Зәбүр 43 - Изге Яҙма

¹ Йырсылар етәксеһенә: Ҡорах улдарының уйланыуҙары.

² Эй Алла, үҙ ҡолағыбыҙ менән ишеттек беҙ, Ата-бабаларыбыҙ бәйән итте Улар дәүерендә, әүәл замандарҙа Һин эшләгән бөтә ғәмәлдәрҙе.

³ Үҙ ҡулдарың менән ҡәүемдәрҙе ҡыуҙың, Унда ата-бабаларыбыҙҙы төпләндерҙең; Халыҡтарҙы ҡырҙың, Аталарыбыҙҙы сәскә аттырҙың.

⁴ Улар ҡылыстары менән түгел, Һинең ҡеүәтең менән был ерҙе яулап алды. Үҙ ҡулдары түгел, Һинең уң ҡулың Уларға еңеү килтерҙе. Уларға йөҙөңдөң нурын сәстең, Сөнки уларҙы яраттың.

⁵ Эй Аллам, Һин минең батшам, Бойороҡ бир, Яҡуп заты еңеү ҡаҙанһын!

⁶ Һинең менән бергә дошмандарҙы һөҙөрбөҙ, Ҡаршыларҙы исемең менән тапап ташларбыҙ.

⁷ Сөнки уҡ-һаҙағыма мин ышанмайым, Ҡылысым да мине ҡотҡара алмаҫ.

⁸ Был Һин – беҙҙе дошмандарҙан азат ҡылған, Беҙгә асыу тотҡандарҙы хур иткән.

⁹ Беҙ көнө буйы Аллабыҙ менән маҡтанабыҙ, Исемеңә мәңге дан йырлайбыҙ. Села

¹⁰ Тик әле Һин беҙҙе ситкә типтең, түбәнһеттең; Ғәскәрҙәребеҙ менән яуға сыҡмайһың.

¹¹ Дошмандарыбыҙ алдында сигендерҙең, Беҙҙе күрә алмағандар таланы.

¹² Беҙҙе һарыҡ һымаҡ тамаҡлаттың, Ҡәүемдәр араһына сәсеп тараттың.

¹³ Һин Үҙ халҡыңды юҡ ҡына хаҡҡа һаттың; Уны һатып, ниндәй табыш алдың?

¹⁴ Беҙҙе күршеләр мәсхәрәһенә ҡалдырҙың, Әйләнә-тирәбеҙҙә йәшәүселәрҙең Хурлау һәм мыҫҡыллауына дусар иттең.

¹⁵ Халыҡтар араһында беҙҙе көлкөгә ҡалдырҙың, Ҡәүемдәр баш сайҡай беҙгә ҡарап.

¹⁶ Хурлығым һәр ваҡыт күҙ алдымда, Йөҙөмдө оят ҡаплаған

¹⁷ Мыҫҡыллау һәм ғәйбәт ишетеүҙән, Үс алырға теләгән дошмандан.

¹⁸ Һине һис ҡасан онотмаһаҡ та, Килешеүеңә хыянат итмәһәк тә, Былар барыһы ла башыбыҙға төштө.

¹⁹ Шулай ҙа күңелебеҙ Һинән ҡайтманы, Аяҡтарыбыҙ юлыңдан тайпылманы.

²⁰ Ә Һин беҙҙе иҙҙең, сүл бүреләре еренә ташланың, Дөм ҡараңғылыҡҡа олаҡтырҙың беҙҙе.

²¹ Аллабыҙҙың исемен онотҡан булһаҡ, Ят илаһҡа ҡулыбыҙҙы һонһаҡ,

²² Алла быны белмәҫ инеме ни? Уға мәғлүм йөрәктең бар сере.

²³ Һинең хаҡыңа һәр көн үлтереләбеҙ, Салыу һарығы һымаҡ булып ҡалғанбыҙ.

²⁴ Уян, нишләп Һин йоҡлайһың, бөйөк Хаким? Торһаңсы! Мәңгелеккә ваз кисмә беҙҙән!

²⁵ Нишләп Һин йөҙөңдө йәшерәһең? Ғазаптарыбыҙҙы, иҙелеүебеҙҙе онотаһың?

²⁶ Йәнебеҙ саң-туҙанға буталды, Тәнебеҙ тупраҡҡа һылашты.

²⁷ Ҡалҡ, ярҙам итһәнә беҙгә! Тоғро мөхәббәтең хаҡына йолоп ал!