Зәбүр 55 - Изге Яҙма

¹ Йырсылар етәксеһенә: «Алыҫта ултырған өнһөҙ күгәрсен» көйөнә. Дауыттың шиғыры. Ғаҫ ҡалаһында пелештиҙәр уны тотҡас сығарылған.

² Рәхимле бул миңә, Алла! Кешеләр эҙәрләй мине, Дошмандарым көнө буйы иҙә.

³ Көн оҙоно дошмандар эҙәрләй мине, Миңә күптәр һөжүм итә, эй Юғарыларҙан Юғары!

⁴ Ҡурҡҡан сағымда Һиңә өмөт бағлайым.

⁵ Алланың һүҙен данлайым, Уға өмөт бағлайым, Нимәнән ҡурҡырға миңә? Фани әҙәм миңә нимә ҡыла алһын?

⁶ Һөйләгәндәремдең мәғәнәһен һәр саҡ боҙоп күрһәтәләр, Уйҙарында – нисек миңә зыян ҡылыу.

⁷ Йыйылышып боҫалар ҙа баҫҡан аҙымымды күҙәтәләр, Йәнемде алырға ҡырсыналар.

⁸ Енәйәттәре өсөн уларҙы язаһыҙ ҡалдырма! Эй Алла, асыуың менән халыҡтарҙы ергә бырға!

⁹ Сит ерҙә сиккән ғазаптарымды һанағанһың, Күҙ йәштәремде турһығыңа йый! Улар Һинең китабыңа яҙылмағанмы ни?

¹⁰ Мин Һине саҡырған саҡта дошмандарым артҡа сигә, Шунан беләм – Алла минең яҡлы.

¹¹ Алланың һүҙен данлайым; Раббының һүҙен данлайым!

¹² Өмөтөмдө Аллаға бағлайым, Нимәнән ҡурҡырға миңә? Фани әҙәм миңә нимә эшләй алһын?

¹³ Эй Алла, әйткән нәҙерҙәремде үтәрмен, Шөкөр ҡорбандары килтерермен.

¹⁴ Сөнки йәнемде үлемдән алып ҡалдың, Аяҡтарыма абынырға бирмәнең; Инде мин Алланың хозурында, Тормош нурында йөрөрмөн.