Ишағыяһ 28 - Изге Яҙма

Самария тураһында пәйғәмбәрлек

¹ Уңдырышлы үҙән уртаһында ҡалҡып торған Шараптан еңелгәндәрҙең ҡалаһына – Әфраим эскеселәренең тәкәббер тажына, Данлы гүзәллектең һулыған сәскәһенә ҡайғы!

² Бына, бөйөк Хакимдың көслө бер баһадиры бар. Ул боҙло ҡойон, һәләкәтле ғәрәсәт кеүек, Бар нәмәне йыуып алып киткән ташҡын һымаҡ килер. Үҙ ҡулдары менән ул Әфраимды ергә ҡолатыр.

³ Аһ Әфраим эскеселәренең ғорур тажы, Ана инде аяҡ аҫтында тапала!

⁴ Уңдырышлы үҙән уртаһында ҡалҡып торған ҡала, Данлы гүзәллектең һулыған сәскәһе Ваҡытынан алда өлгөргән инжир һымаҡ буласаҡ. Уны күргән бере бик тиҙ өҙөп алып йотасаҡ.

⁵ Ул көндө Күк ғәскәрҙәре Раббыһы Үҙ халҡының иҫән ҡалғандары өсөн Гүзәллек тажы һәм шөһрәт таҡыяһы булыр.

⁶ Хөкөм сығарыусыға Ул ғәҙеллек рухы иңдерер, Ҡала ҡапҡалары алдында Дошманды кире борған яугиргә ҡеүәт бирер.

Иҫерек пәйғәмбәрҙәр тураһында пәйғәмбәрлек

⁷ Ҡаһиндар менән пәйғәмбәрҙәр ҙә Иҫерешеп тәнтерәкләп йөрөп ята. Уларҙы шарап еңгән, хәмер аҡылдарын алған. Улар күргән күренмештәр ялған, Хөкөмдә сығарған ҡарарҙары яңылыш.

⁸ Өҫтәлдәрендә таҙа урын ҡалмаған, Әшәке ҡоҫҡолоҡ менән тулған.

⁹ Раббы пәйғәмбәре тураһында улар: «Был әҙәм кемде өйрәтмәксе? Кемгә өгөт бирмәксе? Яңы ғына күкрәк һөтө имгән, Имсәк ташлаған бәпестәргәме?

¹⁰ Нимә был? Бойороҡ өҫтөнә бойороҡ, бойороҡ өҫтөнә бойороҡ. Өгөт өҫтөнә өгөт, өгөт өҫтөнә өгөт, Бер аҙ бынан, бер аҙ тегенән», – тиҙәр.

¹¹ Улай икән, Раббы был халыҡҡа Ят телдә, аңлайышһыҙ һүҙҙәр менән өндәшер.

¹² Раббы уларға: «Бында рәхәт, Әйҙә арығандар хәл алһын, Бында тыныс урын», – ти торғайны. Әммә улар ишетергә теләмәне.

¹³ Шуға Раббының һүҙҙәре улар өсөн: «Бойороҡ өҫтөнә бойороҡ, бойороҡ өҫтөнә бойороҡ. Өгөт өҫтөнә өгөт, өгөт өҫтөнә өгөт, Бер аҙ бынан, бер аҙ тегенән» икән, Йөрөмәксе булырҙар ҙа салҡан йығылып яраланырҙар; Тоҙаҡҡа төшөп, әсирлеккә китерҙәр.

Раббының Сионға нигеҙ ташы һалыуы

¹⁴ Шуға күрә, эй һеҙ, мыҫҡыл итеп көлөүселәр, Йәрүсәлимдә был халыҡҡа хакимлыҡ ҡылыусылар, Раббы һүҙенә ҡолаҡ һалығыҙ!

¹⁵ Һеҙ былай тинегеҙ: «Беҙ үлем менән килешеү төҙөгәнбеҙ, Үлеләр донъяһы менән һүҙ ҡуйышҡанбыҙ. Дәһшәтле афәт беҙгә теймәй үтәсәк, Сөнки ялғанды үҙебеҙгә һыйыныс итеп алдыҡ, Хәйләнең артына йәшендек».

¹⁶ Шуға күрә Раббы Хаким һеҙгә былай ти: «Бына, Мин Сионда һыналған, Баһалап булмаҫлыҡ мөйөш ташы, Ныҡлы нигеҙ ташы ҡуям. Уға ышанған һис кем ҡаушап төшмәҫ.

¹⁷ Ғәҙеллекте – үлсәм бауы, Дөрөҫлөктө ҡурғаш аҫма итәм. Ялғанды – һыйынысығыҙҙы – боҙ һуғыр, Йәшенгән урынығыҙҙы һыу йыуып алып китер.

¹⁸ Үлем менән килешеүегеҙ боҙолор, Үлектәр донъяһы менән ҡуйышҡан һүҙегеҙ емерелер. Һәләкәтле ташҡын аша үтер, һеҙҙе бәреп йығыр:

¹⁹ Һәр көн иртән, көндөҙ ҙә, төндә лә Был ташҡын һеҙҙе йыуып алып китер. Был хәбәрҙе аңлағас, ҡотоғоҙ осасаҡ!»

²⁰ Түшәгегеҙ һуҙылып ятырға ҡыҫҡа, Ураныр өсөн юрғанығыҙ тар булыр.

²¹ Сөнки Раббы Перасим тауындағылай ҡалҡыр, Ғивғон үҙәнендәге шикелле ярһыр. Ул Үҙ эшен, сәйер эшен тормошҡа ашырыр, Уның ғәмәле хайран ҡалдырыр.

²² Шуға күрә хурлауҙан туҡтағыҙ, Юғиһә бығауҙарығыҙ ауырыраҡ булыр. Сөнки бөйөк Хакимдан – Күк ғәскәрҙәре Раббыһынан – Бөтөн илгә янаған һәләкәт тураһында белдем.

Игенсе тураһында ҡисса

²³ Тауышыма ҡолаҡ һалығыҙ, әйткәнемде ишетегеҙ. Һөйләгәнемде диҡҡәт менән тыңлағыҙ!

²⁴ Сәсеү мәлендә игенсе Баҫыуҙы туҡтауһыҙ һөрә, Тырмата, йомшарта ғынамы?

²⁵ Юҡ, ул, ерҙе тигеҙләгәс, ҡара үлән, аҡ әнис орлоҡтары һибә, Бойҙай, тары сәсә, арпаны бер урынға, Борайҙы эргәһенә ултырта.

²⁶ Ул шулай эшләргә кәрәклеген белә, Сөнки уны Алла өйрәтә.

²⁷ Ҡара үләнде ашлыҡ һуҡҡыс менән төймәйҙәр, Әнисте арба тәгәрмәсе менән һуҡмайҙар. Ҡара үләнде лә, әнисте лә таяҡ менән һуғалар.

²⁸ Ашлыҡты һуғалар, әммә гел генә һуғып тормайҙар. Өҫтөнән һуҡҡыс тағылған атты йөрөтәләр, әммә иҙмәйҙәр.

²⁹ Был ғәжәйеп белем Күк ғәскәрҙәре Раббыһынан килә, Уның кәңәштәре хайран, аҡылы бөйөк!