Зәбүр 68 - Изге Яҙма

¹ Йырсылар етәксеһенә: «Лилиә сәскәләре» көйөнә. Дауыттың мәҙхиәһе.

² Эй Илаһым, ҡотҡар мине, Һыуҙар боғаҙыма етте.

³ Төпһөҙ һаҙлыҡҡа убылам, Аяғымды терәр ер тапмайым. Тәрән һыуҙарға юлыҡтым, Ағын инде баштан ашты.

⁴ Ҡысҡыра-ҡысҡыра хәлдән тайҙым, Тамағым ҡарлығып кипте, Алламдың ярҙамын көтә-көтә Күҙҙәремдең нуры бөттө.

⁵ Һис бер юҡҡа мине күрә алмағандар Башымдағы сәс бөртөгөнән дә күбәйҙеләр. Сәбәпһеҙгә йәнемде көҫәгән дошмандар ифрат көсәйҙе. Ә мин урламаған нәмәне нисек ҡайтарып бирәйем?

⁶ Эй Аллам, иҫәрлегемде Һин беләһең; Ғәйептәрем дә Һинән йәшерен түгел.

⁷ Эй бөйөк Хаким, Күк ғәскәрҙәре Раббыһы, Һиңә өмөт бағлағандар Минең арҡала оятҡа ҡалмаһындар! Эй Исраилдың Аллаһы, Һиңә табан йөҙ тотҡандар Минең арҡала мәсхәрә булмаһындар!

⁸ Сөнки мин Һинең хаҡыңа хурлыҡ күрәм, Йөҙөмә сәркеү яғылды.

⁹ Ағай-энемә ят булдым, Әсәйемдең улдары мине сит күрә.

¹⁰ Һинең йортоң өсөн йән атып, янып-көйәм мин, Һине яманлаусыларҙың хурлау әсеһе өҫтөмә төштө.

¹¹ Минең илап ураҙа тотоуым – Йәнә мәсхәрәләү өсөн сәбәп булды.

¹² Ҡыл туҡымаға урандым – Тағы әҙәм көлкөһөнә ҡалдым.

¹³ Ҡала ҡапҡаһы төбөндә ултырғандар мине сәйнәй; Иҫеректәр минең хаҡта таҡмаҡ йырлай.

¹⁴ Әммә минең доғам бары Һиңә, Раббы! Эй Алла, мине хуш күргән мәлдә Сикһеҙ һөйөүеңә күрә яуап ҡайтар, Ышаныслы Ҡотҡарыусы бул Һин миңә!

¹⁵ Батҡаҡтан һөйрәкләп сығар мине, Миңә батырға ихтыяр ҡуйма; Нәфрәт тотҡан бәндәләрҙән, Тәрән һыуҙарҙан ҡотолоп ҡалайымсы.

¹⁶ Ташҡын һыуҙар йыуып алып китә алмаһын, Төпһөҙ упҡын мине йотмаһын, Өҫтөмдә ҡәбер боғаҙын япмаһын.

¹⁷ Яуап ҡайтар миңә, Раббы, Сөнки тоғро мөхәббәтең изге. Оло мәрхәмәтең менән йөҙөңдө бор миңә табан!

¹⁸ Мин ҡолоңдан йөҙөңдө йәшермә, Ауыр миңә, йәһәтерәк яуап ҡайтар!

¹⁹ Яҡыныраҡ кил, йәнемде ҡотҡар, Дошмандарымдан мине йолоп ал!

²⁰ Мине нисек хурлауҙарын, Мыҫҡыллаған, мәсхәрә иткәндәрен беләһең; Дошмандарымдың һәммәһе күҙ алдыңда.

²¹ Хурлыҡ йөрәгемде яраланы, хәлдән тайҙым, Хәсрәтемде уртаҡлашыр кеше көттөм дә, булманы. Йыуатыусы эҙләнем, тик таба алманым.

²² Ризыҡ итеп миңә ағыу ашаттылар, Һыуһыныма һеркә эсерҙеләр.

²³ Алдарындағы табын уларға тоҙаҡ, Дуҫтарына иһә ҡапҡан булһын!

²⁴ Күҙҙәре томаланһын да күрмәһендәр! Гел генә ҡалтыранып торһондар.

²⁵ Ярһыуыңды өҫтәренә яуҙыр, Асыу ялҡының уларҙы ялмап алһын!

²⁶ Торлаҡтары бушап ҡалһын, Сатырҙарында йәшәүсе булмаһын!

²⁷ Сөнки Һин язалағанды һаман эҙәрләйҙәр, Һин яра һалғандарҙың әрнеүенән көлөп һөйләйҙәр.

²⁸ Ғәйептәре өҫтөнә ғәйеп өй; Һинең алдыңда аҡлана алмаһындар!

²⁹ Әйҙә исемдәре тормош китабынан һыҙылһын, Тәҡүәләр менән йәнәшә яҙылмаһын!

³⁰ Мин иһә ярлы һәм әрнеүлемен, Эй Аллам, ҡотҡарыуың мине һаҡлаһын!

³¹ Аллам исеменә маҡтау йырлармын, Уны шөкөрана ҡылып ҙурлармын.

³² Был Раббыны ҡорбанлыҡ үгеҙҙән, Тояҡлы-мөгөҙлө башмаҡтан нығыраҡ хушландырыр.

³³ Фәҡирҙәр быны күреп ҡыуанһын, Эй Алланы эҙләгәндәр, йөрәгегеҙ йәнләнһен.

³⁴ Сөнки Раббы мохтаждарҙы ишетер, Үҙ халҡын тотҡонлоҡта ташламаҫ.

³⁵ Уға дан йырлағыҙ, ер менән күк, Диңгеҙҙәр һәм ундағы бөтә йән эйәләре!

³⁶ Сөнки Алла Сионды ҡотҡарыр, Йәһүҙә ҡалаларын ҡабаттан торғоҙор; Халыҡ унда төйәкләнеп хужа булыр.

³⁷ Алла ҡолдарының тоҡомо унан биләмә алыр, Унда Алланың исемен яратҡандар йәшәр.