Зәбүр 138 - Изге Яҙма

1 Йырсылар етәксеһенә: Дауыттың мәҙхиәһе.

¹ Йырсылар етәксеһенә: Дауыттың мәҙхиәһе. Раббы, мине Үҙең күреп, һынап беләһең.

² Ҡасан ятып, ҡасан торғанымды беләһең, Уйҙарымды алыҫтан аңлап тораһың.

³ Йөрөйөммө, ял итәмме – ваҡ иләктән үткәрәһең, Һәр бер ғәмәлемә хәбәрең бар.

⁴ Һүҙем телемә килмәҫтән алда Эй Раббы, Һин һәммәһен беләһең.

⁵ Һәр яғымдан мине солғағанһың, Ҡулыңды миңә һалғанһың.

⁶ Был ғилемең хайран минең өсөн, Аң-зиһенем етмәҫлек юғары.

⁷ Ҡайҙа китәйем Рухыңдан, Ҡайҙа ҡасып була хозурыңдан?

⁸ Асманға ҡалҡһам, Һин унда, Үлеләр донъяһына түшәк йәйһәм, унда ла Һин.

⁹ Таң ҡанаттарында көнсығышҡа осһам, Диңгеҙ аръяғына ҡунһам,

¹⁰ Унда ла ҡулың етәкләп йөрөр, Уң ҡулың мине ныҡ тотоп торор.

¹¹ «Мине ҡараңғылыҡ йәшерһен, Яҡтылыҡ ҡара төнгә әйләнһен», – тиһәм,

¹² Хозурыңда ҡараңғылыҡ – ҡараңғылыҡ түгел, Төн дә көн кеүек нур сәсер, Көнмө, төнмө – Һинең өсөн бер үк.

¹³ Эс-бауырымды Һин яратҡанһың, Әсәм ҡарынында мине туҡығанһың.

¹⁴ Рәхмәттәрем яуһын Һиңә, Ниндәй ғәжәйеп, хайран яратылғанмын. Ҡайһылай хикмәтле ғәмәлдәр ҡылаһың! Быны бик яҡшы аңлайым.

¹⁵ Ер тәрәнлегендә туҡылғанымда, Серле рәүештә ҡиәфәт алғанымда, Һөйәктәрем Һинән йәшерен түгел ине.

¹⁶ Яралғы ғына сағымда Мине Үҙ күҙҙәрең менән күрҙең. Ғүмерем башланмаҫ элек Миңә тәғәйенләнгән һәр көн Һинең китабыңа теркәлгән.

¹⁷ Фекерҙәреңә иҫем-аҡылым етмәй, Эй Алла, уларҙың иҫәп-хисабы юҡ!

¹⁸ Һанай башлаһам, улар ҡом бөртөгөнән ишле. Уянып китһәм, мин һаман Һинең менән.

¹⁹ Эй Алла, яуыздарҙы юҡ итһәң ине, Минән алыҫ йөрөгөҙ, һеҙ, ҡан эскестәр!

²⁰ Улар Һиңә ҡаршы яманлыҡ тарата, Дошмандарың Һиңә ҡаршы мәкер ҡора.

²¹ Эй Раббы, Һиңә нәфрәтләнгәндәргә Мин нисек нәфрәт тотмайым? Һиңә ҡаршы баш күтәргәндәрҙән нисек ерәнмәйем?

²² Уларға ҡаршы мин ҡаты нәфрәтләнәм, Уларҙы үҙемә дошман итеп күрәм.

²³ Эй Алла, һына мине, йөрәгемдәген танып бел. Һына мине, бөтә уйҙарымды асыҡла.

²⁴ Ҡара, яман юлға төшмәнемме? Йүнәлт мине баҡыйлыҡ юлына!