Зәбүр 65 - Изге Яҙма

1 Йырсылар етәксеһенә: Йыр-мәҙхиә.

¹ Йырсылар етәксеһенә: Йыр-мәҙхиә. Эй ер йөҙөндәге бар кешеләр, Ҡыуанышып Алланы маҡтағыҙ!

² Уның исемен данлап йырлағыҙ, Шөһрәтенә маҡтау яуҙырығыҙ!

³ Аллаға былай тип әйтегеҙ: «Ни ҡәҙәр дәһшәтле ғәмәлдәрең! Һин шул тиклем ҡөҙрәтлеһең, Дошмандарың алдыңда бөгөлөп төшөр.

⁴ Бөтә донъя Һиңә сәждә ҡылыр, Мәҙхиә уҡыр, Исемеңде маҡтап йырлар». Села

⁵ Эй килегеҙ, Алланың ғәмәлдәрен күрегеҙ! Ниндәй дәһшәтле хикмәттәр ҡылды Әҙәм улдарының күҙ алдында:

⁶ Диңгеҙҙе ҡороға әйләндерҙе, Йылғаны халыҡ йәйәүләп кисеп сыҡты. Уның ҡылғандарына ҡыуандыҡ шунда.

⁷ Ҡөҙрәте менән мәңге хакимлыҡ итә, Күҙе менән ҡәүемдәрҙе байҡап тора: Фетнәселдәр Уға ҡаршы ҡалҡмаһындар! Села

⁸ Эй халыҡтар, Аллабыҙға шөкөрана ҡылығыҙ, Маҡтау ауаздарығыҙ яңғырап торһон.

⁹ Ул беҙҙең ғүмеребеҙҙе һаҡлай, Аяғыбыҙға тайып китергә бирмәй.

¹⁰ Эй Илаһым, Һин беҙҙе тикшерҙең, Көмөштө таҙартҡан һымаҡ иретеп һынаның.

¹¹ Һин беҙҙе ауға төшөрҙөң, Иңебеҙгә ғазап һалдың.

¹² Һыбайлыларҙы башыбыҙ аша үткәрттең; Беҙҙе уттар, һыуҙар аша уҙғарҙың, Ахырҙа иркенгә алып сыҡтың.

¹³ Ҡорамыңа тотош яндырыу ҡорбандары менән инермен, Әйткән нәҙерҙәремде үтәрмен –

¹⁴ Бәлә килгәндә телемдән төшкән, Ауыҙымдан сыҡҡан нәҙерҙәрҙе.

¹⁵ Һимеҙ малдарҙы тотош яндырыу ҡорбаны итермен, Һарыҡ тәкәләрен хуш еҫ ҡорбанына төтәҫләрмен, Һыйыр малы, кәзә тәкәләре килтерермен. Села

¹⁶ Эй һеҙ, Алланан ҡурҡҡандар, килегеҙ, тыңлағыҙ, Уның миңә ниҙәр эшләгәнен һөйләп бирәм.

¹⁷ Ауыҙым менән Уны саҡырҙым, Телем менән ҙурлап туйманым.

¹⁸ Йөрәгемдә боҙоҡлоҡҡа урын бирһәм, Раббы мине ишетмәгән булыр ине.

¹⁹ Ә Алла мине тыңланы, Доғам ауазына ҡолаҡ һалды.

²⁰ Рәхмәттәр яуһын Аллаға! Доғамды кире ҡаҡманы, Тоғро мөхәббәтенән мине мәхрүм итмәне.