Зәбүр 112 - Изге Яҙма

¹ Раббыны данлағыҙ! Эй Раббы ҡолдары, Раббыны данлағыҙ, Раббының исемен данлағыҙ!

² Раббының исеме хәҙер ҙә, Мәңге лә мөбәрәк булһын!

³ Көнсығыштан көнбайышҡа тиклем Раббының исеме данланып торһон!

⁴ Раббы бар халыҡтарҙан да өҫтөн, Шөһрәте күктәрҙән юғарыраҡ.

⁵ Кем беҙҙең Аллабыҙ Раббыға оҡшаш? Ул юғарыла тәхет ҡорған.

⁶ Ул күккә һәм ер йөҙөнә эйелеп ҡарай.

⁷ Ул ярлыны тупраҡтан күтәрә, Хәйерсене сүплектән ҡалҡыта,

⁸ Уға башлыҡтар янында урын бирә, Халҡының түрәләре менән бергә ултырта.

⁹ Түлһеҙ ҡатынды, ғаиләле, Бала һөйгән бәхетле әсә итә. Раббыны данлағыҙ!