Зәбүр 35 - Изге Яҙма

¹ Йырсылар етәксеһенә: Раббы ҡоло Дауыттың мәҙхиәһе.

² Бары гонаһ яуыз әҙәм күңелендә, Алланан ҡурҡыу юҡ булмышында.

³ Ғәйебен таныр, уға нәфрәтләнер урында, Күҙ алдында яҡшатланыр үҙ-үҙенә.

⁴ Ауыҙынан яуызлыҡ һәм ялған ағыр, Аҡыллы һәм яҡшы эштән йыраҡ йөрөр.

⁵ Түшәктә лә тик яуызлыҡ уйлап ятыр, Ямандан күңеле ҡайтмаҫ, боҙоҡлоҡ юлына баҫыр.

⁶ Мөхәббәтең күктәргә йәйелә, Тоғролоғоң болоттарҙан аша.

⁷ Ғәҙеллегең тауҙар һымаҡ оло, Хаҡ хөкөмөң тәрән даръяларҙан. Кешене лә, хайуанды ла ҡурсалайһың.

⁸ Ниндәй ҡиммәт мөхәббәтең, эй Алла! Бәндәләрең ҡанатың аҫтында ышыҡ таба.

⁹ Йортоңдоң муллығы менән уларҙы туйындыраһың, Ләззәт шишмәңдән сарсауҙарын ҡандыраһың.

¹⁰ Сөнки йәшәү сығанағы – Һиндә, Һинең нурыңдан беҙ яҡтылыҡ алабыҙ.

¹¹ Һине танығандарға – мөхәббәтеңде, Саф йөрәклеләргә тоғролоғоңдо күрһәт.

¹² Тәкәбберҙәрҙең аяғы аҫтында ҡалмаһамсы, Ҡыуаламаһын мине залимдар ҡулы.

¹³ Күрҙем, яҙыҡ эш ҡылыусылар ҡоланы; Ергә ҡолатылдылар, башҡаса тора алмаҫтар.