Сығыу 25 - Изге Яҙма

Изге сатыр өсөн иғәнәләр

¹ Раббы Мусаға былай тине:

² – Исраил халҡына Минең өсөн иғәнә йыйырға ҡуш: кем нимә теләй, шуны бирһен.

³ Һин уларҙан түбәндәге әйберҙәрҙе ал: алтын, көмөш, баҡыр,

⁴ зәңгәр, ҡарағусҡыл ҡыҙыл һәм ут-ҡыҙыл йөн еп, сиратылған нәфис етен еп һәм кәзә дебете,

⁵ ҡыҙылға буялған һәм иләнгән һарыҡ тәкәһе тиреһе, йоҡа итеп эшкәртелгән күн, сәрүәр ағасы,

⁶ майшәм өсөн зәйтүн майы, мәсех майы һәм төтәтеү майы өсөн хуш еҫле матдәләр,

⁷ эфод менән баш ҡаһин түшлеген биҙәр өсөн тирәсәгә кейҙереп ҡуя торған оникс һәм башҡа аҫыл таштар.

⁸ Исраил халҡы Минең өсөн Изге торлаҡ ҡорһон, һәм Мин улар араһында төйәкләнермен.

⁹ Торлағым Изге сатырҙы һәм ундағы бөтә нәмәне Мин һиңә күрһәтәсәк өлгө буйынса эшлә.

Килешеү һандығы

¹⁰ Сәрүәр ағасынан бер һандыҡ эшләһендәр: буйы ике терһәк ярым, иңе һәм бейеклеге терһәк ярым булһын.

¹¹ Уны эстән дә, тыштан да саф алтын менән көплә, ситтәрен алтын менән ҡаймала.

¹² Дүрт алтын дүңгәләк ҡойоп, уларҙы һандыҡтың дүрт тояғына беркет: ике дүңгәләк – һандыҡтың бер яғынан, икәүһе икенсе яғынан булһын.

¹³ Сәрүәр ағасынан ҡолғалар эшләп, уларҙы алтын менән көплә

¹⁴ һәм, һандыҡты ҡолғаға ултыртып йөрөтөр өсөн, уларҙы һандыҡтың ике яғындағы дүңгәләктәргә кейҙер.

¹⁵ Был ҡолғалар һәр саҡ һандыҡтың дүңгәләктәренә кейҙерелгән булһын – уларҙы һурып алырға ярамай.

¹⁶ Мин һиңә бирәсәк килешеү таҡтаташтарын һандыҡ эсенә һал.

¹⁷ Һандыҡҡа саф алтындан гонаһтарҙан паклау ҡапҡасы яһа. Уның буйы ике терһәк ярым, иңе терһәк ярым булһын.

¹⁸ Ҡапҡастың ике осона, алтындан сүкеп, ике кируб эшлә.

¹⁹ Кирубтарҙың береһе – бер, икенсеһе икенсе оста булһын һәм ҡапҡас менән бер бөтөндө тәшкил итһен.

²⁰ Кирубтарҙың ҡанаттары, өҫкә йәйелеп, һандыҡ ҡапҡасын ҡаплап торһон. Улар бер-береһенә йөҙҙәре менән ҡапма-ҡаршы торһон һәм ҡапҡас өҫтөнә ҡараһын.

²¹ Һандыҡтың эсенә Мин һиңә бирәсәк килешеү таҡтаташтарын һал да ҡапҡасын яп.

²² Һинең менән осрашҡан саҡта Мин ана шунда, һандыҡ ҡапҡасы өҫтөндә, ике кируб араһында булырмын һәм һинең аша бойороҡтарымды Исраил халҡына еткерермен.

Изге икмәк ҡуя торған өҫтәл

²³ Сәрүәр ағасынан бер өҫтәл эшлә: буйы ике терһәк, иңе бер терһәк һәм бейеклеге терһәк ярым булһын.

²⁴ Уны саф алтын менән көплә һәм сит-ситтәрен алтын менән ҡаймала.

²⁵ Ситтәренә ус аяһы бейеклегендә эргәлек эшлә һәм уны алтын менән ҡаймала.

²⁶ Дүрт алтын дүңгәләк яһап, уларҙы өҫтәлдең дүрт мөйөшөнә, аяҡтары тәңгәленә беркет.

²⁷ Дүңгәләктәрҙе эргәлек янына урынлаштыр; өҫтәлде күсереп йөрөтөргә кәрәк булғанда, уларға ҡолға кейҙереләсәк.

²⁸ Өҫтәлде күсереп йөрөтөр өсөн ҡолғаларҙы сәрүәр ағасынан эшлә лә уларҙы алтын менән көплә.

²⁹ Өҫтәлгә ҡуйыр өсөн саф алтындан тәрилкәләр, сеүәтәләр, түкмә ҡорбандар өсөн ҡомғандар һәм кәсәләр эшлә.

³⁰ Һәр ваҡыт Минең хозурыма өҫтәл өҫтөнә изге икмәк ҡуй.

Шәмдәл

³¹ Саф алтындан сүкеп, шәмдәл эшлә. Уның нигеҙен, һабағын, кәсәләрен, бөрөләрен һәм таждарын бер бөтөн итеп тоташтыр.

³² Уның бер яғынан – өс, икенсе яғынан – өс, йәмғеһе алты ботаҡ булһын.

³³ Алты ботаҡтың һәр береһендә бөрөләре һәм таждары менән баҙам сәскәһенә оҡшаған өсәр кәсә булһын.

³⁴ Шәмдәлдең һабында бөрөләре һәм таждары менән баҙам сәскәһенә оҡшаған дүрт кәсә булһын.

³⁵ Ике ботаҡ аҫтында бер бөрө, икенсе ике ботаҡ аҫтында бер бөрө, өсөнсө ике ботаҡ аҫтында бер бөрө – шәмдәлдең бөтә алты ботағы аҫтында ла шулай булырға тейеш.

³⁶ Кәсәнең бөрөләре лә, ботаҡтар ҙа – шәмдәл менән бер бөтөн: һәммәһе лә саф алтындан сүкелгән булһын.

³⁷ Ете майшәм эшлә һәм, шәмдәл алдын яҡтыртыу өсөн, уларҙы шәмдәл өҫтөнә ҡуй.

³⁸ Филтә ҡыҫҡыстар һәм һоҫҡолар саф алтындан булһын.

³⁹ Шәмдәлгә һәм уның кәрәк-ярағына бер талант саф алтын тотон.

⁴⁰ Ҡара уны, барыһын да тап һиңә тауҙа күрһәтелгән өлгө буйынса эшлә.