Ишағыяһ 3 - Изге Яҙма

Йәрүсәлимдәге болалар

¹ Инде Хаким, Күк ғәскәрҙәре Раббыһы, Йәрүсәлим менән Йәһүҙәгә һәр төрлө ярҙамды туҡтатасаҡ: Икмәк менән һыуҙы,

² Баһадирҙар менән яугирҙәрен, Хөкөмдарҙар менән пәйғәмбәрҙәрен, Күрәҙәселәр менән аҡһаҡалдарын,

³ Илле башлыҡтарын, арҙаҡлыларын, кәңәшселәрен, Оҫта сихырсыларын, күрәҙәселәрен тартып аласаҡ.

⁴ «Был халыҡ өҫтөнән малай-шалайҙы хаким итеп ҡуям, Әйҙә уларға бала-саға хакимлыҡ итһен», – ти Раббы.

⁵ Халыҡ бер-беренә золом ҡылыр, Һәр кем яҡынына дошман булыр, Егет аҡһаҡал алдында оятһыҙ ҡыланыр, Йүнһеҙ әҙәм абруйлыны рәнйетер.

⁶ Атаһы йортонда туған туғанына сат йәбешеп: «Һинең, исмаһам, өҫтөңдә кейемең бар. Башлығыбыҙ бул! Был харабаларға етәкселек ит», – тип әйтәсәк.

⁷ Шул саҡ ул кеше былай тип ҡысҡырыр: «Мин һеҙгә шифа бирә алмайым! Өйөмдә ашарға ла, кейергә лә юҡ. Мине халыҡҡа башлыҡ итеп ҡуймағыҙ!»

⁸ Йәрүсәлим сайҡалды, Йәһүҙә ҡоланы, Сөнки һүҙҙәре лә, эштәре лә Раббыға ҡаршы. Уның шөһрәте араларында булғанды һанламанылар.

⁹ Ҡиәфәттәре үҙҙәренә ҡаршы шаһитлыҡ итә; Гонаһтарын һис тә йәшермәйҙәр, Содом халҡы кеүек асыҡтан-асыҡ һөйләйҙәр. Үҙ баштарына бәлә алалар – ҡайғы уларға!

¹⁰ Тәҡүә кешегә яҡшылыҡ күрәсәген һөйләгеҙ, Сөнки ул ҡылған ғәмәлдәренең емешен татыр.

¹¹ Яуыз әҙәмдәрҙең башына ҡайғы! Улар бәхетһеҙ. Ҡылғандарының ҡоһорон күрерҙәр.

¹² Халҡымды бала-саға иҙә, Өҫтөнән ҡатын-ҡыҙ хакимлыҡ итә. Эй халҡым! Юлбашсыларың аҙаштыра, Һеҙҙе юлығыҙҙан яҙлыҡтыра.

¹³ Раббы дәғүәһен белдерер өсөн, Халыҡтарҙы хөкөм итер өсөн әҙер тора.

¹⁴ Раббы Үҙ халҡының аҡһаҡалдарын, Түрәләрен яуапҡа тарттыра: «Йөҙөм баҡсаһын һеҙ бөлдөрҙөгөҙ, Өйөгөҙ тулы ярлыларҙан талап алған мал.

¹⁵ Ни хаҡығыҙ менән халҡымды иҙәһегеҙ, Фәҡирҙәрҙе ҡыйырһытаһығыҙ?» Хаким, Күк ғәскәрҙәре Раббыһы белдерә быны.

Йәрүсәлим ҡатындарын иҫкәртеү

¹⁶ Раббы былай ти: «Сион ҡыҙҙары һауалы, Баштарын текә тотоп, күҙҙәрен уйнатып, Аяҡ сылбырҙарын сылтыратып, Ваҡ-ваҡ баҫып эре йөрөйҙәр.

¹⁷ Шуға күрә лә бөйөк Хаким уларҙың Баштарын ҡутырлатыр, оят ерҙәрен асыр».

¹⁸ Ул көн Раббы Хаким тартып алыр уларҙың Бөтә биҙәнеү әйберҙәрен – аяҡ божраларын, Маңлай бәйләүестәрен, Айлы мунсаҡтарын тартып өҙөр.

¹⁹ Алҡаларын, беләҙектәрен, бөркәнсектәрен, Башлыҡтарын, бәкәлдәрендәге сылбырҙарҙы,

²⁰ Таҫмаларын, хушбуй ҡаптарын, Бетеүҙәрен, йөҙөктәрен, танау алҡаларын,

²¹ Затлы кейемдәрен, ябынсаларын, шәлдәрен, янсыҡтарын,

²² Үтә күренмәле нәфис кейемдәрен, етен күлдәктәрен, Сәлләләрен, япмаларын тартып алыр.

²³ Шул саҡ хушбуй урынына һаҫыҡ еҫ, билбау урынына сүс, бөҙрә сәстәр урынына таҡыр баш, киң күлдәк урынына тар септә – матурлыҡ урынына хурлыҡ тамғаһы ҡалыр.

²⁴ Ирҙәрең, Сион, ҡылыстан үткәрелер, Батыр яугирҙәрең яуҙа һәләк булыр.

²⁵ Йәрүсәлим ҡапҡалары хәсрәтләнеп һыҡтар. Ҡала, буп-буш булып, ерҙә ултырған Япа-яңғыҙ ҡатынға оҡшап ҡалыр.