Зәбүр 56 - Изге Яҙма

1 Йырсылар етәксеһенә: «Һәләк итмә» көйөнә. Дауыттың шиғыры. Шаулдан ҡасып мәмерйәгә йәшенгән сағында сығарылған .

¹ Йырсылар етәксеһенә: «Һәләк итмә» көйөнә. Дауыттың шиғыры. Шаулдан ҡасып мәмерйәгә йәшенгән сағында сығарылған.

² Рәхимле бул, Алла, рәхимле бул! Минең йәнем Һиндә ышыҡ таба. Бәлә-ҡаза үтеп киткәнгәсә, Ҡанаттарың күләгәһендә мин урын алам.

³ Юғарыларҙан Юғары Алланы, Миңә игелектәр ҡылған Алланы саҡырам.

⁴ Күктән ярҙамын ебәреп, Ул мине ҡотҡарыр, Эҙәрләүселәрҙе рисуай итер. Села Миңә мөхәббәтен һәм тоғролоғон күндерер.

⁵ Кеше ашаусы арыҫландар араһында мин – Һөңгө-уҡ һымаҡ уларҙың тештәре; Үткер ҡылыс кеүек телдәре.

⁶ Йә Алла, асмандан да юғарыраҡ ҡалҡ, Шөһрәтең бар ер йөҙөн иңләһен!

⁷ Аяҡтарыма улар ау ҡорҙо, Күңелем төшөнкөлөккә батты; Йөрөр юлымда соҡор ҡаҙҙылар, Эсенә үҙҙәре ҡоланылар. Села

⁸ Эй Алла, күңелем тоғро Һиңә, Күңелем минең тоғро! Мин Һиңә көйләрмен, мәҙхиәләр йырлармын.

⁹ Эй уян һин, рухым, уян! Уян, лирам, уян арфам, Таңғы шәфәҡте мин уятайым!

¹⁰ Эй бөйөк Хаким, халыҡтар араһында Һиңә рәхмәттәр уҡырмын; Өммәттәр араһында Һиңә маҡтау йырлармын.

¹¹ Тоғро мөхәббәтең – күктәргә тиклем, Тоғролоғоң болоттарҙан аша.

¹² Йә Алла, асмандан да юғарыраҡ ҡалҡ, Шөһрәтең бар ер йөҙөн иңләһен!