І Йылъяҙма 24 - Изге Яҙма

Ҡаһиндарҙың вазифаһы

¹ Һарун нәҫеле түбәндәгесә бүленә. Һарун улдары: Надав, Авиһу, Әлғазар, Иҫамар.

² Надав менән Авиһу аталарынан алда донъя ҡуя, улдары булмай, шунлыҡтан ҡаһинлыҡты Әлғазар менән Иҫамар алып бара.

³ Дауыт Әлғазар нәҫеленән Садоҡ һәм Иҫамар нәҫеленән Ахимәләх ярҙамында Һарун нәҫелен вазифаларына күрә төркөмдәргә бүлә.

⁴ Әммә, Әлғазар улдары араһында нәҫел башлыҡтары Иҫамар улдары араһындағыға ҡарағанда күберәк булған өсөн, Әлғазар нәҫеле – ун алты, ә Иҫамар улдары – һигеҙ төркөмгә бүленә.

⁵ Улар бөтәһе лә бер төрлө, йәрәбә буйынса бүленә, сөнки Әлғазар нәҫелендә лә, Иҫамар нәҫелендә лә Изге торлаҡтағы башлыҡтар һәм Алла тәғәйенләгән башлыҡтар була.

⁶ Уларҙы батшаның, түрәләрҙең һәм ҡаһин Садоҡ менән Әвйәҫәр улы Ахимәләхтең, ҡаһин һәм Леви ырыуы башлыҡтарының күҙе алдында левиҙәрҙән булған кәтип Неҫанил улы Шемағъяһ теркәй бара: бер ғаиләне – Әлғазар нәҫеленән, икенсеһен Иҫамар нәҫеленән алалар.

⁷ Беренсе йәрәбә – Йеһояривҡа, икенсеһе – Йедағъяһҡа,

⁸ өсөнсөһө – Харимға, дүртенсеһе – Сеғоримға,

⁹ бишенсеһе – Малкияһҡа, алтынсыһы – Миямингә,

¹⁰ етенсеһе – Һаҡҡосҡа, һигеҙенсеһе – Авияһҡа,

¹¹ туғыҙынсыһы – Йешуағҡа, унынсыһы – Шеханъяһҡа,

¹² ун беренсеһе – Әлйәшивкә, ун икенсеһе – Яҡимға,

¹³ ун өсөнсөһө – Хуппаға, ун дүртенсеһе – Йәшәвавҡа,

¹⁴ ун бишенсеһе – Билгаға, ун алтынсыһы – Иммергә,

¹⁵ ун етенсеһе – Хезиргә, ун һигеҙенсеһе – Һапписсесҡа,

¹⁶ ун туғыҙынсыһы – Пеҫахъяһҡа, егерменсеһе – Йехезҡилға,

¹⁷ егерме беренсеһе – Яхинға, егерме икенсеһе – Гамулға,

¹⁸ егерме өсөнсөһө – Делаяһҡа, егерме дүртенсе Мағазъяһҡа төшә.

¹⁹ Исраил Аллаһы Раббы бойорғанса, бабалары Һарун биргән күрһәтмәләргә ярашлы, Раббы йортона хеҙмәткә килеү тәртибе ошолай була.

²⁰ Левиҙең ҡалған вариҫтары түбәндәгеләр. Ғамрам улдарынан: Шуваил; Шуваил улдарынан: Йәхдейәһ.

²¹ Рехавъяһтан: Рехавъяһ улдарынан Йишшияһ беренсе була.

²² Исһарҙан: Шеломоҫ; Шеломоҫ улдарынан: Яхаҫ.

²³ Хеврон улдары: беренсе – Йерияһ, икенсе – Амаръяһ, өсөнсө – Яхазиил, дүртенсе – Йеҡамғам.

²⁴ Ғуззиил улы: Миха; Миха улдарынан: Шамир.

²⁵ Миханың туғаны Йишшияһ; Йишшияһ улдарынан: Зәкәрьяһ.

²⁶ Мерари улдары: Махли менән Муши – улар Мерари улы Яғазияһтың улдары.

²⁷ Мерари тоҡомонан Яғазияһтың башҡа улдары: Шоһам, Заккур һәм Ғиври.

²⁸ Махлиҙыҡы – Әлғазар; уның улдары булмай.

²⁹ Ҡиштан: Ҡиш улы – Йерахмеил.

³⁰ Муши тоҡомо – Махли, Ғедәр, Йеримоҫ. Былар – ғаиләләре буйынса һаналған левиҙәр.

³¹ Һарун нәҫеленән булған ағай-энеләре кеүек Дауыт батша, Садоҡ, Ахимәләх, ҡаһин һәм Леви нәҫелдәре башлыҡтары алдында эре нәҫелдәр менән вағыраҡ нәҫелдәр типә-тиң тороп йәрәбә һалыша.