Зәбүр 37 - Изге Яҙма

¹ Дауыттың мәҙхиәһе. Раббы хәтеренә төшөрһөн өсөн әйтелгән.

² Йә Раббы, асыуланып язалама мине, Ярһыуыңда мине ғазаплама!

³ Уҡтарың килеп ҡаҙалды, Ҡулдарыңдың ауырлығы баҫа.

⁴ Асыуыңдан тәнемдә сәләмәт урыным ҡалманы, Гонаһым арҡаһында һөйәктәремдең елеге кипте.

⁵ Сөнки ғәйептәрем баштан ашты, Күтәрмәҫлек йөк булып иңемә ятты.

⁶ Алйотлоғом арҡаһында Эренле, һаҫыҡ яраға баттым.

⁷ Бөгөлдөм, бөкрәйеп төштөм, Көн оҙоно ҡайғылы йәш түгәм.

⁸ Эс-бауырым уттай яна, Тәнемдә сәләмәт урыным юҡ.

⁹ Тәҡәтем ҡороно, бөттө хәлем, Йөрәгем әсенеүҙән иңрәйем.

¹⁰ Эй бөйөк Хакимым, бөтә теләгәнем хозурыңда, Көрһөнөүем Һинән йәшерен түгел.

¹¹ Йөрәк тыпырсына, көсөм ҡасты, Хатта күҙҙәремдең нуры ҡайтты.

¹² Дуҫ-иштәрем ауырыуымды күреп ҡасты, Яҡындарым минән йыраҡлашты.

¹³ Ә йәнемде көҫәгәндәр тоҙаҡ ҡора, Яманлыҡ теләүселәр һәләкәтемде юрай, Көн оҙоно миңә ҡаршы мәкер уйлай.

¹⁴ Ә мин һаңғырау шикелле ишетмәйем, Телһеҙ әҙәмдәй ауыҙ асмайым;

¹⁵ Телһеҙ-яуапһыҙ бәндәгә, Бер һаңғырауға әйләндем.

¹⁶ Инде өмөтөм Һиндә, йә Раббы, Яуап ҡайтарырһың, Хакимым Аллам!

¹⁷ Әйттем: «Хәлемде күреп шатланмаһындар, Аяҡтарым абынғанда, үҙҙәрен өҫтөн тотмаһындар».

¹⁸ Йығылыр сигемә еттем, Хәсрәтемдән гелән яна эсем.

¹⁹ Ғәйебемде таныйым мин, Гонаһым өсөн ҡайғырам.

²⁰ Дошмандарым иҫән, көсәйәләр, Сәбәпһеҙгә нәфрәт тотоусылар күбәйәләр.

²¹ Улар яҡшылығыма яуызлыҡ менән яуап бирә, Игелеккә ынтылғаным өсөн дошманлаша.

²² Йә Раббым, мине ташлама! Эй Илаһым, минән йыраҡлашма!

²³ Тиҙерәк ярҙамға ашыҡ, эй бөйөк Хакимым! Минең ҡотҡарыусым Һинһең!