Зәбүр 113 - Изге Яҙма

¹ Исраил халҡы – Мысырҙан, Яҡуп нәҫеле ят ҡәүем араһынан сыҡҡас,

² Йәһүҙә – Раббының мөҡәддәс ере, Исраил Раббының биләмәһе булды.

³ Диңгеҙ уларҙы күрҙе лә ҡасты, Иордан кирегә аҡты.

⁴ Тауҙар һарыҡ тәкәләре һымаҡ, Түбәләр бәрәстәй һикереште.

⁵ Эй диңгеҙ, һиңә ни булды, ниңә ҡастың? Иордан, нишләп кирегә аҡтың?

⁶ Эй тауҙар, ниңә тәкәләр ише, Түбәләр бәрәстәй һикереште?

^7-8 Эй ер йөҙө, бөйөк Хакимың алдында, Ҡая ташты күлгә әйләндергән, Саҡматашты шишмә иткән Раббы, Яҡуп Аллаһы алдында тетрә.

⁹ Беҙҙе түгел, Раббы, беҙҙе түгел, Мөхәббәтең менән тоғролоғоң хаҡына Һин Үҙеңдең исемеңде данла!

¹⁰ Ни өсөн ҡәүемдәргә: «Ҡайҙа уларҙың Аллаһы?» – тиергә?

¹¹ Беҙҙең Аллабыҙ – күктәрҙә, Нимә теләй, шуларҙың барыһын ғәмәл ҡыла.

¹² Ә ҡәүемдәрҙең боттары – алтын-көмөш, Кеше ҡулы менән яһалған.

¹³ Ауыҙҙары бар ҙа, һөйләшмәйҙәр, Күҙҙәре бар, әммә күрмәйҙәр;

¹⁴ Ҡолаҡтары бар ҙа, ишетмәйҙәр, Танауҙары бар ҙа, еҫ һиҙмәйҙәр;

¹⁵ Ҡулдары бар ҙа, тоя алмайҙар, Аяҡтары бар, йөрөй алмайҙар; Тамаҡтарынан тауыш сыҡмай.

¹⁶ Кем уларҙы яһаған, Уларға өмөт бағлаған – барыһы ла Шул боттарға оҡшап ҡалыр!

¹⁷ Эй Исраил, өмөтөңдө бағла Раббыға, Ул – ярҙамсыбыҙ һәм ҡалҡаныбыҙ!

¹⁸ Эй Һарун нәҫеле, өмөтөңдө бағла Раббыға, Ул – ярҙамсыбыҙ һәм ҡалҡаныбыҙ!

¹⁹ Раббынан ҡурҡҡандар, Раббыға өмөт бағлағыҙ, Ул – ярҙамсыбыҙ һәм ҡалҡаныбыҙ!

²⁰ Раббы беҙҙе онотмай, фатиха бирә, Исраил халҡын, Һарун нәҫелен фатихалай.

²¹ Үҙенән ҡурҡҡандарҙың олоһон да, кесеһен дә, Барыһын да фатихалай.

²² Раббы һеҙҙе лә, балаларығыҙҙы ла арттырһын!

²³ Күкте лә, ерҙе лә бар ҡылған Раббы Һеҙгә фатихаһын бирһен.

²⁴ Раббы күкте Үҙенеке иткән, Әммә ерҙе кешеләргә биргән.

²⁵ Үлектәр, өнһөҙлөк донъяһына төшкәндәр, Раббыны данламаҫ;

²⁶ Беҙ иһә Раббыны хәҙер ҙә, Мәңге лә данларбыҙ. Раббыны данлағыҙ!