Зәбүр 58 - Изге Яҙма

¹ Йырсылар етәксеһенә: «Һәләк итмә» көйөнә Дауыттың шиғыры. Шаул, Дауытты үлтертер өсөн кеше ебәреп, өйөн күҙәттергән саҡта сығарылған.

² Ҡотҡар мине дошмандарымдан, эй Аллам, Миңә һөжүм иткәндәрҙән һаҡла.

³ Азат ит мине яуызлыҡ ҡылғандарҙан, Ҡан түгеүселәрҙең ҡулынан йолоп ал.

⁴ Ҡара, йәнемде алыр өсөн аңдыйҙар, Көслөләр миңә ҡаршы фетнә ҡоралар, Гәрсә енәйәт һәм гонаһ ҡылмаһам да, эй Раббы!

⁵ Бер ниндәй ғәйепкә ҡалмаһам да, Һөжүм итер өсөн йыйналалар. Уян, хәлемде күр, ярҙам ит!

⁶ Раббы, Һин – Күк ғәскәрҙәре Аллаһы, Исраилдың Аллаһы, уян Ҡәүемдәрҙең барыһына яза бирер өсөн! Һис ҡыҙғанма хыянатсыл залимдарҙы! Села

⁷ Һәр кис һайын улар эт шикелле ырылдашып Ҡала буйлап темеҫкенеп йөрөй.

⁸ Ана, күр, нимә ҡойола ауыҙҙарынан, Ҡылыс һымаҡ телдәре, үҙҙәре: «Кем ишетһен беҙҙе?» – тип уйлайҙар.

⁹ Әммә Һин уларҙан көлөрһөң, йә Раббы, Барса ҡәүемдәрҙе мыҫҡылларһың.

¹⁰ Эй миңә ҡеүәт биреүсе, Һинән күҙемде алмайым. Эй Алла, Һин – минең ҡәлғәм!

¹¹ Тоғро мөхәббәтең менән, Аллам, мине етәкләрһең! Дошмандарымдың тәҡдирен күрһәтерһең.

¹² Уларҙы үлтермә, юҡһа халҡым был һабаҡты онотасаҡ. Көсөң менән уларҙы туҙҙыр, тар-мар ит. Эй бөйөк Хаким, Һин беҙҙең ҡалҡаныбыҙ.

¹³ Гонаһлы телдәре арҡаһында, Ауыҙҙарынан сыҡҡан һүҙҙәргә күрә Тәкәбберлектәренең ауына эләкһендәр. Яуҙырған ҡарғыштарына күрә, Һөйләгән ялғандарына күрә

¹⁴ Уларҙы асыуың менән юҡҡа сығар! Юҡҡа сығар, хатта эҙҙәре ҡалмаһын. Белһендәр, Алланың хакимлығы Яҡуп нәҫеленән алып Ер сигенә тиклем олғашҡанын. Села

¹⁵ Һәр кис һайын улар эт шикелле ырылдашып, Ҡала буйлап темеҫкенеп йөрөй.

¹⁶ Ашарға аҙыҡ эҙләйҙәр, Тапмаһалар, аслыҡтан олойҙар.

¹⁷ Мин иһә Һинең ҡөҙрәтеңде йырлармын, Иртә таңдан мөхәббәтеңде данлармын. Сөнки Һин – миңә ҡәлғәм, Бәлә килгәндә һыйыныс булдың.

¹⁸ Һин миңә ҡеүәт биреүсе! Һиңә мәҙхиә йырлармын, Эй Аллам, Һин минең ҡәлғәм, Тоғро мөхәббәтен күрһәтеүсе Аллам Һин!