Хаггай 2 - Изге Яҙма

Яңы ҡорам күркәмерәк һәм данлыраҡ булыр

¹ Етенсе айҙың егерме беренсе көнөндә Хаггай пәйғәмбәр аша Раббы һүҙе булды:

² – Йәһүҙәнең өлкә башлығы Шеалтиил улы Зеруббавелға, баш ҡаһин Йеһосадаҡ улы Йеһошуағҡа, халыҡтың иҫән ҡалғандарына әйт:

³ «Арағыҙҙа ҡайһығыҙ Раббы йортон әүәлге шөһрәтендә күрҙе? Хәҙер һеҙ уны ниндәй хәлдә күрәһегеҙ? Ул һеҙгә юҡ-бар кеүек кенә булып күренмәйме?

⁴ Ләкин рухыңды нығыт, Зеруббавел, – ти Раббы, – рухыңды нығыт, баш ҡаһин Йеһосадаҡ улы Йеһошуағ, рухыңды нығыт, был илдең бар халҡы, – тип белдерә Раббы. – Мин һеҙҙең менән, – ти Күк ғәскәрҙәре Раббыһы. – Шуға ла эшләгеҙ.

⁵ Мысырҙан сыҡҡан сағығыҙҙа Мин һеҙҙең менән төҙөгән килешеү буйынса Рухым – һеҙҙең арала. Ҡурҡмағыҙ!»

⁶ Күк ғәскәрҙәре Раббыһы былай ти: «Тағы бер аҙҙан Мин күк менән ерҙе, Диңгеҙ менән ҡоро тупраҡты тетрәтәсәкмен.

⁷ Мин бар халыҡтарҙы дер һелкетәм, Уларҙың хазинаһы бында ағылыр, Мин был Йортто данға күмәсәкмен». Күк ғәскәрҙәре Раббыһы шулай ти.

⁸ «Көмөш – Минеке, алтын – Минеке, – тип белдерә Күк ғәскәрҙәре Раббыһы. –

⁹ Был йорт элеккенән шөһрәтлерәк булыр, – ти Күк ғәскәрҙәре Раббыһы. – Мин был урынға тыныслыҡ бирәм», – ти Күк ғәскәрҙәре Раббыһы.

Хәләл һәм хәрәм тураһында

¹⁰ Дарий батша тәхеткә ултырғандың икенсе йылында, туғыҙынсы айҙың егерме дүртенсе көнөндә, Хаггай пәйғәмбәргә Раббы һүҙе булды:

¹¹ – Күк ғәскәрҙәре Раббыһы былай ти: «Ҡаһиндарҙан ошондай хәлгә баһа биреүен һора.

¹² Кемдер берәү хәләл итте кейеменең итәгенә төрөп алып китеп бара, ти, һәм итәге менән икмәккә, өйрәгә, шарапҡа, зәйтүн майына йәки башҡа төр аҙыҡҡа ҡағылды, ти. Был ризыҡ хәләл булырмы?» – Юҡ, – тине ҡаһиндар.

¹³ – Әгәр ҙә был ризыҡҡа мәйеткә ҡағылып нәжесләнгән кеше тейһә, был аҙыҡ хәрәм булырмы? – тип һораны Хаггай. – Хәрәм булыр, – тине ҡаһиндар.

¹⁴ Шул сағында Хаггай былай тине: – Раббы: «Минең алдымда был кешеләр, был халыҡ та ана шулай, – тип белдерә, – уларҙың бар ғәмәлдәре лә, килтергән бөтә ҡорбандары ла – хәрәм.

Раббының бәрәкәт бирәсәге

¹⁵ Бөгөнгө көндән алып артабан нимә булырын күҙәтегеҙ. Раббы йортона нигеҙ ташы һалынғансы,

¹⁶ эштәрегеҙ нисек бара ине? Егерме үлсәм иген алам тип келәткә барҙыниһәң – бары ун ғына, илле үлсәм шарап һоҫам тип йөҙөм һыҡҡысҡа барҙыниһәң – унда бары егерме үлсәм генә була торғайны.

¹⁷ Мин һеҙгә ҡыуан ел, боҙ-борсаҡ ебәрҙем, сәсеүлегегеҙҙе үңәҙ ҡырҙы, хеҙмәт емештәрегеҙҙе харап иттем, ләкин һеҙ Минең хозурыма ҡайтманығыҙ, – тип белдерә Раббы. –

¹⁸ Бынан ары туғыҙынсы айҙың егерме дүртенсе көнөнән, Раббы йортона нигеҙ һалынған көндән, алып, һеҙҙең менән нимә булырын күҙәтегеҙ.

¹⁹ Келәттәрҙә орлоҡ ҡалғанмы ни? Йөҙөм дә, инжир ҙә, анар менән зәйтүн ағасы ла әлегәсә емеш бирә алманы. Ләкин бынан ары Мин уларға бәрәкәт яуҙырасаҡмын».

Зеруббавелға бирелгән вәғәҙә

²⁰ Айҙың егерме дүртенсе көнөндә Хаггайға йәнә Раббы һүҙе булды:

²¹ – Йәһүҙәнең өлкә башлығы Зеруббавелға әйт: «Мин күк менән ерҙе һелкетәсәкмен.

²² Батша тәхеттәрен түңкәрәм, Ҡәүемдәрҙең батшалыҡтарының көсөн ҡаҡшатам, Яу арбаларын кешеләре менән бергә ауҙарам, Бер-береһенә ҡаршы алышта Һыбайлылар аттары менән бергә дөмөгөр.

²³ Ул көндө, – тип белдерә Күк ғәскәрҙәре Раббыһы, – Мин һине, ҡолом Минең Шеалтиил улы Зеруббавел, алырмын, мөһөр йөҙөгө кеүек итермен, сөнки һине һайланым». Күк ғәскәрҙәре Раббыһы шулай тип белдерә.