Ишағыяһ 11 - Изге Яҙма

Ишай тамырының үҫентеһе

¹ Ағас төпһәһенән яңы үрсем сыҡҡан һымаҡ, Ишай нәҫеленән бер үҫенте сығыр, Был тамырҙан сыҡҡан үҫенте емеш бирер.

² Унда Раббының Рухы – Аҡыл һәм зирәклек рухы, Өгөт-нәсихәт һәм ҡөҙрәт рухы, Раббыны белеү һәм Унан ҡурҡыу рухы булыр.

³ Ул Раббынан ҡурҡыуынан зауыҡланыр, Күҙҙәре күргәнгә генә ҡарап хөкөм итмәҫ, Ишеткәндән сығып ҡына ҡарар ҡылмаҫ.

⁴ Ярлыларҙы ғәҙеллектә хөкөм итер, Ерҙәге мохтаждарҙың дәғүәһен хаҡлыҡ менән ҡарар. Донъяны һүҙе-таяғы менән язалар, Залимдарҙы ауыҙының һулышы менән үлтерер.

⁵ Дөрөҫлөк уның билендә билбау булыр, Тоғролоҡ булыр билендәге ҡайышы.

⁶ Ул саҡта бүре менән бәрәс бер ерҙә йәшәр, Ҡаплан менән кәзә бәрәсе бергә ятыр, Быҙау менән йәш арыҫлан бергә ашар, Уларҙы бәләкәй генә бала көтөр.

⁷ Һыйыр менән айыу бергә утлап йөрөр, Уларҙың балалары йәнәшә ятыр; Арыҫлан да үгеҙ һымаҡ һалам ашар.

⁸ Сабый бала йылан ояһы янында уйнар, Бәпес ҡара йыландың өңөнә ҡулын һуҙыр.

⁹ Изге тауымдың һәр тарафында Һис кем яуызлыҡ һәм зыян ҡылмаҫ. Эйе, һыуҙар диңгеҙҙе тултырған һымаҡ, Ер йөҙө Раббыны танып-белеү менән тулыр.

Һөргөндәге исраилдарҙың ҡайтыуы

¹⁰ Ул көн Ишай тамырынан үҫеп сыҡҡан һабаҡ Халыҡтар өсөн байраҡ буласаҡ. Ҡәүемдәр уны эҙләп киләсәк, Уның торлағы данлы буласаҡ.

¹¹ Ул көн бөйөк Хаким ҡабат ҡулын һуҙыр, Үҙ халҡынан иҫән ҡалғандарҙы Ашшурҙан, Мысырҙан, Паҫростан, Куштан, Ғеламдан, Шинғарҙан, Хамаҫтан, Диңгеҙ буйындағы ерҙәрҙән кире ҡайтарыр.

¹² Ҡәүемдәр өсөн байраҡ күтәрер, Исраилдан һөрөлгәндәрҙе бергә туплар, Ҡыуып таратылған Йәһүҙә кешеләрен Донъяның дүрт тарафынан йыйып алыр.

¹³ Әфраимдың көнсөллөгө юҡҡа сығыр, Йәһүҙәнең дошманлығы эҙһеҙ бөтөр. Әфраим башҡаса Йәһүҙәнән көнләшмәҫ; Йәһүҙә Әфраимды ҡыйырһытмаҫ.

¹⁴ Бергәләп осоп ҡунырҙар Пелештиҙәр яурынына көнбайышта, Көнсығыштағы халыҡтарҙы таларҙар, Эдом менән Моав ерҙәренә ҡул һалырҙар, Ғаммонды буйһондорорҙар.

¹⁵ Раббы Мысыр диңгеҙенең ҡултығын ҡоротор, Евфрат йылғаһы өҫтөндә ҡулын һелтәр ҙә Көслө еле менән уны ете шишмәгә бүлер; Кеше уны ҡата менән кисеп йөрөр.

¹⁶ Исраилдар Мысырҙан сыҡҡан саҡтағы һымаҡ, Раббының Ашшурҙа иҫән ҡалған халҡы өсөн Сығырға оло бер юл асылыр.