Ишағыяһ 38 - Изге Яҙма

Хизкияһтың ауырыуы һәм һауығыуы

¹ Шул көндәрҙә Хизкияһ үлемесле ауырыуға тарыны. Амус улы Ишағыяһ пәйғәмбәр уға килеп: – Раббы былай ти: «Йортоңа васыятыңды еткер, сөнки ауырыуыңдан һауыға алмаҫһың, үлерһең», – тине.

² Хизкияһ йөҙө менән диуарға боролоп ятты ла Раббыға ялбарҙы.

³ – Йә Раббы! Һин хуш күргән ғәмәлдәр ҡылып, тоғролоҡ менән, ысын күңелдән Һинең юлыңдан йөрөгәнемде иҫеңә төшөрһәң ине, – тип әсенеп-әсенеп иланы.

⁴ Бынан һуң Ишағыяһҡа Раббы һүҙе булды:

⁵ – Бар, Хизкияһҡа әйт: «Атайың Дауыттың Аллаһы Раббы былай ти: „Доғаңды ишеттем, күҙ йәштәреңде күрҙем. Ҡара, Мин ғүмереңде ун биш йылға оҙайтам.

⁶ Һине лә, ҡаланы ла Ашшур батшаһы ҡулынан ҡотҡарырмын – был ҡаланы һаҡлап ҡалырмын.

⁷ Әйткән һүҙемде бойомға ашырасағымдың билдәһе шул:

⁸ байып барған ҡояштың Ахаз төҙөгән баҫҡыстан түбәнгә төшөп барған күләгәһен ун баҫҡысҡа кире сигендерәм“». Шунда ҡояш байып барған еренән кире боролоп, уның күләгәһе ун баҫҡысҡа кире сигенде.

⁹ Йәһүҙә батшаһы Хизкияһ, сиренән арынып, сәләмәтләнгәндән һуң, былай тип яҙҙы:

¹⁰ Үҙ-үҙемә әйттем: «Ғүмеремдең уртаһында Үлеләр донъяһының ҡапҡаһынан үтеп, Ҡалған йылдарымдан мәхрүм булырмынмы икән ни?»

¹¹ Мин уйланым: «Раббыны инде күрмәм, Эйе, Раббыны тереләр ерендә күрмәм. Был донъяла йәшәгәндәр менән бергә Кеше йөҙөн бүтән күрмәм.

¹² Көтөүсе сатырын һүтеп алған һымаҡ, Торлағым минән алынды; Туҡыусы һуҡҡан туҡымаһын төрөп ҡуйғандай, Мин дә ғүмеремде төрөп ҡуйҙым. Раббы ғүмеремде, туҡыу станындағы еп һымаҡ, ҡырҡты. Көнөн-төнөн Ул мине ахырыма алып бара.

¹³ Сабырлыҡ һаҡланым таңға саҡлы; Раббы, арыҫландай, һөйәктәремде онтаны; Йә Раббы, Һин мине көнөн дә, төнөн дә Әжәлемә алып бараһың.

¹⁴ Ҡарлуғастай сырылданым, Торна кеүек торҡолданым, Күгәрсендәй ыңғыраштым, Күккә текләп, күҙемде талдырҙым: Эй бөйөк Хакимым, ыҙа сигәм, ярҙам ит миңә!

¹⁵ Нимә тип әйтәйем? Ул нисек әйтһә, шулай эшләне. Ҡалған ғүмеремде хәсрәт эсендә үткәрермен.

¹⁶ Эй бөйөк Хакимым! Бына кеше нимә менән йәшәй! Бына нимәлә минең тормошом! Һин мине һауыҡтырырһың һәм һаҡларһың!

¹⁷ Хәйерлегә булған ғазап-әрнеүҙәрем, Һөйөүең менән йәнемде һәләкәт соҡоронан алып ҡалдың; Гонаһтарымды артҡа бырғаның.

¹⁸ Сөнки үлеләр донъяһы Һиңә шөкөр итмәҫ, Үлем мәҙхиә йырламаҫ, Ҡәбергә төшкәндәр тоғролоғоңа өмөт бағламаҫ.

¹⁹ Тереләр, бары тереләр генә, Бөгөн мин шөкөр иткән кеүек, һиңә рәхмәтле булыр. Аталар Һинең ярҙамың тураһында балаларына аңлатыр.

²⁰ Раббы ҡотҡарҙы мине; Ғүмеребеҙ буйы Раббы ҡорамында Моңло ҡылдар сиртеп, Уға дан йырларбыҙ».

²¹ – Инжир ҡағы килтерегеҙ, – тине Ишағыяһ. – Хизкияһтың сиҡаны өҫтөнә ябығыҙ – һауығыр.

²² Хизкияһ иһә: – Раббының ҡорамына йөрөй алырыма ишара иткән ниндәй билдә булыр? – тип һораны.