Ишағыяһ 13 - Изге Яҙма

Алланың Бабилды язалаясағы

¹ Амус улы Ишағыяһтың Бабилдың киләсәге хаҡында күргән әүлиәлеге.

² «Яланғас тауҙың башында әләм күтәрегеҙ! Һөрәнләгеҙ яугирҙәргә, Ҡул болғағыҙ: әйҙә улар Затлылар йөрөй торған ҡапҡанан эскә инһен.

³ Үҙем һайлап алғандарға әмер бирҙем, Асыуымды ғәмәлгә ашырһындар өсөн Батыр яугирҙәрҙе, Бөйөклөгөмә ғорурланғандарҙы саҡырып алдым».

⁴ Тауҙарҙағы шау-шыуҙы тыңлағыҙ, Ул күмәк халыҡтың тауышына оҡшаш. Бер ергә йыйылған ҡәүемдәрҙең, Батшалыҡтарҙың геүләүен ишетегеҙ! Күк ғәскәрҙәре Раббыһы һуғышҡа сиреү әҙерләй.

⁵ Улар алыҫ илдән, күк көмбәҙенең ситенән килә: Раббы һәм Уның асыуының ҡоралы Бөтә ер йөҙөн тар-мар итәсәк.

⁶ Һыҡтағыҙ! Сөнки Раббының көнө яҡын! Сикһеҙ ҡөҙрәт Эйәһе ебәргән Һәләкәт булып килә ул көн!

⁷ Шуға күрә һәммәһенең ҡулдары һәленеп төшөр, Һәр кешенең ҡурҡыуҙан йөрәге ирер.

⁸ Барыһын да дәһшәт сорнап алыр, Тартышыуҙан, һыҙланыуҙан бөгөлөп, Тулғаҡ тотҡан ҡатындай ғазапланырҙар. Ҡурҡышып, бер-береһенә ҡарарҙар, Биттәре уттай янып ҡыҙарыр.

⁹ Бына Раббының көнө яҡынлай – аяуһыҙ көн! Ул көн дәһшәт, асыу-нәфрәт алып килә. Ерҙе бушлыҡҡа әйләндерергә, Уның гонаһлыларын һәләк ҡылырға килә.

¹⁰ Күктәге йондоҙҙар, йондоҙлоҡтар нурын һипмәҫ, Тыуыу менән ҡараңғыға сумыр ҡояш, Ай ҙа нурланып балҡымаҫ.

¹¹ Әйтер Раббы: «Донъяны – яуызлығына күрә, Ямандарҙы ғәйептәре өсөн язалайым. Тәкәбберҙәрҙең ғорурлығына сик ҡуям, Аяуһыҙҙарҙың эрелеген түбәнһетәм.

¹² Мин кешеләрҙе саф алтындан аҫылыраҡ, Офир алтынынан да аҙыраҡ итәм.

¹³ Шуға күрә күктәрҙе дер һелкетермен, Күк ғәскәрҙәре Раббыһының асыуы дөрләгән көндө, Уның ярһыуынан ер урынынан ҡуҙғалыр!

¹⁴ Шул сағында һәр кем аусы эҙәрләгән ғәзәл, Көтөүсеһеҙ ҡалған һарыҡ һымаҡ, Үҙ халҡы янына йүгерер, Үҙенең еренә ҡасыр.

¹⁵ Ҡасып китә алмағанына һөңгө ҡаҙалыр, Тотолғандар ҡылыстан йығылыр.

¹⁶ Күҙ алдында сабыйҙарын киҫәктәргә тураҡларҙар, Йорттарын таларҙар, Ҡатындарын мәсхәрә итерҙәр.

¹⁷ Бына Мин мадайҙарҙы уларға ҡаршы ҡуям, Уларҙың көмөшкә иҫе китмәй, Алтынды эшкә лә һанамайҙар.

¹⁸ Уҡтары егеттәрҙе тишә атыр, Улар сабыйҙарҙы аяп тормаҫ. Күҙҙәре балаларға ҡыҙғанып баҡмаҫ».

¹⁹ Батшалыҡтар араһында иң гүзәле, Халдейҙар даны һәм ғорурлығы Бабил Алла юҡ иткән Содом һәм Ғамора һымаҡ булыр.

²⁰ Унда башҡаса һис кем йәшәмәҫ, Мәңгегә берәү ҙә төйәкләнмәҫ. Ғәрәптәр үҙҙәренең сатырын ҡормаҫ, Көтөүселәр малдарын ялға туҡтатмаҫ.

²¹ Унда бары ҡырағай хайуандар ятыр, Өйҙәргә өкөләр тулыр, Дөйәғоштар оя ҡорор, Тәкәләр уйнаҡлап йөрөр.

²² Уның ҡәлғәләрендә – һыртландар, Затлы һарайҙарында сүл бүреләре олор. Бабилдың ахыры яҡын инде, Көндәре һанаулы ғына ҡалды.