Зәбүр 148 - Изге Яҙма

¹ Раббыны данлағыҙ! Күктәрҙән маҡтау йырлағыҙ Раббыға, Юғарынан Уны күмегеҙ данға!

² Барса фәрештәләре, Уны маҡтағыҙ, Данлағыҙ Уны, бөтә ғәскәре!

³ Ҡояш менән ай, Уны маҡтағыҙ! Данлағыҙ Уны, балҡыу йондоҙҙар!

⁴ Эй күктәрҙең асманы, Раббыны маҡта! Күктәрҙән юғарылағы һыуҙар, Дан йырлағыҙ Уға!

⁵ Раббы исеменә маҡтау йырлаһындар, Сөнки Ул бойорҙо – улар барыһы бар булды.

⁶ Раббы уларҙы мәңгегә ныҡлап урынлаштырҙы, Бының өсөн боҙолмаҫ ҡағиҙә ҡуйҙы.

⁷ Ер йөҙөнән Раббыға маҡтау йырлағыҙ, Диңгеҙ йәнлектәре, тәрәнлектәр.

⁸ Уның ҡушҡанын үтәгән ут, боҙлауыҡ, Ҡар һәм томан, дауыллы ел,

⁹ Тауҙар, ҡалҡыулыҡтар, Емеш биреүсе ағастар, кедр,

¹⁰ Хайуандар, мал-тыуар, Һөйрәлеүселәр һәм ҡоштар,

¹¹ Ер йөҙөндәге батшалар, бар халыҡтар, Башлыҡтар һәм бөтә хакимдар,

¹² Йәш егеттәр менән ҡыҙҙар, Ҡарт-ҡоро һәм бала-саға

¹³ Раббы исеменә маҡтау яуҙырһындар, Сөнки бары Уның исеме юғары. Уның шөһрәте ер һәм күктәрҙән өҫтә.

¹⁴ Ул халҡына бөйөк ҡеүәт бирҙе, Уға тоғро бәндәләр барыһы, Ғәзиз халҡы Исраил Уны данлаһын. Раббыны данлағыҙ!