаҡ хөкөм ҡылһын, Фәҡирҙәрҙең дәғүәләрен ғәҙеллек менән хәл итһен!

³ Тауҙар халыҡҡа бәрәкәт килтерһен, Ҡалҡыулыҡтар хаҡлыҡ еткерһен!

⁴ Батша халыҡтың ярлыларына хаҡ хөкөм ҡылһын, Фәҡирҙәрҙең балаларын ҡотҡарһын, Залимдарҙы иһә тар-мар итһен!

⁵ Батшаның ғүмере, ҡояш менән ай ғүмере һымаҡ, Быуындан-быуынға дауам итһен.

⁶ Хакимлығы яңы сабылған болонға яуған ямғыр, Тупраҡты һуғарған көслө ямғыр һымаҡ булһын!

⁷ Уның көндәрендә тәҡүәләр сәскә атһын, Ҡасанғаса күктә ай нур сәсә, Шуға тиклем илдә именлек, муллыҡ-бәрәкәт булһын!

⁸ Хакимлығы диңгеҙҙән диңгеҙгә тиклем, Евфрат йылғаһынан ерҙең сигенә саҡлы йәйелһен!

⁹ Алдында сүлдәге ҡәбиләләр теҙ сүкһен, Дошмандары саң-туҙан ялаһын.

¹⁰ Таршиш һәм утрауҙарҙың батшалары Уға яһаҡ түләһен, Шева менән Сева батшалары бүләктәр алып килһен!

¹¹ Бар батшалар алдында ергә ҡапланһын, Бөтөн ҡәүемдәр уға хеҙмәт итһен!

¹² Сөнки ярҙам һорап саҡырған фәҡирҙе, Таянысы булмаған ярлыны ҡотҡарыр.

¹³ Юҡсыл менән хәйерсене ҡыҙғаныр, Мохтаждарға ярҙам итер.

¹⁴ Уларҙы йәбер-золомдан йолоп алыр, Сөнки батшаға уларҙың йәне ғәзиз.

¹⁵ Йәшәһен батша! Уға Шеваның алтынын бирһендәр; Уның өсөн туҡтауһыҙ доға ҡылһындар, Көн оҙоно Алланан фатиха һораһындар!

¹⁶ Илдә ашлыҡ ишелеп уңһын, Тау итәктәрендә башаҡтар тулҡынланһын! Башаҡтары Ливандағылай тос булһын, Ҡалаларҙа халыҡ ҡырҙағы үлән һымаҡ ишәйһен!

¹⁷ Батшаның исеме мәңге йәшәһен, Даны ҡояштай ғүмерле булһын, Бар халыҡтар уның аша фатиха алһын, Ҡәүемдәр уны бәхет эйәһе тип атаһын!

¹⁸ Раббы Алла, Исраилдың Аллаһы мөбәрәк булһын! Бары тик Ул – ғәжәйеп эштәр ҡылыусы.

¹⁹ Данлы исеме мәңге мөбәрәк булһын, Бар донъя Уның шөһрәте менән тулһын! Амин! Амин!

²⁰ Ишай улы Дауыттың доғалары ошонда тамам.