Зәбүр 118 - Изге Яҙма

(Алеф)

(Алеф)

¹ Бәхетле пак юлдан йөрөгәндәр, Раббының ҡануны менән йәшәгәндәр.

² Бәхетле Уның күрһәтмәләрен тотҡандар, Бар булмышы менән Уны эҙләгәндәр!

³ Улар яман ғәмәл ҡылмаҫ, Раббы юлдарынан йөрөр.

⁴ Һин өгөт-нәсихәт бирҙең, Уларға тоғро булырға бойорҙоң.

⁵ Ҡағиҙәләреңә тоғро ҡалыр өсөн Тотҡан юлымда тәүәккәл булһам ине!

⁶ Бөтә бойороҡтарыңдан күҙемде алмаҫ, Шул ваҡытта һис оятҡа ҡалмаҫ инем.

⁷ Ғәҙел ҡарарҙарыңды өйрәнеп, Саф күңелдән Һиңә рәхмәттәр уҡырмын.

⁸ Һинең ҡағиҙәләреңде тотам, Мине һис ҡасан ташлама, Раббым!

(Бейт)

(Бейт)

⁹ Нисек юлын пак килеш һаҡлар йәш кеше? Бары Һинең һүҙҙәреңде тотоп ҡына.

¹⁰ Бөтөн булмышым менән Һине эҙләйем, Бойороҡтарыңдан тайпылырға юл ҡуйма!

¹¹ Һинең алдыңда гонаһлы булмаҫ өсөн, Һүҙҙәреңде йөрәгемдә һаҡлайым.

¹² Йә Раббы, Һин мөбәрәкһең! Миңә ҡағиҙәләреңде өйрәт.

¹³ Ауыҙыңдан сыҡҡан һәр ҡарарҙы Телем минең һөйләп торор.

¹⁴ Күрһәтмәләрең буйынса йәшәгәнемә һөйөнәм, Хазина тапҡандай булам.

¹⁵ Нәсихәттәрең тураһында уйланам, Юлдарыңдан күҙемде алмайым.

¹⁶ Ҡағиҙәләрең менән йыуанам, Әйткән һүҙҙәреңде онотмайым.

(Гимел)

(Гимел)

¹⁷ Мин ҡолоңа яҡшылыҡ ҡыл да йәшәйем, Әйткәндәреңә тоғро ҡалайым.

¹⁸ Күҙҙәремде ас, ҡануныңдың Мөғжизәләрен күрәйем.

¹⁹ Был донъяла мин мосафир ғына, Бойороҡтарыңды беләйемсе.

²⁰ Хаҡ хөкөмдәреңде көҫәп, Йәнем талсыға һәр ваҡыт.

²¹ Бойороҡтарыңдан тайпылған Ләғнәтле тәкәбберҙәрҙе ауыҙлыҡланың.

²² Хурлыҡ һәм кәмһетеүҙәрҙе өҫтөмдән ал, Сөнки күрһәтмәләреңде ғәмәлгә ашырам.

²³ Түрәләр йыйылып миңә мәкер ҡора, Ә мин, ҡолоң, ҡағиҙәләрең хаҡында уйланам.

²⁴ Өгөттәрең – минең һөйөнөсөм, Улар минең кәңәшселәрем.

(Далеҫ)

(Далеҫ)

²⁵ Хәлһеҙләнеп тупраҡҡа йығылдым, Вәғәҙәңә күрә ҡабаттан йәшәү бирһәңсе!

²⁶ Үткән юлдарымды һөйләнем, яуап ҡайтарҙың; Миңә ҡағиҙәләреңде өйрәт!

²⁷ Нәсихәттәреңдең асылына төшөндөр, Мөғжизәләрең хаҡында уйланайым.

²⁸ Хәсрәттән өҙөлә эс-бауырым, Вәғәҙәңә күрә, мине нығыт!

²⁹ Ялған юлдан мине йыраҡлаштыр, Илтифат менән миңә ҡануныңды өйрәт.

³⁰ Мин хәҡиҡәт юлын һайлап алдым, Ҡарар-хөкөмдәрең – йөрәгемдә.

³¹ Һинең күрһәтмәләреңә күңел бирҙем, Йә Раббы, оятҡа ҡалырға юл ҡуйма!

³² Һин бойорған юлдан йүгерәмен, Йөрәгемә төшөнөү бирәһең.

(Һе)

(Һе)

³³ Ҡағиҙәләрең ҡушҡан юлдан йөрөргә өйрәт, Раббы, Уларҙы мин һәр ваҡыт тотормон.

³⁴ Аҡыл бир миңә, ҡануныңды үтәрмен, Ысын күңелдән уны ғәмәлгә ашырырмын.

³⁵ Бойороҡтарың һуҡмағынан етәклә мине, Мин унан ләззәт табамын.

³⁶ Йөрәгем хәрәм малға әүрәмәһен, Уны күрһәтмәләреңә табан йүнәлт.

³⁷ Күҙҙәремде ығы-зығыларҙан биҙҙер, Мине Үҙ юлыңда йәшәт.

³⁸ Үҙеңдән ҡурҡҡандарға биргән һүҙеңде Мин ҡолоң өсөн бойомға ашыр.

³⁹ Үҙем ҡурҡҡан хурлыҡтан алыҫ тот мине, Ҡарар-хөкөмдәрең игелекле Һинең.

⁴⁰ Мин өгөт-нәсихәттәреңә сарсайым, Хаҡлығың солғанышында йәшәт!

(Уау)

(Уау)

⁴¹ Йә Раббы, мөхәббәтеңде күрһәт, Әйткәнеңә күрә ҡотҡар мине!

⁴² Шул саҡ мине хурлағанға Лайыҡлы яуап табырмын, Сөнки Һинең Һүҙеңә инанам.

⁴³ Хәҡиҡәт һүҙҙәрен ауыҙымдан тартып алма, Ҡарар-хөкөмдәреңә өмөт бағлайым.

⁴⁴ Мин Һинең ҡануныңа һәр ваҡыт, Мәңге-мәңге тоғролоҡ һаҡлармын.

⁴⁵ Иркенләп баҫып йөрөйөм, Сөнки өгөт-нәсихәттәреңде үтәргә тырышам.

⁴⁶ Күрһәтмәләрең хаҡында батшаларға һөйләрмен, Һис тә оялып тормаҫмын.

⁴⁷ Бойороҡтарың минең өсөн шатлыҡ, Мин бит улар менән зауыҡланам.

⁴⁸ Мин яратҡан бойороҡтарыңа табан ҡул һуҙам, Һинең ҡағиҙәләрең тураһында уйланам.

(Зайн)

(Зайн)

⁴⁹ Иҫеңдә тот мин ҡолоңа әйткән вәғәҙәңде, Уның менән миңә өмөт бирҙең.

⁵⁰ Ғазап сиккәндә ул йыуанысым минең, Һинең һүҙең миңә йәшәү бирә.

⁵¹ Хаяһыҙҙар мине бик хурланы, Әммә Һинең ҡануныңдан тайпылманым.

⁵² Боронғонан килгән ҡарар-хөкөмдәреңде, йә Раббы, Хәтерләйем, уларҙан йыуаныс табам.

⁵³ Ҡануныңды ташлаған яуыздарҙы күрһәм, Мине ярһыу биләп ала.

⁵⁴ Мин килмешәк булып ғүмер һөргән ерҙә Ҡағиҙәләрең минең өсөн йыр кеүек.

⁵⁵ Төндәрен исемеңде ҡабатлайым, йә Раббы, Һинең ҡануныңа тоғро ҡалам.

⁵⁶ Был минең ғәҙәтемә әйләнде, Ҡағиҙә-ҡанундарыңды ғәмәл ҡылам.

(Хеҫ)

(Хеҫ)

⁵⁷ Йә Раббы, Һин – минең насибым, Һүҙеңдән сыҡмаҫҡа вәғәҙә бирәм.

⁵⁸ Һиңә бар булмышым менән доға ҡылам, Вәғәҙәңә күрә ҡыҙған мине.

⁵⁹ Тотҡан юлым хаҡында уйландым, Аҙымымды күрһәтмәләреңә күрә баҫам.

⁶⁰ Бойороҡтарыңды үтәргә ашығамын, Оҙон-оҙаҡҡа һуҙманым.

⁶¹ Залимдар мине арҡан менән сорнаны, Әммә Һинең ҡануныңды онотмайым.

⁶² Һинең ғәҙел хөкөмдәрең өсөн Төн уртаһында тороп та шөкөр ҡылам.

⁶³ Һинән ҡурҡҡандар, хөрмәт иткәндәр, Нәсихәттәреңә тоғролар менән мин дуҫмын.

⁶⁴ Ер йөҙө тоғро мөхәббәтең менән тулы, йә Раббы, Ҡағиҙәләреңде өйрәт миңә!

(Теҫ)

(Теҫ)

⁶⁵ Йә Раббы, биргән вәғәҙәңә тоғро ҡалып, Мин ҡолоңа күп яҡшылыҡ ҡылдың.

⁶⁶ Миңә зиһен һәм белем бир, Раббы, Һинең бойороҡтарыңа ышанам.

⁶⁷ Ғазапҡа тарығаныма тиклем аҙашҡанмын, Ә хәҙер Һинең һүҙеңде ныҡ тотам.

⁶⁸ Һин миһырбанлы, ғәмәлең игелекле, Мине ҡағиҙәләреңә өйрәт.

⁶⁹ Тәкәбберҙәр миңә яла яға, Әммә мин бөтөн булмышым менән Ҡағиҙә-ҡанундарыңды бойомға ашырам.

⁷⁰ Уларҙың йөрәктәрен май бөргән, Ә мин иһә ҡануныңдан зауыҡ алам.

⁷¹ Ғазап сигеүем тик яҡшыға булды, Һинең ҡағиҙәләреңде өйрәндем.

⁷² Ауыҙыңдан сыҡҡан ҡанун минең өсөн Меңәрләгән алтын-көмөштән ҡиммәтерәк.

(Йод)

(Йод)

⁷³ Һинең ҡулдарың яратҡан мине, бар ҡылған, Инде бойороҡтарыңды өйрәнергә зирәклек бир.

⁷⁴ Һинән ҡурҡҡандар мине күреп ҡыуанһын, Сөнки мин Һинең һүҙеңә өмөт бағлайым.

⁷⁵ Беләм, Раббы, хөкөмдәрең ғәҙел, Миңә яза биргәнеңдә Һин хаҡ инең.

⁷⁶ Мин ҡолоңа биргән вәғәҙәңә күрә, Тоғро мөхәббәтең йыуанысым булһын.

⁷⁷ Миңә шәфҡәтле бул һәм йәшәйем, Ҡануның Һинең – ләззәтем сығанағы.

⁷⁸ Мине сәбәпһеҙ рәнйеткән өсөн Хаяһыҙҙар оятҡа ҡалһындар, Ә минең уйымда Һинең өгөт-нәсихәтең булыр.

⁷⁹ Эргәмә Һинән ҡурҡҡандар, Күрһәтмәләреңде белгәндәр йыйылһын.

⁸⁰ Мәсхәрәгә тороп ҡалмаҫ өсөн, Йөрәгем ҡағиҙәләреңә күрә камил булһын.

(Каф)

(Каф)

⁸¹ Ҡотҡарыуыңды көҫәп эсем өҙөлә, Әйткән һүҙеңә өмөт бағлайым.

⁸² Вәғәҙәңде көтә-көтә күҙ нурҙарым бөтә, Ҡасан мине тынысландырырһың?

⁸³ Төтөндә ҡарайып, кибеп бөткән турһыҡ һымаҡ булдым, Шул хәлдә лә ҡағиҙәләреңде онотманым.

⁸⁴ Мин ҡолоңа әле оҙаҡ көтөргәме? Йәберләүселәремде ҡасан хөкөм итерһең?

⁸⁵ Тәкәбберҙәр миңә соҡор ҡаҙынылар, Улар Һинең ҡануныңа буйһонмайҙар.

⁸⁶ Һинең бөтә бойороҡтарың – ышаныслы, Мине нахаҡҡа эҙәрләйҙәр, ярҙам ит!

⁸⁷ Саҡ ҡалдылар мине ер йөҙөнән юҡ итмәйсә; Әммә нәсихәттәреңде ташламаным.

⁸⁸ Тоғро мөхәббәтеңә күрә йәшәү бир миңә, Ауыҙыңдан сыҡҡан күрһәтмәләреңә тоғро ҡалайым.

(Ламед)

(Ламед)

⁸⁹ Йә Раббы, Һинең һүҙең мәңгелек, Ул күктәрҙә һис ҡаҡшауһыҙ тора.

⁹⁰ Тоғролоғоң быуындан-быуынға дауам итә; Ерҙе Һин урынлаштырҙың һәм ул ныҡ тора.

⁹¹ Һинең ҡарарҙарыңа буйһонғанға күрә, Бар нәмә хәҙергә тиклем тора, Һиңә хеҙмәт итә.

⁹² Әгәр ҡануның миңә ләззәт булмаһа, Күптән инде хәсрәтемдән үлер инем.

⁹³ Ҡағиҙә-ҡанундарыңды бер ваҡытта ла онотмам, Сөнки улар менән мине йәшәтәһең.

⁹⁴ Мин – Һинеке, мине ҡотҡарһана, Өгөт-нәсихәттәреңә ынтыламын.

⁹⁵ Залимдар мине һәләк итер өсөн һағалай, Мин иһә күрһәтмәләрең хаҡында фекер йөрөтәм.

⁹⁶ Күрҙем: һәр камиллыҡтың сиге бар, Тик ҡануның ғына икһеҙ-сикһеҙ.

(Мем)

(Мем)

⁹⁷ Нисек яратам мин ҡануныңды! Көн оҙоно уның хаҡында уйлайым.

⁹⁸ Бойороҡтарың дошмандарымдан аҡыллы итә, Улар мәңге минең менән.

⁹⁹ Күрһәтмәләрең хаҡында фекер йөрөткәнгә, Барса остаздарымдан зирәгерәк булдым.

¹⁰⁰ Аҡһаҡалдарҙан зиһенлерәкмен, Сөнки Һинең нәсихәттәреңә таянам.

¹⁰¹ Һинең һүҙҙәреңә тоғро ҡалам, Яман юлға аяғымды баҫмам.

¹⁰² Хөкөмдәреңдән айырылмам, Сөнки мине Һин Үҙең өйрәттең.

¹⁰³ Ауыҙымда һүҙҙәреңдең тәме, Улар минең өсөн балдан татлы!

¹⁰⁴ Нәсихәттәреңдән аҡыл йыям, Шуға ла һәр төрлө ялған юлды күрә алмайым.

(Нун)

(Нун)

¹⁰⁵ Һинең һүҙең аҙымдарым өсөн сыраҡ, Юлыма нур сәскән яҡтылыҡ.

¹⁰⁶ Ғәҙел хөкөмдәреңде һаҡларға ант иттем, Биргән һүҙемдә торормон.

¹⁰⁷ Эй Раббым, мин күп ғазаптар сиктем, Вәғәҙәңә күрә йәнемде һаҡла.

¹⁰⁸ Эй Раббым, ауыҙымдан сыҡҡан һүҙҙәремде Ихлас ҡорбандар һымаҡ ҡабул ит, Миңә хөкөм-ҡарарҙарыңды өйрәт.

¹⁰⁹ Тормошом гел хәүеф аҫтында булһа ла, Һинең ҡануныңды онотмайым.

¹¹⁰ Залимдар миңә тоҙаҡ ҡорҙолар, Әммә нәсихәттәреңдән тайпылманым.

¹¹¹ Күрһәтмәләреңде мәңгелек мираҫҡа алдым, Улар йөрәгемдең һөйөнөсө.

¹¹² Ғүмеремдең һуңғы көндәренә саҡлы Ҡағиҙәләрең буйынса йәшәргә тип, Бар күңелемдән ынтылам.

(Самех)

(Самех)

¹¹³ Ике йөҙлө әҙәмдәрҙе күрә алмайым, Ә Һинең ҡануныңды яратам.

¹¹⁴ Һин – һыйыныр ышығым, ҡалҡаным, Һинең һүҙҙәреңә өмөт тотам.

¹¹⁵ Йыраҡ тороғоҙ минән, яуыздар, Алламдың бойороҡтарын ғәмәлгә ашырам.

¹¹⁶ Вәғәҙәңә күрә миңә терәк бул – йәшәрмен, Өмөтөм бушҡа сыҡмаһын, оятҡа ҡалдырма!

¹¹⁷ Таяныс бул миңә, ҡотолайым, Ҡағиҙәләреңде һәр ваҡыт күҙ уңында тотормон.

¹¹⁸ Ҡағиҙәләреңдән тайпылғандарҙы Үҙеңдән ситкә тибәһең, Уларҙың мәкер-хәйләһе тик бушҡа ғына.

¹¹⁹ Донъялағы яуыздарҙы сүп-сарҙай һепереп түгәһең, Шуға ла нәсихәттәреңде яратам.

¹²⁰ Бөтөн тәнем ҡалтырана дәһшәтеңдән, Ныҡ ҡурҡам хөкөмдәреңдән.

(Ғайн)

(Ғайн)

¹²¹ Мин ғәҙел һәм тоғро эштәр ҡылдым, Ташлама иҙеүселәр ҡулына!

¹²² Ҡолоңдоң именлеген тәьмин ит, Раббы, Хаяһыҙ бәндәләр яфалай алмаһын.

¹²³ Күҙҙәремдең нуры һүнер инде Ҡотҡарыуыңды, хаҡ һүҙеңдең ғәмәлгә ашыуын көтөп.

¹²⁴ Тоғро мөхәббәтеңә күрә эш ит ҡолоң менән, Ҡағиҙәләреңде миңә өйрәт.

¹²⁵ Мин һинең ҡолоңмон, бирсе зиһен, Нәсихәттәреңде аңлар өсөн.

¹²⁶ Эй Раббы, сара күрер ваҡыт етте, Һинең ҡануныңды боҙҙолар.

¹²⁷ Ә мин Һинең бойороҡтарыңды Алтындан, саф алтындан нығыраҡ яратам.

¹²⁸ Һинең нәсихәттәреңә күрә тура барам, Һәр бер ялған юлға нәфрәтләнәм.

(Пе)

(Пе)

¹²⁹ Һинең күрһәтмәләрең ғәжәйеп, Шуға күрә уларға буйһонам.

¹³⁰ Һүҙҙәрең асылыуҙан нурҙар тарала, Бер ҡатлыларҙы аҡылландыра.

¹³¹ Ауыҙымды асып ауыр һулыш алам, Сөнки әмерҙәреңә сарсаным.

¹³² Миңә борол да мәрхәмәтеңде ҡыл, Һин бит исемеңде яратҡандарға гел шәфҡәтлеһең.

¹³³ Биргән вәғәҙәңә күрә аҙымымды нығыт, Һис бер гонаһ миңә хужа була алмаһын.

¹³⁴ Кешенең иҙеүенән йолоп ал мине, Һинең нәсихәттәреңде тотайым.

¹³⁵ Йөҙөң мин ҡолоңа нурын сәсһен, Ҡағиҙәләреңде өйрәт миңә.

¹³⁶ Күҙҙәремдән йылғалай йәш аға, Сөнки кешеләр буйһонмай ҡануныңа.

(Саде)

(Саде)

¹³⁷ Эй Раббым, Һин – хаҡлыҡ эйәһе, Хөкөмдәрең ғәҙел Һинең.

¹³⁸ Тәғәйенләгән күрһәтмәләрең дөрөҫ, Улар тулыһынса ышаныслы.

¹³⁹ Дошмандарым һүҙҙәреңде онотҡанға Асыуым яндырып-өтөп бара.

¹⁴⁰ Утҡа һалып сафландырғандай пак һүҙең, Мин ҡолоң уларҙы бик яратам.

¹⁴¹ Түбәнһетелһәм дә, хурланһам да, Нәсихәттәреңде онотмайым.

¹⁴² Ғәҙеллегең мәңгегә хаҡ, Ҡануның Һинең – хәҡиҡәт.

¹⁴³ Бәлә-ҡазаға тарыған саҡта, Бойороҡтарыңдан мин ләззәт табам.

¹⁴⁴ Күрһәтмәләреңдең хаҡлығы мәңгелек, Зирәклек бир миңә һәм йәшәрмен.

(Ҡоф)

(Ҡоф)

¹⁴⁵ Бар булмышым менән ялбарам, яуапла, Раббы! Ҡағиҙәләреңә буйһонормон.

¹⁴⁶ Һине саҡырамын, ҡотҡар мине, Нәсихәттәреңә тоғро ҡалайым.

¹⁴⁷ Таң һыҙылғандан алда торам да Ярҙам ялбарып Һине саҡырам, Сөнки биргән һүҙеңә өмөт бағлайым.

¹⁴⁸ Әйткәнеңде тәрән аңлайым тип, Таңғаса күҙемде йоҡо алмай.

¹⁴⁹ Тоғро мөхәббәтең хаҡына ауазыма ҡолаҡ һал, Йә Раббым, ғәҙеллегең менән йәнемде һаҡла!

¹⁵⁰ Мәкер ҡороусылар миңә яҡынлашты, Улар Һинең ҡануныңдан алыҫ тора.

¹⁵¹ Һин иһә, йә Раббы, янымдаһың, Бөтә бойороҡтарың – хәҡиҡәт.

¹⁵² Күптән белдем күрһәтмәләреңдән, Уларҙы мәңгелеккә биргәнһең.

(Реш)

(Реш)

¹⁵³ Ғазап сиккәнемде күр, мине ҡотҡар, Мин бит Һинең ҡануныңды онотмайым.

¹⁵⁴ Дәғүәмдә мине яҡла, ҡотҡарып ал, Вәғәҙәңә күрә, йәнемде һаҡла.

¹⁵⁵ Яуыздар ҡотолоуҙан йыраҡ тора, Сөнки улар ҡағиҙәләреңә эйәрмәйҙәр.

¹⁵⁶ Рәхим-шәфҡәтең киң, йә Раббым, Ғәҙеллегең менән йәнемде һаҡла!

¹⁵⁷ Мине эҙәрләүсе дошмандар күп, Әммә мин нәсихәттәреңдән тайпылмайым.

¹⁵⁸ Мөртәттәргә ерәнеп ҡарайым, Улар Һинең һүҙҙәреңде тотмай.

¹⁵⁹ Ҡараһаңсы, ни тиклем яратам нәсихәттәреңде, Тоғро мөхәббәтең хаҡына һаҡла йәнемде.

¹⁶⁰ Һинең һүҙең – хәҡиҡәттең үҙе, Һәр бер ғәҙел хөкөмөң мәңгелек.

(Син менән Шин)

(Син менән Шин)

¹⁶¹ Түрә-хакимдар мине бер ғәйепһеҙгә эҙәрләй, Әммә йөрәгем Һинең һүҙеңдән генә ҡалтырай.

¹⁶² Оло хазина тапҡан кешеләй, Һинең һүҙеңә ҡыуанам.

¹⁶³ Нәфрәтләнәм, ерәнәм ялғандан, Һинең ҡануныңды иһә яратам.

¹⁶⁴ Һине ғәҙел хөкөм-ҡарарҙарың өсөн Көнөнә етешәр мәртәбә данлайым.

¹⁶⁵ Ҡануныңды яратҡандар бөйөк именлеккә эйә булыр, Һис бер нәмә уларға ҡаршылыҡ булмаҫ.

¹⁶⁶ Раббы, ҡотҡарыуыңа өмөт бағлайым, Бойороҡтарыңды бойомға ашырам.

¹⁶⁷ Нәсихәттәреңде күңел түремдә һаҡлайым, Уларҙы мин ифрат яратам.

¹⁶⁸ Нәсихәт һәм күрһәтмәләреңде тотам, Йөрөр юлдарым Һинең күҙең алдыңда.

(Тау)

(Тау)

¹⁶⁹ Ялбарыуым хозурыңа етһен, Раббы, Биргән вәғәҙәңә күрә аҡыл бир миңә!

¹⁷⁰ Ялбарыуҙарым һиңә олғашһын, Биргән вәғәҙәң хаҡына ҡотҡар!

¹⁷¹ Ауыҙымдан Һиңә маҡтауым түгелһен, Һин бит миңә ҡағиҙәләреңде өйрәтәһең.

¹⁷² Телем Һинең һүҙҙәреңде һөйләр, Сөнки бөтә бойороҡтарың ғәҙел.

¹⁷³ Ҡулың ярҙамға әҙер булһын, Мин нәсихәттәрең буйынса йәшәүҙе һайланым.

¹⁷⁴ Ҡотҡарыуыңа сарсаным, Раббым, Ҡануныңдан Һинең ләззәт табам.

¹⁷⁵ Ғүмер бир миңә, Һиңә маҡтау яуҙырайым, Ҡарар-хөкөмдәрең миңә ярҙам бирһен.

¹⁷⁶ Юғалған һарыҡтай аҙаштым, Мине, Үҙеңдең ҡолоңдо, эҙләп тап, Сөнки бойороҡтарыңды мин онотманым.