Ишағыяһ 34 - Изге Яҙма

Раббының ҡәүемдәрҙе язалаясағы

¹ Эй ҡәүемдәр, яҡын килегеҙ, тыңлағыҙ! Эй халыҡтар, ҡолаҡ һалығыҙ! Тыңлаһын ер һәм ундағы бөтә нәмә, Донъя һәм унда тыуғандар!

² Раббы бөтә ҡәүемдәргә асыуланды. Уларҙың ғәскәрҙәренә ҡаршы ажарланды. Уларҙы тотошлай һәләк ҡылыр, Ҡырылышҡа дусар итер.

³ Үлтерелгәндәр күмелмәй ятып ҡалыр, Мәйеттәрҙән һаҫыҡ еҫ таралыр, Тауҙар уларҙың ҡанынан ебеп ағыр.

⁴ Барлыҡ күк есемдәре сереп бөтөр, Күк йөҙө төргәк кеүек төрөлөр; Йондоҙҙар йөҙөм япрағы, Шиңгән инжир япрағы һымаҡ ҡойолор.

⁵ «Ҡылысым күктә ҡан эсеп туйҙы, Инде Эдомдың өҫтөнә, Мин тотош юҡ итергә ҡарар ҡылған Халыҡтың өҫтөнә төшә», – ти Раббы.

⁶ Раббының ҡылысы – ҡанға, Ҡуй һәм кәзә тәкәләре ҡанына туйынды. Эс майына, һарыҡ тәкәләренең бөйөр майына буялды. Сөнки Раббы Босрала ҡорбан килтерә, Эдомда оло ҡырылыш бара.

⁷ Улар менән бергә ҡырағай үгеҙҙәр, Башмаҡтар, көслө буғалар йығыласаҡ, Тупраҡ ҡанға туйынасаҡ, Ер май менән ашланасаҡ.

⁸ Сөнки Раббының үс алыу көнө, Сиондың ҡонон ҡайтарыу йылы буласаҡ.

⁹ Эдом йылғалары ыҫмалаға, Тупрағы көкөрткә әйләнәсәк, Илдең һәр тарафы янып торған ыҫмала буласаҡ.

¹⁰ Ул көнөн дә, төнөн дә һүнмәйәсәк, Һәр ваҡыт төтәп торасаҡ. Ил быуындан-быуынға буп-буш ҡалыр, Быуаттар буйы унан бер кем дә үтмәҫ.

¹¹ Унда берғаҙан менән терпе хужа булыр; Өкө менән ҡоҙғон төйәкләнер; Раббы уның өҫтөнән бөлгөнлөк ебе һуҙыр, Ҡыйралыш ауыртмағы менән үлсәр.

¹² Унда батша итеп иғлан итерлек Бер генә затлы кеше лә ҡалмаҫ, Бөтә етәкселәренең ахыры етер.

¹³ Һарайҙарын сәнскәк ҡыуаҡ баҫыр, Ҡәлғәләрендә дегәнәк менән кесерткән үҫер. Унда сүл бүреләренең төйәге, Дөйәғоштарҙың торлағы булыр.

¹⁴ Ҡырағай бесәйҙәр менән һыртландар унда осрашыр, Тәкәләр бер-береһенә тауыш бирер, Төн эйәләре унда ял итеп рәхәтлек табыр.

¹⁵ Ябалаҡтар оя ҡороп йомортҡа һалыр, Күләгә аҫтында бала сығарыр. Төйлөгәндәр парлашып йыйылыр.

¹⁶ Раббының китабынан табып уҡығыҙ: Ошоларҙың береһе лә килмәй ҡалмаҫ, Һәр йәнлек үҙенең ишен табыр. Сөнки был әмер Раббының ауыҙынан сыҡты, Уның рухы уларҙы бергә йыйыр.

¹⁷ Раббы Үҙе улар өсөн йәрәбә ташланы, Үлсәү бауы менән үлсәп өлөш бүлде. Улар был ергә мәңгегә хужа булыр, Быуындан-быуынға шунда йәшәр.