Ишағыяһ 16 - Изге Яҙма

¹ Селанан сүл юлы менән Сион тауына, Илдең хакимына бүләккә бәрәстәр ебәрегеҙ.

² Арнон йылғаһы кисеүҙәрендә Моав ҡыҙҙары ояһынан алып ырғытылған, Асырғанып осҡан ҡошҡа оҡшаш.

³ «Беҙгә кәңәш бир, бер ҡарар ҡыл. Төшкөһөн дә төнгө кеүек күләгәң менән ҡапла. Ҡыуылғандарҙы йәшер, ҡасаҡтарҙы һата күрмә.

⁴ Иленән ҡыуылған Моав халҡы йәшәп торһон һиндә; Ҡырғын килтереүсенән уға ышыҡ бул». Иҙеүсе юҡ ителгәс, емереү-талауҙар туҡтағас, Йәберләүселәр был ерҙән ғәйеп булғас,

⁵ Мөхәббәткә нигеҙләнгән тәхет Дауыт сатырында урынлашыр. Унда ғәҙеллек эҙләгән, дөрөҫлөккә ынтылған, Арымай-талмай хаҡ хөкөм ҡылған хаким ултырыр.

⁶ «Моавтарҙың ғорурланып шашҡандарын, Мин-минлеген, тәкәбберләнгәндәрен ишеттек. Әммә улар бушҡа маҡтаналар.

⁷ Бына шуның өсөн Моав үҙен йәлләп, үкереп илай, Барыһы йәш түгә. Ҡир-Харәсәҫтең йөҙөм ҡағын һағынып Моңайыр һәм хәсрәтләнер.

⁸ Сөнки Хешбон баҫыуҙары, Сивманың йөҙөм баҡсалары һәләк булды. Башҡа ҡәүемдәрҙең башлыҡтары Иң һайланма ботаҡтарҙы ҡырҡты. Ул ботаҡтар Яғзергәсә йәйелә, Сүлгә тарала, тарбаҡланып диңгеҙ аша үтә ине».

⁹ Шуға Сивма йөҙөмдәре өсөн Мин Яғзер менән бергә илайым. Һеҙҙе күҙ йәштәремә сылатам, Эй Хешбон менән Әлғәле ҡалалары! Сөнки һеҙҙең емеш йыйғандағы, иген урғандағы Шатлыҡлы ауаздарығыҙ туҡтаны.

¹⁰ Уңдырышлы баҫыуҙарҙан уйын-көлкө юҡҡа сыҡты. Йөҙөм баҡсаларында һис кем йырламай, Шатлыҡ тауыштары яңғырамай; Йөҙөм һыҡҡыстарҙа һис кем емеш иҙмәй, Ҡыуаныслы ауаздар туҡталды.

¹¹ Шуға ла йөрәгем Моав өсөн арфа һымаҡ иңрәй, Ҡир-Харәсәҫ өсөн йәнем әрней.

¹² Моав халҡы табыныу ҡалҡыулыҡтарына килеп Арығансы ялбарһа ла, Доға ҡылыр өсөн изге урындарына барһа ла – Тик бушҡа ғына буласаҡ.

¹³ Раббының Моав хаҡында элек белдергәндәре ошо.

¹⁴ Әле иһә Раббы былай ти: – Теп-теүәл өс йылдан Моавтың дан-шөһрәте хурлыҡҡа әйләнәсәк. Ни тиклем күп һанлы булмаһындар, бик аҙҙары ғына ҡотолоп ҡалыр һәм улар көсһөҙ булыр.