Зәбүр 66 - Изге Яҙма

¹ Йырсылар етәксеһенә: Ҡыллы уйын ҡоралдары оҙатыуында. Йыр-мәҙхиә.

² Алла беҙгә мәрхәмәтле булһын, фатиха бирһен; Беҙҙе йөҙөнөң нуры менән балҡытһын. Села

³ Шул саҡ ер йөҙөндә юлың мәғлүм булыр, Бар халыҡтар араһында ҡотҡарыуың билдәле булыр.

⁴ Эй Алла, халыҡтар Һиңә шөкөр итһен, Бөтә халыҡтар рәхмәт яуҙырһын!

⁵ Ҡәүемдәр ҡыуанып күңел асһын, Сөнки Һин халыҡтарҙы ғәҙел хөкөм итәһең, Ер йөҙөндәге ҡәүемдәргә юл күрһәтәһең. Села

⁶ Эй Алла, халыҡтар Һиңә шөкөр итһен, Бөтә халыҡтар рәхмәт яуҙырһын!

⁷ Тупраҡ уңышын бирә; Алла, Аллабыҙ беҙгә бәрәкәт бирһен.

⁸ Алла беҙгә фатихаһын бирһен, Әйҙә, ерҙең һәр тарафындағылар Унан ҡурҡып, Уны хөрмәт итеп торһон.