Зәбүр 135 - Изге Яҙма

¹ Шөкөрана ҡылығыҙ Раббыға, Ул игелекле, Уның тоғро мөхәббәте мәңгелек.

² Шөкөр итегеҙ аллалар Аллаһына, Уның тоғро мөхәббәте мәңгелек.

³ Шөкөр итегеҙ хакимдар Хакимына, Уның тоғро мөхәббәте мәңгелек.

⁴ Бары Ул бөйөк мөғжизәләр ҡылыусы, Уның тоғро мөхәббәте мәңгелек.

⁵ Ул аҡылы менән күктәрҙе яратҡан, Уның тоғро мөхәббәте мәңгелек.

⁶ Ерҙе даръя һыуҙары өҫтөнә йәйгән, Уның тоғро мөхәббәте мәңгелек.

⁷ Бөйөк яҡтыртҡыстарҙы яратҡан, Уның тоғро мөхәббәте мәңгелек.

⁸ Ҡояшты көн менән идара итергә ҡуйған, Уның тоғро мөхәббәте мәңгелек.

⁹ Төн менән идара итер өсөн Ай һәм йондоҙҙарҙы ҡуйған, Уның тоғро мөхәббәте мәңгелек.

¹⁰ Ул мысырҙарҙың баш балаларын ҡырҙы, Уның тоғро мөхәббәте мәңгелек.

¹¹ Исраил нәҫелен Мысырҙан сығарҙы, Уның тоғро мөхәббәте мәңгелек.

¹² Ҡөҙрәте, һуҙылған ҡулы менән, Уның тоғро мөхәббәте мәңгелек.

¹³ Ҡамышлы диңгеҙҙе икегә айырҙы, Уның тоғро мөхәббәте мәңгелек.

¹⁴ Исраилдарҙы уртаһынан сығарҙы, Уның тоғро мөхәббәте мәңгелек.

¹⁵ Фирғәүен менән ғәскәрен диңгеҙгә батырҙы, Уның тоғро мөхәббәте мәңгелек.

¹⁶ Халҡын сүллек аша етәкләне, Уның тоғро мөхәббәте мәңгелек.

¹⁷ Бөйөк батшаларҙы тар-мар итте, Уның тоғро мөхәббәте мәңгелек.

¹⁸ Көслө батшаларҙы ҡырҙы, Уның тоғро мөхәббәте мәңгелек.

¹⁹ Әмөри батшаһы Сихонды юҡ итте, Уның тоғро мөхәббәте мәңгелек.

²⁰ Башан батшаһы Ғоғты тар-мар итте, Уның тоғро мөхәббәте мәңгелек.

²¹ Ерҙәрен биләмә итеп бирҙе, Уның тоғро мөхәббәте мәңгелек.

²² Ҡоло Исраилға милек итеп бирҙе, Уның тоғро мөхәббәте мәңгелек.

²³ Меҫкен хәлебеҙҙә хәтеренә алды, Уның тоғро мөхәббәте мәңгелек.

²⁴ Дошмандарыбыҙҙан йолоп алды, Уның тоғро мөхәббәте мәңгелек.

²⁵ Барса йән эйәләренә ризыҡ бирә, Уның тоғро мөхәббәте мәңгелек.

²⁶ Күктәрҙең Аллаһына шөкөр итегеҙ, Уның тоғро мөхәббәте мәңгелек.