Зәбүр 46 - Изге Яҙма

¹ Йырсылар етәксеһенә: Ҡорах улдарының мәҙхиәһе.

² Эй барса халыҡтар, ҡул сабығыҙ! Шат ауаздар менән Алланы данлағыҙ!

³ Сөнки дәһшәтле Юғарыларҙан Юғары Раббы – Бөтә донъяның бөйөк Батшаһы;

⁴ Халыҡтарҙы беҙгә буйһондорҙо, Ҡәүемдәрҙе аяҡ аҫтыбыҙға һалды.

⁵ Был ерҙе – яратҡан Яҡубының ғорурлығын – Ул беҙгә биләмәгә һайланы. Села

⁶ Алла шатлыҡ ауаздары, Раббы борғо тауышы аҫтында ҡалҡты.

⁷ Маҡтау йырлағыҙ Аллаға, йырлағыҙ; Батшабыҙға маҡтау йырлағыҙ!

⁸ Алла – бөтә донъяның батшаһы, Уға бағышлап гүзәл йырҙар йырлағыҙ!

⁹ Алла ултыра мөҡәддәс тәхетендә, Ул батшалыҡ итә бөтә милләттәргә.

¹⁰ Халыҡтарҙың башлыҡтары йыйылған Ибраһим Аллаһының халҡы янына; Сөнки ер йөҙөндәге хакимдар – Алланыҡы. Алла бар нәмәнән юғарыраҡ!