Зәбүр 100 - Изге Яҙма

1 Дауыттың мәҙхиәһе.

¹ Дауыттың мәҙхиәһе. Мөхәббәтең менән ғәҙеллегеңде көйгә һалырмын, Һиңә, Раббым, мәҙхиә йырлармын.

² Минең бар уйым – камил юлдар хаҡында. Ҡасан килерһең минең яныма? Саф күңел менән ғүмер итермен өйөмдә,

³ Бер ниндәй ҙә яуызлыҡҡа юл ҡуймамын, Ҡырын эштәргә нәфрәт тотормон, Улар миңә йоға алмаҫ һис ҡасан.

⁴ Йыраҡ булыр минән боҙоҡ күңел, Ә залимлыҡ – белгән-түҙгән нәмәм түгел.

⁵ Ҡыуалармын яҡынына йәшерен яла яҡҡанды, Түҙеп тормам тәкәббергә, өҫтән аҫҡа баҡҡанға.

⁶ Күҙем булыр илдәге тоғроларҙа, Тик шундайҙар минең янда йәшәйәсәк. Бары дөрөҫ юлдан йөрөгәндәр Миңә хеҙмәт күрһәтәсәк.

⁷ Өйөмдә мәкерлегә урын булмаҫ, Ялған ауыҙ күҙ алдымда оҙаҡ тормаҫ.

⁸ Иртә һайын илдәге яуыздарҙы юҡ итермен, Яман эш ҡылыусыларҙы Раббы ҡалаһынан йолҡоп ырғытырмын.