Зәбүр 33 - Изге Яҙма

¹ Дауыттың мәҙхиәһе. Авимәләх алдында аҡылдан шашҡан булып ҡыланған һәм ҡыуылып китеп барған ваҡытында сығарылған.

(Алеф)

(Алеф)

² Гел генә Раббыға маҡтау-шөкөр яуҙырамын, Уны данлау телемдән һис төшмәй.

(Бейт)

(Бейт)

³ Бар күңелдән Раббы менән маҡтанамын, Иҙелгәндәр мине ишетеп шатланыр.

(Гимел)

(Гимел)

⁴ Ҙурлағыҙ минең менән бергә Раббыны, Бергәләшеп Уның исемен ҙурлайыҡ.

(Далеҫ)

(Далеҫ)

⁵ Раббынан ярҙам һораным – яуап бирҙе, Һәммә ҡурҡыуҙарҙан араланы.

(Һе)

(Һе)

⁶ Уға баҡҡандарҙың йөҙҙәре нур сәсә, Оятҡа ҡалып ҡыҙарынмаҫтар.

(Зайн)

(Зайн)

⁷ Мин фәҡирең Раббыға ялбарҙым, Ул мине ишетте, Бөтә бәләләрҙән әрсәләне.

(Хеҫ)

(Хеҫ)

⁸ Раббынан ҡурҡҡандарҙы Уның фәрештәһе Һәр яҡтан ҡамап торор һәм азат итер.

(Теҫ)

(Теҫ)

⁹ Татып ҡарағыҙ, күрегеҙ – Раббы ниндәй игелекле; Ниндәй бәхетле Уға һыйынған әҙәм!

(Йод)

(Йод)

¹⁰ Раббынан ҡурҡығыҙ, Уның изге бәндәләре, Унан ҡурҡҡандар мохтажлыҡ күрмәҫ.

(Каф)

(Каф)

¹¹ Йәш арыҫландар ҙа табышһыҙ, ас ҡалыр; Ә Раббыны эҙләгәндәр Бер ниндәй яҡшылыҡтан да ҡоро ҡалмаҫ.

(Ламед)

(Ламед)

¹² Эй балалар, килегеҙ, мине тыңлағыҙ: Һеҙҙе Раббынан ҡурҡырға, Уны хөрмәтләргә өйрәтәйем.

(Мем)

(Мем)

¹³ Әгәр кеше тормошонан ләззәт табып, Рәхәтлектә ғүмер итәм тиһә,

(Нун)

(Нун)

¹⁴ Телен яманлыҡтан тыйһын, Ауыҙын мәкер өсөн асмаһын.

(Самех)

(Самех)

¹⁵ Яуызлыҡтан тайпылһын, яҡшылыҡ ҡылһын; Тыныслыҡ эҙләһен, шуға ынтылһын.

(Ғайн)

(Ғайн)

¹⁶ Раббының күҙе төбәлгән тәҡүәләргә, Ҡолағы уларҙың ялбарыуҙарына асыҡ.

(Пе)

(Пе)

¹⁷ Раббының йөҙө яуызлыҡ ҡылғандарға асыулы баға – Ерҙә уларҙан хатта иҫтәлек тә ҡалдырмай.

(Саде)

(Саде)

¹⁸ Тәҡүәләр ялбарғанда Раббы ишетер, Уларҙы бар бәләләрҙән азат итер.

(Ҡоф)

(Ҡоф)

¹⁹ Раббы күңеле китек булғандарға яҡын, Ул рухы һынғандарҙы ҡотҡарыр.

(Реш)

(Реш)

²⁰ Тәҡүәләрҙең ҡайғылары күп булһа ла, Раббы барыһынан да ҡотҡарыр.

(Син менән Шин)

(Син менән Шин)

²¹ Уларҙың бөтә һөйәген һаҡлар, Һис береһе һындырылмаҫ.

(Тау)

(Тау)

²² Яуызға үҙ яманлығы үлем килтерер, Тәҡүәгә нәфрәт тотҡан бәндә язаға дусар булыр.

²³ Раббы ҡолдарының йәнен йолоп алыр, Уға һыйынған һәр берәү язанан ҡотолор.