Ишағыяһ 52 - Изге Яҙма

Йәрүсәлимдең шатлығы

¹ Уян, Сион, уян, ҡөҙрәтеңә таян! Эй мөҡәддәс ҡала Йәрүсәлим, Гүзәл кейемдәреңде кей! Сөннәтһеҙҙәр һәм пак булмағандар Башҡаса һиңә инә алмаҫтар.

² Өҫ-башыңдағы саңды ҡаҡ, Тороп баҫ, әсирә Йәрүсәлим! Муйыныңдағы сынйырҙы алып ташла, Эй әсирә Сион-ҡыҙ!

³ Раббы былай ти: «Һеҙ бушҡа һатылғайнығыҙ, Аҡсаһыҙ йолоп алынырһығыҙ!»

⁴ Раббы Хаким былай ти: «Башта халҡым Мысырға барғайны. Унда килмешәк булып йәшәне. Унан ашшурҙар уларҙы бер ғәйепһеҙгә иҙҙе.

⁵ Инде хәҙер Миңә ни эшләргә? – тип белдерә Раббы, – Халҡым нахаҡҡа алып кителде, Уның хакимдары илай, – тип белдерә Раббы. – Һәр саҡ, көндәр буйы исемем мыҫҡыл ителә.

⁶ Әммә халҡым исемемде таныясаҡ, Көнө еткәс: „Бына – Мин!“ – тигән Зат булыуымды аңлаясаҡ».

Тыныслыҡ һәм ҡотолоу хаҡында һөйөнөслө хәбәр

⁷ Тауҙар артылып хәбәр килтереүсенең Аяҡтары ниндәй күркәм! Ул тыныслыҡ тураһында һөйөнсө, Ҡотолоу хаҡында хәбәр алып килә. Сион халҡына: «Аллағыҙ батшалыҡ итә», – тип белдерә.

⁸ Тыңла: Һаҡсыларыңдың тауышы ишетелә, Бөтәһе бергә ҡыуанып ҡысҡырыша. Сөнки Раббының Сионға кире ҡайтҡанын Үҙ күҙҙәре менән күреп тора.

⁹ Эй Йәрүсәлим харабалары, Һөйөнөгөҙ, бергәләшеп йырлағыҙ, Сөнки Раббы Үҙенең халҡын йыуатты, Йәрүсәлимде йолоп алды.

¹⁰ Раббы бөтә ҡәүемдәрҙең күҙ алдында Мөҡәддәс ҡулының ҡөҙрәтен күрһәтте; Донъяның һәр бер тарафы Аллабыҙҙың ҡотҡарыуын күрер.

¹¹ Китегеҙ, унан сығып китегеҙ! Нәжес нәмәгә ҡағылмағыҙ. Раббының һауытын алып барыусылар Ул урындан сығығыҙ, пакланығыҙ!

¹² Әммә һеҙ ашыҡмай ғына сығырһығыҙ, Ҡасып-боҫоп китмәҫһегеҙ; Сөнки Раббы алдығыҙҙан барыр. Исраил Аллаһы артығыҙҙан да һаҡлап килер.

Раббының ғазап сигеүсе ҡоло

¹³ «Бына Минең ҡолом уңыш ҡаҙаныр, Ул ҡалҡыр, күтәрелер, бөйөк булыр.

¹⁴ Күптәр, уны күреп, шаҡ ҡатҡан ине, Ҡиәфәте, сырайы шундай боҙолған, Кешегә һис оҡшашлығы ҡалмағайны.

¹⁵ Ләкин ул күп халыҡтарҙы хайран ҡалдырасаҡ. Уның алдында батшалар ауыҙ йомасаҡ. Улар үҙҙәренә бер кем дә һөйләмәгәнде күрәсәк, Ишетмәгән нәмәләрҙе аңлаясаҡ».