Йырҙар йыры 5 - Изге Яҙма

Егет

¹ Баҡсама килдем, һылыуым, кәләшем минең. Миррам менән хуш еҫле үләндәремде йыйҙым, Кәрәҙемдән балымды ашаным, Һөтөм менән шарабымды эстем. Туйғансы ашағыҙ, дуҫтар! Эй ғашиҡтар, Һөйөүҙән иҫергәнсе эсегеҙ!

Ҡыҙҙың әхирәттәре Ҡыҙ

² Үҙем йоҡлаһам да йөрәк уяу… Ана, минең йән һөйгәнем шаҡый: «Ас миңә, һылыуым, һөйгән йәрем, Күгәрсенем минең, гүзәлем! Башым сыланды төнгө ысыҡҡа, Тамсыларҙан сәсем дымланды».

³ Мин инде күлдәгемде сискәнмен, Уны нисек яңынан кейәйем? Аяҡтарымды йыуғанмын, Нисек уларҙы ҡабаттан бысратайым?

⁴ Һөйгәнем ҡулын ишек ярығынан һонғайны – Эс-бауырым ҡалтыранып китте.

⁵ Һөйгәнемә асырға тип торҙом. Ҡулдарымдан мирра тамды, Бармаҡтарымдан еҫле май Ишек тотҡаһына ағып төштө.

⁶ Һөйгәнемә ишек астым, Ә ул инде китеп барған! Ул киткәнгә йөрәгем өҙөлөп төштө… Эҙләнем мин, әммә таба алманым, Саҡырҙым, тик яуап ҡайтарманы.

⁷ Ҡала буйлап йөрөгән һаҡсыларҙы осраттым, Улар мине туҡманы, яраланылар. Ҡала диуарының һаҡсылары Япмамды тартып алдылар.

⁸ Ялбарамын һеҙгә, эй Йәрүсәлим ҡыҙҙары! Тапһағыҙ һөйгәнемде, әйтегеҙ уға: Мин һөйөү утында янам!

Ҡыҙҙың әхирәттәре

⁹ Эй сибәрҙәрҙең сибәре, әйтсе, Башҡаларҙан нимәһе менән артыҡ һөйгәнең? Уның нимәһе башҡаларҙан артыҡ булғанға, Шул тиклем һин беҙгә ялбараһың?

Ҡыҙ

¹⁰ Һөйгәнем нурлы, биттәре алһыу ғына, Ун меңдәр араһында берҙән-бер.

¹¹ Башы уның, әйтерһең, саф алтын, Бөҙрә сәсе ҡарға һымаҡ ҡара.

¹² Күҙҙәре гүйә ағын һыу буйындағы күгәрсендәр, Быуа янында ултырған, Һөттә ҡойонған күгәрсен.

¹³ Яңаҡтары – хуш еҫле сәскә түтәле, Ирендәре – мирра тамып торған лилиә таждары,

¹⁴ Беләктәре – аҫылташтар теҙелгән алтындай. Тәне зәңгәр яҡуттар менән биҙәлгән Фил һөйәге һымаҡ ҡатҡыл, шыма.

¹⁵ Аяҡтары алтын таяуға ҡуйылған Мәрмәр бағаналар һымаҡ көслө. Һыны Ливан тауҙарылай ғорур, Кедр ағастарылай мөһабәт.

¹⁶ Ирендәре татлы, Үҙе иһә һәр йәһәттән килгән. Бына шундай ул минең һөйгәнем, Бына ниндәй минең дуҫым, Эй Йәрүсәлим ҡыҙҙары!