Зәбүр 51 - Изге Яҙма

¹ Йырсылар етәксеһенә: Дауыттың уйланыуҙары.

² Эдом кешеһе Доег Шаулға барып: «Дауыт Ахимәләхтең өйөндә», – тип хәбәр биргәндән һуң сығарылған.

³ Эй ҡаһарман! Нимә яуызлығың менән маҡтанаһың? Алланың тоғро мөхәббәте һәр даим минең менән.

⁴ Эй мәкерле, телең һинең һәләкәт ниәтләй, Ул үткер бысаҡҡа оҡшаш.

⁵ Яҡшылыҡтан яманлыҡты, Хаҡ һүҙҙән ялғанды нығыраҡ яратаһың. Села

⁶ Мәкерле тел! Йәрәхәтләй торған һүҙҙәрҙе һин хуп күрәһең.

⁷ Әммә Алла һине тулыһынса ҡыра һуғыр, Сатырыңдан сығарып ырғытыр, Тамырыңдан йолҡоп ташлар тереләр донъяһынан. Села

⁸ Тәҡүәләр быны күреп ҡурҡыуға ҡалыр, Улар, һинән көлөп, былай тиер:

⁹ «Бына был әҙәм Аллаға һыйынманы, Байлығының күплегенә өмөтләнде; Башҡаларға яуызлыҡ ҡылып көсәйҙе».

¹⁰ Ә мин Алланың йортонда – Йәшәреп үҫкән зәйтүн һымаҡмын. Ғүмерем буйы Алланың Тоғро мөхәббәтенә ышанам.

¹¹ Ҡылған ғәмәлдәрең өсөн Һиңә мәңге рәхмәт яуҙырырмын, Тоғроларың алдында исемеңә өмөт бағлармын, Сөнки Һин – игелек сығанағы.