Ишағыяһ 48 - Изге Яҙма

Раббының Исраилға яңы нәмәләр белдереүе

¹ Тыңлағыҙ, эй Яҡуп йорто, Исраил исеме менән аталғандар, Йәһүҙәнең орлоғонан таралғандар! Раббы исеме менән ант итәһегеҙ, Исраил Аллаһын саҡыраһығыҙ, Әммә тоғролоҡ һәм тәҡүәлектән алыҫһығыҙ.

² Үҙегеҙҙе изге ҡала исеме менән йөрөтәһегеҙ, Исраил Аллаһына таянаһығыҙ. Уның исеме – Күк ғәскәрҙәре Раббыһы!

³ «Булып үткәндәр хаҡында Мин алдан уҡ әйтеп ҡуйған инем, Ул һүҙҙәр Минең ауыҙымдан сыҡты, Мин иғлан иттем һәм бойомға ашырҙым, Барыһын да ҡапыл эшләнем.

⁴ Тиҫкәре икәнеңде, муйыныңдың – тимер, Маңлайыңдың баҡыр булғанын белгәнгә күрә,

⁵ Быларҙы Мин һеҙгә алдан уҡ белдерә килдем, Һуңынан һин: „Быларҙы минең ботом эшләне. Ағастан яһалған, ҡойолған һындарым шулай тип бойорҙо!“ – тип Әйтмәһен өсөн, булмаҫтан элек иғлан иттем.

⁶ Был хаҡта һин ишеткәйнең – инде ҡара уларҙың барыһын! Инде лә бының хаҡлығын танымайһыңмы? Ошо мәлдән алып һеҙгә яңы нәмәләр, Һин белмәгән йәшерен нәмәләр хаҡында белдерәм.

⁷ Улар әллә ҡасан түгел, яңы ғына яралдылар, Уны һин бөгөнгәсә белмәнең, „Мин быларҙы белә инем“, – тип әйтә алмайһың.

⁸ Һин ишетмәнең дә, белмәнең дә. Әүәлдән ҡолағың томаланған. Мин һинең хыянатсыл икәнеңде беләм; Әсә ҡарынында саҡтан фетнәсе тип аталғанһың.

⁹ Исемем хаҡына асыуымды кисектерә киләм. Шөһрәтем хаҡына һиңә сабыр булдым, Юғиһә юҡ итер инем.

¹⁰ Бына һине утта иретеп таҙарттым, Ләкин көмөш кеүек түгел, Ә ғазап усағында һынаным.

¹¹ Быны бары Үҙем өсөн, Тик Үҙем өсөн генә эшләйем, Сөнки ни өсөн исемем оятҡа ҡалырға тейеш? Шөһрәтемде һис кемгә лә бирмәм.

Раббының Исраилды Бабилдан йолоп алыуы

¹² Эй Яҡуп нәҫеле, Үҙем һайлап алған Исраил, тыңла Мине! Был – Мин! Мин – беренсеһе һәм дә һуңғыһымын!

¹³ Минең ҡулым ерҙең нигеҙҙәрен ҡорҙо, Уң ҡулым күктәрҙе киреп ҡуйҙы. Мин саҡырыуға улар бергәләп тороп баҫыр.

¹⁴ Һәммәгеҙ йыйылығыҙ, тыңлағыҙ! Боттарығыҙҙың ҡайһыһы ошоларҙы алдан әйтеп бирҙе? Раббының яратҡан кешеһе Бабилда Уның ихтыярын бойомға ашырыр, Раббының көсөн халдейҙарға ҡаршы ҡулланыр.

¹⁵ Мин, эйе, Мин әйттем, Уны Мин саҡырҙым. Мин килтерҙем, уның юлы уңышлы буласаҡ.

¹⁶ Миңә яҡынлағыҙ, быны тыңлағыҙ! Мин баштан уҡ йәшереп һөйләмәнем, Был башланғандан алып Мин унда булдым». «Инде Раббы Хаким мине һәм Үҙенең Рухын ебәрҙе».

¹⁷ Раббы, Ҡотҡарыусың, Исраилдың Изгеһе былай ти: «Мин – Раббы, һинең Аллаң, Һиңә файҙа булғанды өйрәтеүсемен, Бараһы юлыңда етәкләйем.

¹⁸ Бойороҡтарымды тыңлаһаң икән! Ул саҡта именлегегеҙ – йылға, Бәрәкәтегеҙ диңгеҙ тулҡыны һымаҡ булыр ине.

¹⁹ Тоҡомоғоҙ – ҡом һымаҡ күп, Балаларығыҙ ҡом бөртөгө кеүек хисапһыҙ булыр; Исемдәре онотолмаҫ, Минең хозурымдан юҡҡа сыҡмаҫ ине».

²⁰ Бабилдан сығығыҙ, халдейҙар еренән ҡасығыҙ. Был хәбәрҙе һөйөнөс ауаздары менән иғлан итегеҙ, Һөйләгеҙ, донъяның һәр тарафына еткерегеҙ. «Раббы Үҙенең ҡоло Яҡупты йолоп алды», – тип әйтегеҙ.

²¹ Сүллектән алып сыҡҡанда, һыуһыҙ интекмәнеләр; Улар өсөн ҡаянан һыуҙар ағыҙҙы; Ҡая ярҙы, унан һыу атылып сыҡты.

²² «Залимдарға иһә именлек юҡ», – ти Раббы.