Ишағыяһ 23 - Изге Яҙма

Раббының Тир ҡалаһын язалаясағы

¹ Тир ҡалаһы тураһында әүлиәлек. Эй Таршиш караптары, ҡысҡырып илағыҙ! Һеҙ Киттимдән ҡайтышлай ишеткән хәбәр дөрөҫ, Баш ҡалағыҙ емерелде, бер генә йорт та ҡалманы.

² Шымығыҙ, яр буйҙарында йәшәүселәр! Диңгеҙҙә йөрөгән Сидон сауҙагәрҙәре һеҙҙе байытты.

³ Ҙур һыу буйлап Шихорҙан орлоҡ, Нилдан иген килтерерҙәр ине. Бөтөн ҡала ҡәүемдәргә баҙар булды.

⁴ Оял, Сидон, диңгеҙ ярындағы ҡәлғә! Сөнки диңгеҙ һиңә әйтә: «Мин тулғаҡ ғазабы кисермәнем, бала тапманым, Уландар тәрбиәләмәнем, Ҡыҙҙар үҫтермәнем».

⁵ Тир тураһындағы хәбәр Мысырға барып ишетелһә, Кешеләрҙең йөрәктәре һыҙланасаҡ.

⁶ Таршишҡа күсеп китегеҙ, Эй диңгеҙ яры буйында йәшәүселәр, ҡысҡырып илағыҙ!

⁷ Борон замандарҙан уҡ нигеҙ һалынған, Кешеләрен алыҫ илдәрҙә төйәкләнергә оҙатҡан, Шатлыҡ-һөйөнөсө ташып торған Ҡалағыҙға һеҙҙең нимә булған?

⁸ Батшаларға таж кейҙергән Тирға Бындай яҙмышты кем билдәләне? Был ҡаланың сауҙагәрҙәре – шаһзада, Эшҡыуарҙары донъяның иң хөрмәтлеләре ине.

⁹ Күк ғәскәрҙәре Раббыһы ҡабул ҡылды был ҡарарҙы: Тирҙың күркәмлеге менән тәкәбберлеге хур булһын, Бөтә донъяла хөрмәт ҡаҙанғандар түбәнһетелһен!

¹⁰ Эй Таршиш-ҡыҙ, үҙ ереңдән ағын Нил һымаҡ үт, Бүтән ҡаршылыҡ юҡ.

¹¹ Раббы диңгеҙ өҫтөнә ҡул һуҙҙы, Батшалыҡтарҙы тетрәтте, Ҡәнғән ҡәлғәләрен йығырға бойорҙо, әйтте:

¹² «Эй мәсхәрә ителгән ғиффәтле Сидон-ҡыҙ, Бүтән кәйеф-сафа ҡора алмаҫһың! Тор, Киттимгә юллан, Тик унда ла тынғылыҡ тапмаҫһың».

¹³ Ана, халдейҙар иленә ҡара: Ул халыҡ башҡа юҡ инде! Ашшур, ҡамау манаралары ҡороп, Уларҙың нығытмаларын емерҙе, Илде харабаға әйләндерҙе, Ерҙе ҡырағай хайуандарға бирҙе.

¹⁴ Үкереп илағыҙ, эй Таршиш караптары! Сөнки һеҙ һыйынған ҡәлғә емерелде.

¹⁵ Бынан һуң Тир ҡалаһы етмеш йылға, бер батшаның ғүмере оҙонлоғона, онотолор. Етмеш йыл үткәс, Тир фәхишә ҡатынға сығарылған таҡмаҡтағы һымаҡ булыр:

¹⁶ «Арфаңды ал, ҡала буйлап йөрө, Эй һәммәһе онотҡан фәхишә! Тырыш, матурыраҡ уйна, Йыр артынан йыр көйлә, Бәлки, һине иҫкә төшөрөрҙәр».

¹⁷ Етмеш йыл үткәс, Раббы Тир хаҡында хәстәрлек күрер: ҡала тағы сауҙаға тотонор, донъялағы бөтә батшалыҡтар менән фәхешлек итә башлар.

¹⁸ Әммә уның сауҙанан килгән табышы тупланмаҫ һәм йыйылмаҫ, ә Раббыға бағышланыр һәм, туйғансы ашаһындар, затлы кейенһендәр өсөн, Раббы хозурында йәшәгәндәргә тотонолор.