Зәбүр 70 - Изге Яҙма

¹ Йә Раббы, Һиндә мин ышыҡ табам; Миңә оятҡа ҡалырға бирмә мәңге!

² Ғәҙеллегеңде күрһәт, йолоп ал, ҡотҡар! Ҡолаҡ һал миңә, ярҙам ит!

³ Миңә һыйыныр ҡая бул. Ҡаям да Һин, ҡәлғәм дә Һин, Мине ҡотҡарырға бойор!

⁴ Эй Аллам, мине яуыз бәндә ҡулынан, Хаҡһыҙҙың, залимдың тырнағынан ҡотҡар!

⁵ Һин, эй Раббы Хаким, минең өмөтөмһөң; Йәш сағымдан Һиңә өмөт бағлағанмын.

⁶ Тыуғанымдан бирле Һиңә таянамын, Әсәм ҡарынынан мине алып сығарғанһың. Һәр саҡ Һиңә генә маҡтауҙарым.

⁷ Күптәр миңә ҡарап хайран ҡалды, Һин минең ышаныслы ышығым.

⁸ Һине маҡтау телемдән һис төшмәҫ, Көндән-көнгә ғиззәтеңде бәйән итәм.

⁹ Ҡартайған көнөмдә минән ваз кисмә Һин, Көсөм бөткәс, мине ситкә типмә!

¹⁰ Дошмандарым миңә ҡаршы һүҙ йөрөтә, Йәнемде көҫәгәндәр бер-береһенә кәңәш итә.

¹¹ «Алла уны ташлаған, ҡотҡарырға бер кеме юҡ, Баҫтырып тотайыҡ!» – тиҙәр улар.

¹² Эй Алла, алыҫлашмасы минән, Эй Аллам, ярҙамға ашыҡ!

¹³ Оятҡа ҡалһын, юҡ булһын мине дошман күргән, Мәсхәрәгә төрөнһөн, рисуай булһын Миңә яуызлыҡ теләгән.

¹⁴ Мин иһә һәр саҡ өмөт бағлармын Һиңә, Маҡтау өҫтөнә маҡтауҙар яуҙырырмын.

¹⁵ Телем Һинең игелекте хикәйәләр, Көн оҙоно ҡотҡарыуың тураһында бәйән итер, Ә бит уларҙы һанап бөткөһөҙ.

¹⁶ Эй Хакимым Раббы, ҡөҙрәтле ғәмәлдәреңде, Һинең, бары Һинең хаҡлығыңды һөйләрмен.

¹⁷ Эй Аллам, йәш сағымдан алып өйрәтәһең, Һинең мөғжизәләреңде әлегәсә данлайым.

¹⁸ Сәстәрем салланып, ҡартайһам да, Ташлама мине, эй Аллам! Киләсәк быуынға ҡеүәтеңде, Һинең ҡөҙрәтеңде аңлатырмын.

¹⁹ Эй Алла, ғәҙеллегең күктәргә олғаша, Ҡылған ғәмәлдәрең бөйөк. Һиңә оҡшаған кем бар, эй Алла?

²⁰ Мине бик күп ҡайғы, ғазаптарға дусар иттең, Әммә ҡабаттан йәшәү дәртемде ҡайтарырһың, Ерҙең тәрәнлектәренән сығарырһың.

²¹ Мине үрләтеп, тағы ла йыуатырһың.

²² Ә мин Һине лира ауаздары менән данлармын, Һинең тоғролоғоң хаҡында йырлармын, Аллам! Арфала Һиңә уйнармын, Эй Исраилдың Мөҡәддәсе!

²³ Һиңә йырлаған саҡта ирендәрем тантана итә, Һин йолоп алған йәнем ҡыуана.

²⁴ Көн оҙоно телем Һинең ғәҙеллекте данлай, Ә миңә зарар итергә йыйынғандар, Мәсхәрәгә ҡалып, хур булдылар!