Зәбүр 103 - Изге Яҙма

¹ Шөкөрана ҡыл Раббыға, йәнем! Эй Раббым, Аллам! Һин ниндәй бөйөк, Дәрәжә менән шөһрәткә сорналғанһың.

² Нурға кейем һымаҡ төрөнгәнһең, Күктәрҙе сатыр кеүек киргәнһең.

³ Йортоңдо юғарылағы һыуҙар өҫтөнә ҡорғанһың, Болоттарҙы Үҙенә арба итәһең, Елдең ҡанаттарында гиҙәһең.

⁴ Елдәрҙе Үҙеңә – илсе, Ялҡынланған утты хеҙмәтселәрең итәһең!

⁵ Ер йөҙөн ныҡлы нигеҙгә ҡуйҙың, Бер ваҡытта ла һелкенмәҫ, тинең.

⁶ Һин уны, кейемгә төргән һымаҡ, Төпһөҙ даръя менән ҡаплағанһың, Хатта тау түбәләрен дә һыуҙар күмгән.

⁷ Дәһшәтле ауазыңдан һыуҙар сигенгән, Күкрәгәнеңдән ҡурҡып ашыҡҡан.

⁸ Тауҙар өҫтөнән, үҙәндәр буйлап, Һин уларға тәғәйен иткән ергә аҡҡан.

⁹ Һин билдәләгән сиктән үтмәҫтәр, Инде ташып донъяны баҫмаҫтар.

¹⁰ Яландарҙа шишмәләр урғылттың; Уларҙы тауҙар араһынан ағыҙҙың.

¹¹ Бөтөн кейек-януарҙарҙы һуғаралар; Ҡырағай ишәктәр һыуһын ҡандыралар.

¹² Ярҙарында оя ҡора ҡоштар, Ботаҡтарға ҡунып һайрашалар.

¹³ Юғарылағы йортоңдан тауҙарҙы Һин һуғараһың, Эштәреңдең емештәре менән донъя тултыраһың.

¹⁴ Мал-тыуарҙар өсөн – үлән, Кешенең ихтыяжына иген үҫтерәһең, Тупраҡтан ризыҡ алһындар, тиһең.

¹⁵ Күңелдәрҙе күтәргән шарапты, Йөҙҙәрҙе ялтыратҡан зәйтүн майын, Тәнгә ҡеүәт өҫтәр икмәкте бирәһең.

¹⁶ Туйғансы һыу эсер Раббы ағастары, Ул Ливанда ултыртҡан кедрҙар.

¹⁷ Ҡоштар унда ояларын ҡора, Шыршылар – ҡауҙылар өсөн төйәк.

¹⁸ Бейек тауҙар – ҡыр кәзәләренә, Таш ҡаялар – дамандарға ышыҡ.

¹⁹ Ваҡытты билдәләү өсөн айҙы яратҡан, Ҡояш та ҡасан байырын белә.

²⁰ Төн булһын тип эңер төшөрәһең, Ҡырағай йәнлектәр ҡыҙырырға сыға.

²¹ Арыҫландар ырылдап ауға йүнәлә, Алла ебәргән ризыҡты эҙләй.

²² Ҡояш ҡалҡҡас, улар кире ҡайта, Үҙҙәренең өңдәрендә ята.

²³ Кеше үҙенең эшенә китә, Ҡара кискә тиклем хеҙмәт итә.

²⁴ Йә Раббы, Һинең ижад емешең төрлө-төрлө! Барыһын аҡыллы яратҡанһың; Ер йөҙө тулы Һин бар ҡылған менән.

²⁵ Бына икһеҙ-сикһеҙ тәрән диңгеҙ, Унда ҡайнаша һанһыҙ мәхлүктәр, Эреле-ваҡлы йәнлектәр;

²⁶ Унда караптар йөҙәләр, Һин бар ҡылған Ливъяҫан уйнаҡлап йөрөй.

²⁷ Улар һәммәһе лә Һине көтә, Ваҡытында ашарға бирер, тип өмөт итә.

²⁸ Ем бирәһең – туҡланалар, Усыңды асһаң – рәхәтләнеп туйыналар.

²⁹ Йөҙ йәшерһәң, ҡурҡыуға ҡалалар; Һин һулыштарын алһаң, үләләр, Йәнә тупраҡҡа ҡайталар.

³⁰ Рухыңды ебәргәндә улар бар була, Ер йөҙөн Һин шулай яңыртаһың.

³¹ Мәңге йәшәһен Раббы шөһрәте! Һөйөнһөн Раббы ижадының емештәренә!

³² Ул ҡараһа, ер тетрәр Ул ҡағылһа, тауҙар төтәр.

³³ Раббыма ғүмерем буйы мәҙхиә йырлармын, Бар сағымда Аллама маҡтау яуҙырырмын.

³⁴ Уйҙарым Уның күңеленә хуш килә күрһен, Раббым – ҡыуанысым булһын!

³⁵ Бөтһөн был донъяла гонаһлылар, Башҡаса булмаһындар залимдар! Шөкөрана ҡыл Раббыға, йәнем! Раббыны данлағыҙ!