Ишағыяһ 21 - Изге Яҙма

Бабилдың еңелеүе тураһында пәйғәмбәрлек

¹ Диңгеҙ буйындағы сүллек тураһында әүлиәлек. Негевта ҡоторонған ғәрәсәт кеүек Сүлдән, дәһшәт иленән баҫҡынсы килер.

² Миңә ҡурҡыныс бер илаһи күренмеш булды: Хыянатсы хыянат итә; талаусы – талай! «Эй Ғелам, һөжүм ит! Мадай, Бабилды ҡамауға ал! Бабил сәбәп булған барса һыҡтауҙарға сик ҡуям!»

³ Күргәндәремдән билемә сәнсеү ҡаҙалды, Тулғаҡ тотҡан ҡатын һымаҡ ғазап алды. Ишеткәндәремдән ҡалтырап төштөм, Дәһшәткә төштөм күргәндәремдән.

⁴ Йөрәгем бәлтерәне, бөтә тәнем ҡалтырай; Элек эңерҙе көтөп ала торғайным, Хәҙер ул ҡот осҡос мәлгә әүерелде.

⁵ Табын ҡоролған, Келәмдәр түшәлгән, ашап-эсәләр… Тороғоҙ, эй ғәскәр башлыҡтары, Ҡалҡандарығыҙҙы майлағыҙ!

⁶ Сөнки бөйөк Хаким миңә былай тине: «Бар, бер күҙәтсе ҡуй. Нимә күрә, шуны һөйләп барһын.

⁷ Пар ат егелгән яу арбаларын, Аттарға, ишәк, дөйәләргә атланған кешеләрҙе күргәс, Ныҡ иғтибарлы, бик уяу булһын!»

⁸ Шунда күҙәтсе ҡысҡырҙы: «Эй бөйөк Хакимым! Мин һәр даим күҙәтсе манараһында торам; Көнөн-төнөн урынымдан китмәйем!

⁹ Бына күрәм: яу арбалары һәм һыбайлылар Ҡушарлап-ҡушарлап килә». Һуңынан ул: «Бабил ҡолатылды, бәреп төшөрөлдө! Илаһтарының һындары Ергә төшөп, селпәрәмә килде», – тип хәбәр бирҙе.

¹⁰ Эй халҡым! Ырҙындағы яҫмалай туҡмалған халҡым! Күк ғәскәрҙәре Раббыһынан, Исраилдың Аллаһынан Ишеткәндәремде һеҙгә белдерәм.

Дума һәм Ғәрәбстан тураһында пәйғәмбәрлек

¹¹ Дума тураһында әүлиәлек. Берәү Сеғирҙан миңә ҡысҡыра: «Эй һаҡсы, төн үтергә күпме ҡалды? Ул ҡасанға тиклем һуҙыласаҡ?»

¹² Һаҡсы яуаплай: «Таң атырға күп ҡалманы, Ләкин төн йәнә буласаҡ. Әгәр ҙә тағы һорарға теләһәгеҙ, кире килеп һорағыҙ».

¹³ Ғәрәбстан тураһында әүлиәлек. Ғәрәп шырлыҡтарында ҡунығыҙ, Эй Дедан каруандары!

¹⁴ Эй Тема ерендә йәшәүселәр, Һыуһағандарға һыу килтерегеҙ, Ҡасып ҡотолғандарға икмәк бирегеҙ.

¹⁵ Сөнки улар ҡылыстан ҡасалар, Ҡындан сыҡҡан яланғас ҡылыстан, Кирелгән йәйәнән, Һуғыш золомонан ҡаса улар.

¹⁶ Бөйөк Хаким миңә былай тине: – Теүәл бер йыл эсендә Ҡыдарҙың бөтә даны юҡҡа сығасаҡ.

¹⁷ Уҡсыларҙың, Ҡыдар яугирҙәренең бик аҙы ғына иҫән ҡаласаҡ. Шулай тине Исраил Аллаһы Раббы.