Зәбүр 30 - Изге Яҙма

¹ Йырсылар етәксеһенә: Дауыттың мәҙхиәһе.

² Йә Раббы, Һиндә мин ышыҡ табам, Миңә оятҡа ҡалырға бирмә мәңге, Ғәҙеллегеңде күрһәт, йолоп ал!

³ Ҡолаҡ һал минең тарафҡа, йәһәтерәк ҡотҡар! Миңә һыйыныр ҡая бул, Ныҡлы ҡәлғә бул, йәшенеп ҡотолайым!

⁴ Ҡаям да Һин, ҡәлғәм дә Һин! Етәклә, исемең хаҡына юл күрһәт миңә.

⁵ Мин тик Һиндә генә ышыҡ табам, Сығарһана йәшерен ҡоролған тоҙаҡтарҙан.

⁶ Рухымды Һинең ҡулыңа тапшырам, Ҡотҡараһың мине, Раббы, тоғро Аллам!

⁷ Мәғәнәһеҙ боттарға табынғандарға нәфрәт тотам, Мин Раббыға инанамын.

⁸ Мин Һинең тоғро мөхәббәтеңә Шатланып күңел асырмын; Сөнки хәсрәтемде күрҙең, Йән ғазабымды беләһең.

⁹ Мине дошман ҡулына төшөрмәнең, Иркен ергә сығарып баҫтырҙың.

¹⁰ Әрнейем, йә Раббы, рәхимле бул, Ҡайғыларҙан күҙем тондо, Йәнем дә, тәнем дә ҡороп кипте.

¹¹ Ғүмерем ҡайғы-хәсрәттә, Йылдарым аһ-зар эсендә үтә. Гонаһтарҙан көсөм ҡаҡшап, Быуын-һөйәктәрем иреп төштө.

¹² Дошмандарым арҡаһында мин хур булдым, Хатта яҡындарым араһында. Мине күреп таныштарҙың ҡото оса, Урамда осрағандар боролоп ҡаса.

¹³ Үлеп, хәтерҙән юйылған бәндә һымаҡ онотолдом, Ватыҡ бер көршәккә оҡшап ҡалдым.

¹⁴ Бик күптәрҙең бышылдашҡанын ишетәм: Һәр яҡтан мине ҡурҡыныс урап алған, Миңә ҡаршы һүҙ ҡуйышалар, Йәнемде алыр өсөн мәкер ҡоралар.

¹⁵ Әммә өмөт-ышанысым Һиндә, Раббым; «Һин минең Алламһың!» – тип әйтәмен.

¹⁶ Минең тормошом Һинең ҡулыңда, Баҫтырған дошмандарҙан арала.

¹⁷ Йөҙөңдө ҡолоң тарафына бор; Тоғро мөхәббәтең менән ҡотҡар!

¹⁸ Оятҡа ҡалдырмаһаңсы, Раббы, Сөнки Һиңә һығынамын. Әйҙә яуыздар хурлыҡҡа ҡалһын, Үлеләр донъяһында өндәре тығылһын.

¹⁹ Ябылһын ул алдаҡсы ауыҙҙар; Тәҡүә бәндәгә ҡаршы Тәкәббер генә маһайып баҡҡан, Түбәнһетеп һөйләгәндәр телһеҙ ҡалһын.

²⁰ Игелегең ни тиклем мул, Раббы! Уны Үҙеңдән ҡурҡҡандарға һаҡлайһың, Барыһының күҙ алдында Яҡшылыҡ ҡылаһың үҙеңә һыйынғандарға.

²¹ Уларҙы кешеләр мәкеренән Хозурыңда йәшереп тотаһың; Яман телдәрҙән ҡурсалап, Ышығыңа һыйындыраһың.

²² Раббы мөбәрәк булһын! Сөнки ҡамауҙа ҡалған ҡалала Ғәжәйеп тоғро мөхәббәтен күрһәтте.

²³ Мин хафаға ҡалып әйттем: «Күҙ алдыңдан ситкә тибәрелдем!» Әммә Һине ярҙамға саҡырғас, Ялбарыуымды ишеттең.

²⁴ Яратығыҙ Раббыны, барса Уға тоғролар! Раббы Үҙенә тоғроларҙы ҡурсалар, Ә тәкәбберҙәргә әжерҙәрен ҡайтарыр.

²⁵ Эй һеҙ, кем Раббыға ышаныс бағлаған, Булығыҙ ҡеүәтле һәм ҡаһарман!