Зәбүр 28 - Изге Яҙма

1 Дауыттың мәҙхиәһе.

¹ Дауыттың мәҙхиәһе. Эй илаһи заттар, Раббыға лайыҡ булғанды бирегеҙ – Раббының ҡөҙрәте менән шөһрәтен танығыҙ!

² Раббы исеменең данын танығыҙ! Мөҡәддәс балҡышы хозурында Раббыға сәждә ҡылығыҙ!

³ Раббы ауазы һыуҙар өҫтөндә яңғырай, Күкрәй шөһрәтле Алла. Раббы даръя һыуҙары өҫтөндә гиҙә.

⁴ Раббы ауазы ҡеүәтле, Мәғрур Раббының ауазы.

⁵ Ул ауаз кедр ағастарын һындыра; Раббы Ливандың кедрҙарын ауҙара.

⁶ Ливан тауҙарын башмаҡтай, Сирйон тауын ҡырағай йәш үгеҙҙәй һикертә.

⁷ Раббының ауазы ут-ялҡын сығара;

⁸ Сүллекте тетрәтә Раббының ауазы, Ҡадеш сүлен дер һелкетә Раббы.

⁹ Раббы ауазы имәндәрҙе тетрәтә, Урмандарҙы япраҡһыҙ ҡалдыра. Ҡорамындағы һәммәһе ҡысҡыра: «Дан!»

¹⁰ Раббы даръя һыуҙары өҫтөндәге тәхетендә ултыра, Ул – мәңгелек Батша, тәхетендә ҡалыр.

¹¹ Раббы Үҙ халҡына ҡеүәт бирер, Ул халҡын именлек биреп фатихалар!