Зәбүр 61 - Изге Яҙма

¹ Йырсылар етәксеһенә: Йедуҫундың көйөнә. Дауыттың мәҙхиәһе.

² Йәнемдең тыныслығы бары Аллала, Миңә ҡотолоу тик Унан килер.

³ Тик Ул – минең ҡаям, ҡотҡарыусым, ҡәлғәм. Һәм мин бер ваҡытта ла сайҡалмам.

⁴ Кеше диуар һымаҡ ауышҡанда, Ҡойма һымаҡ ҡыйшайғанда, Уға ҡанығыуығыҙ ҡасанға тиклем булыр?

⁵ Уны юғарынан ҡолатырға уйлайһығыҙ, Ялғандан тәм табаһығыҙ; Телегеҙҙә фатиха булһа ла, Эсегеҙҙән ҡарғыш яуҙыраһығыҙ. Села

⁶ Йәнемдең тыныслығы бары Аллала, Сөнки өмөтөм тик Унда ғына.

⁷ Бары тик Ул ғына ҡаям, ҡотҡарыусым, Ул минең ҡәлғәм һәм мин сайҡалмам.

⁸ Ҡотолоуым да, даным да тик Аллала, Минең ышығым Ул, ҡеүәтле ҡаям.

⁹ Эй халыҡ, һәр ваҡыт Уға өмөт бағла, Уға бушат эс-бауырыңдағын, Сөнки Алла беҙҙең ышығыбыҙ. Села

¹⁰ Әҙәм балалары – тик бер һулыш, Кеше балалары – тик уйҙырма. Барыһын бергә үлсәүгә һалһаң, Улар тындан да еңелерәк тартыр.

¹¹ Һис ҡасан юлбаҫарлыҡҡа ышанмағыҙ, Талап алған малығыҙға маҡтанмағыҙ; Байлығығыҙ артһа ла, уға арҡаланмағыҙ.

¹² Алла бер тапҡыр һөйләне, Мин ике тапҡыр ишеттем: Ҡеүәт – Алланан!

¹³ Эй бөйөк Хаким, тоғро мөхәббәт Һинән! Һин һәр кемгә ғәмәленә күрә әжерен бирәһең!