Руҫ китабы 3 - Изге Яҙма

Боғаздың Рутты хәстәрләүе

¹ Бер көндө ҡәйнәһе Ноғоми Рутҡа: – Ҡыҙым, һиңә йәшәр өсөн именерәк һәм яҡшыраҡ урын табырға теләйем.

² Теге ваҡыт һин уның ураҡсылары менән баҫыуында булған Боғаз, беҙҙең туғаныбыҙ, бөгөн кискеһен ырҙын табағында арпа елгәртәсәк.

³ Һин йыуынып таҙарын, матур итеп кейен, еҫле май һөрт тә ырҙын табағына бар. Ләкин Боғаз ашап-эсеп алмайынса, күҙенә салынма.

⁴ Уның ҡайҙа йоҡларға ятҡанын ҡарап тор ҙа, өҫ ябыуын һирпеп асып, уның аяҡ осона барып ят – артабан нимә эшләргә икәнен ул үҙе өйрәтер, – тине.

⁵ – Бөтәһен дә һин әйткәнсә эшләрмен, – тине Рут.

⁶ Ул, ырҙын табағына барып, бөтәһен дә ҡәйнәһе әйткәнсә эшләне.

⁷ Боғаз ашап-эсеп алғандан һуң, кәйефләнеп, иген эҫкерте төбөнә йоҡларға ятты. Рут, йәшерен генә уның эргәһенә килеп, Боғаздың өҫ ябыуын һирпеп асты ла уның аяҡ осона ятты.

⁸ Төн уртаһында ир һиҫкәнеп уянып китте лә аяҡ осонда бер ҡатындың ятҡанын абайланы.

⁹ – Һин кем? – тип һораны ул. – Мин ҡолоң Рут булам. Мине үҙ ҡанатың аҫтына алһаңсы. Һин беҙҙең ғаиләбеҙҙең йолоусыһы бит, – тине Рут.

¹⁰ – Һиңә, ҡыҙым, Раббының рәхмәте төшһөн. Был юлы һин элеккенән дә дөрөҫөрәк эшләнең – ярлымы, баймы, йәш егеттәр артынан йүгермәнең.

¹¹ Ҡурҡма, ҡыҙым, нимә һораһаң, шуның бөтәһен дә эшләрмен. Ҡалабыҙҙың бар халҡы белә: һин хөрмәткә лайыҡлы ҡатынһың.

¹² Дөрөҫ әйтәһең, мин һеҙҙең ғаиләгеҙҙең йолоусыһымын, шуға ла ярҙам итергә тейешмен, ләкин һинең миңә ҡарағанда ла яҡыныраҡ туғаның бар.

¹³ Бөгөн бында ҡуна ҡал да, иртәгә, әгәр ҙә ул үҙ бурысын үтәһә, яҡшы, әйҙә шулай итһен. Әгәр ҙә уның ярҙам иткеһе килмәһә, тере Раббы шаһит: һине мин үҙем алырмын. Йоҡла, таң атмай әле, – тине Боғаз.

¹⁴ Рут таңға тиклем уның аяҡ осонда йоҡланы ла, кеше күргеләгәнсе, иртүк торҙо. Боғаз: «Ырҙын табағына ҡатын-ҡыҙ килгәнен бер кем дә белмәһен ине», – тип уйлап

¹⁵ Рутҡа: – Ҡана, шәлеңде бир. Йәйеп тотоп тор, – тине. Рут шәлен тотоп торҙо, ә Боғаз унда алты үлсәм арпа һалып күтәртте лә, үҙе ҡалаға ҡайтып китте.

¹⁶ Рут ҡәйнәһе янына ҡайтты. Ноғоми унан: – Хәлдәр нисек, ҡыҙым? – тип һораны. Рут Боғаздың уның өсөн нимәләр эшләгәнен ҡәйнәһенә һөйләп бирҙе.

¹⁷ Шунан: – Ул бына ошо алты үлсәм арпаны миңә: «Ҡәйнәң янына буш ҡул менән ҡайтма», тип бирҙе, – тине.

¹⁸ Ҡәйнәһе: – Ҡыҙым, сабыр ғына көт, оҙаҡламай эштең ни менән бөтөрөн белерһең. Сөнки ул әйткән һүҙен көнөндә тамамламайынса тыныслана торған кеше түгел, – тине.