Зәбүр 29 - Изге Яҙма

¹ Дауыттың мәҙхиәһе. Ҡорамды изгеләндереү тантанаһында башҡарылған йыр.

² Эй Раббы, Һине ҙурлайым! Мине ҡәбер ауыҙынан тартып алдың, Дошмандарыма минән көлөргә юл ҡуйманың.

³ Эй Раббы Аллам, Һиңә ялбарҙым, Һин миңә шифа бирҙең.

⁴ Раббым, йәнемде гүрҙән сығарҙың, Йәшәү бирҙең, ҡәбергә төшөрмәнең.

⁵ Эй Раббының тоғро бәндәләре, Уға мәҙхиә йырлағыҙ. Мөҡәддәс исеменә рәхмәт уҡығыҙ.

⁶ Уның асыуы – бер мәлгә генә, Миһырбаны ғүмер буйы ҡалыр. Кисен күҙ йәшебеҙ аҡһа, Таң менән бергәләп шатлыҡ тыуыр.

⁷ Именлектә саҡта әйткән инем: «Инде һис ҡасан да сайҡалмаҫмын!»

⁸ Раббы, мине хуш күргән сағыңда Тау һымаҡ ҡаҡшамаҫ, ғорур иттең. Әммә йөҙөңдө йәшергәс, Мин йәнә хафаға ҡалдым.

⁹ Йә Раббым, Һине саҡырҙым, Бөйөк Хакимыма мәрхәмәт һорап ялбарҙым:

¹⁰ «Ни файҙа булыр Һиңә, түгелеп ҡаным, Үлем соҡорона әгәр төшһәм? Ҡәбер тупрағы Һине данлаймы? Һинең тоғролоғоң хаҡында һөйләйме?

¹¹ Ишет, Раббы, мәрхәмәт ҡыл миңә; Йә Раббы, ярҙамсы бул!» – тинем.

¹² Һыҡтауымды Һин бейеүгә әйләндерҙең, Хәсрәт кейемемде систерҙең дә Ҡыуаныс менән сорнаның.

¹³ Күңелем Һиңә һис тынмай дан йырлар. Эй Раббым Аллам, Һиңә мәңге шөкөрана ҡылырмын.