Сығыу 40 - Изге Яҙма

Изге сатырҙы ҡороу һәм изгеләндереү

¹ Раббы Мусаға былай тине:

² – Беренсе айҙың тәүге көнөндә Изге торлаҡты – Осрашыу сатырын ҡор.

³ Уның эсенә Килешеү һандығын индер ҙә уны пәрҙә менән ҡапла.

⁴ Шунан өҫтәл индер һәм өҫтөнә бөтә кәрәкле әйберҙәрҙе теҙеп ултырт. Шәмдәл килтер һәм майшәмдәрен ҡуй.

⁵ Хуш еҫ төтәтә торған алтын ҡорбан усағын Килешеү һандығы алдына урынлаштыр. Изге торлаҡ ауыҙына ҡорма эл.

⁶ Ҡорбан яндырыу өсөн тәғәйенләнгән ҡорбан усағын Осрашыу сатыры алдына урынлаштыр.

⁷ Сатыр менән ҡорбан усағы араһына йыуынғыс ҡуй һәм унда һыу тултыр.

⁸ Сатырҙы уратып ихата ҡор, ихата ҡапҡаһына ҡорма эл.

⁹ Шунан мәсех майы ал да Изге сатырға һәм ундағы бар нәмәгә һөрт: сатырҙы һәм уның барса йыһаздарын изгеләндер – улар изге булыр.

¹⁰ Шулай уҡ тотош яндырыу ҡорбаны усағына һәм уның бөтә йыһаздарына май һөрт: ҡорбан усағын изгеләндер – ул изгеләрҙән-изге булыр.

¹¹ Йыуынғысҡа һәм уның таяуына май һөрт – уларҙы изгеләндер.

¹² Һарун менән улдарын Осрашыу сатыры алдына килтер ҙә һыу менән ҡойондор.

¹³ Һарунға изге кейемдәрен кейҙер һәм май һөртөп мәсехлә. Минең ҡаһиным булһын өсөн, уны изгеләндер.

¹⁴ Улдарын килтер, уларға күлдәк кейҙер.

¹⁵ Минең ҡаһиндарым булһын өсөн уларға ла, аталарына һөрткән һымаҡ, май һөрт. Шулай итеп, улар быуындан-быуынға мәңге күсеп бара торған ҡаһинлыҡҡа бағышланыр.

¹⁶ Муса бөтәһен дә Раббы ҡушҡанса эшләне.

¹⁷ Икенсе йылдың беренсе айының тәүге көнөндә Изге торлаҡ ҡоролдо.

¹⁸ Муса сатырҙы ҡорҙо: төптәрен ҡуйҙы, уларҙың өҫтөнә һайғауҙар менән тоташтырып рамдарын тыҡты, бағаналар ҡаҡты,

¹⁹ япмаларын япты, ә өҫтән, үҙенә Раббы ҡушҡанса, өҫкө япма менән ҡапланы.

²⁰ Муса килешеү таҡтаташтарын алып килеп һандыҡ эсенә һалды. Һандыҡҡа ҡолғаларҙы беркетеп, өҫтөнә ҡапҡасын ҡуйҙы,

²¹ Һандыҡты Изге торлаҡҡа индерҙе һәм, Раббы ҡушҡанса, пәрҙә элеп, Килешеү һандығын ҡапланы.

²² Өҫтәлде Осрашыу сатырының эсендә, төньяҡ тарафҡа, пәрҙә алдына ҡуйҙы.

²³ Уның өҫтөнә Раббы алдына икмәк һалды. Раббы Мусаға нисек бойорһа, шулай булды.

²⁴ Шәмдәлде Осрашыу сатырына, өҫтәл ҡаршыһына, сатырҙың көньяғына ҡуйҙы.

²⁵ Майшәмдәрҙе лә Раббы алдына урынлаштырҙы. Раббы Мусаға нисек бойорһа, шулай булды.

²⁶ Алтын ҡорбан усағын Осрашыу сатырында, пәрҙәнең алдында урынлаштырҙы;

²⁷ уның өҫтөндә хуш еҫ төтәтергә ҡуйҙы. Раббы Мусаға нисек бойорһа, шулай булды.

²⁸ Сатырға ингән урынға ҡорма элде.

²⁹ Осрашыу сатыры алдына тотош яндырыу ҡорбаны усағын урынлаштырҙы һәм уның өҫтөндә тотош яндырыу ҡорбаны һәм икмәк саҙаҡаһы килтерҙе. Раббы Мусаға нисек бойорһа, шулай булды.

³⁰ Осрашыу сатыры менән ҡорбан усағы араһына йыуынғыс ҡуйҙы һәм уға йыуыныу өсөн һыу тултырҙы.

^31-32 Муса, Һарун һәм Һарундың улдары, Осрашыу сатырына керергә һәм ҡорбан усағына яҡын килергә кәрәк булғанда, унда аяҡ-ҡулдарын йыуа ине. Раббы Мусаға нисек бойорһа, шулай булды.

³³ Муса Сатырҙы һәм ҡорбан усағын уратып, ихата ҡорҙо, ихата ҡапҡаһына ҡорма элде. Шулай итеп, Муса эшен тамамланы.

Болоттоң Осрашыу сатырын ҡаплауы

³⁴ Шул саҡ Осрашыу сатырын болот ҡапланы һәм Изге торлаҡ Раббы шөһрәтенең балҡышы менән тулды.

³⁵ Муса Осрашыу сатырына инә алманы, сөнки уны болот ҡаплағайны һәм Изге торлаҡҡа Раббының шөһрәте тулғайны.

³⁶ Сатыр өҫтөнән болот күтәрелгәндә, исраилдар юлға сығыр һәм тәғәйен араны үтер булды.

³⁷ Болот күтәрелмәгәндә иһә, уның ҡалҡҡанын көтөп туҡтап торҙолар.

³⁸ Көндөҙ Изге торлаҡ өҫтөндә Раббы болото торҙо, төнөн болот эсендә ут янды – быны исраилдарҙың һәммәһе лә күрҙе. Улар сәфәрҙә булған осорҙа гелән шулай булды.