Зәбүр 23 - Изге Яҙма

1 Дауыттың мәҙхиәһе.

¹ Дауыттың мәҙхиәһе. Раббыныҡы ер йөҙө һәм ундағы бөтә нәмә, Раббыныҡы йыһан һәм ундағы бар тереклек.

² Ул ерҙең нигеҙен диңгеҙҙәр өҫтөндә ҡорған, Ағым һыуҙар өҫтөндә урынлаштырған.

³ Кем сыға алыр Раббы тауына? Мөҡәддәс урынында кем тора алыр?

⁴ Ҡулдары пак, йөрәге саф булған, Буш-юҡҡа күңел һалмаған, Ялған ант бирмәгән әҙәм.

⁵ Ул Раббының бәрәкәтен алыр, Ҡотҡарыусыһы Аллала аҡлау табыр.

⁶ Раббыны эҙләгәндәрҙең, Яҡуп Аллаһының хозурына килгәндәрҙең Заты бына шундай. Села

⁷ Ҡалҡытығыҙ башығыҙҙы, эй ҡапҡалар! Боронғо ишектәр, асылығыҙ! Шөһрәтле Батша эскә үтһен!

⁸ Кем ул был шөһрәтле Батша? Ул – көслө, ҡөҙрәтле Раббы, Алышта ҡеүәтле Раббы.

⁹ Ҡалҡытығыҙ башығыҙҙы, эй ҡапҡалар! Боронғо ишектәр, асылығыҙ! Шөһрәтле Батша эскә үтһен!

¹⁰ Кем ул был шөһрәтле Батша? Күк ғәскәрҙәре Раббыһы Ул – Был шөһрәтле Батша! Села