Ишағыяһ 10 - Изге Яҙма

^1-2 Ярлыларҙы ғәҙел хөкөмдән мәхрүм ҡалдырыр, Халҡымдың көсһөҙҙәренең хоҡуҡтарын тартып алыр, Тол ҡатындарҙы үҙенә яумал итер, Етемдәрҙең малын талап алыр өсөн Яуыз ҡағиҙәләр яҙған, Хаҡһыҙ ҡанундар сығарған бәндәләргә ҡайғы!

³ Яза көнөндә Алыҫтан өҫтөгөҙгә ҡаза килгәндә ни эшләрһегеҙ? Ярҙам һорап кемгә барырһығыҙ? Байлығығыҙҙы ҡайҙа йәшерерһегеҙ?

⁴ Әсирҙәрҙең араһында теҙләнеүҙән, Үлтерелгәндәр араһына йығылыуҙан Башҡа бер сарағыҙ ҡалмаҫ. Бының менән генә лә ҡайтмаҫ Раббының асыуы, Ҡулы һаман күтәрелгән килеш ҡалыр.

Алланың Ашшурҙы хөкөм ҡылыуы

⁵ «Ҡайғы Ашшурға – асыуымдың күҫәгенә! Ярһыуымдың таяғы – уның ҡулында!

⁶ Ашшурҙы аллаһыҙ ҡәүемгә ҡаршы ебәрәм, Асыуымды ҡабартҡан халыҡҡа һөжүм итергә, Таларға һәм яумал итеп алырға, Урам балсығы һымаҡ тапарға әмер бирәм.

⁷ Тик Ашшурҙың уйында был түгел, Ул был хаҡта ниәт тотмай; Уның теләге – емереү, Күп халыҡтарҙы юҡ итеү.

⁸ „Минең ғәскәр башлыҡтарым, – ти ул, – Һәммәһе лә батша һымаҡ түгелме ни?

⁹ Калне Каркемиш кеүек түгелме? Хамаҫты Арпадтай тар-мар итмәнекме? Самарияның ахыры Дамасктыҡына оҡшамағанмы?

¹⁰ Боттары Йәрүсәлим менән Самарияныҡынан да күп булған Һындарға табынған батшалыҡтарҙы ҡулға төшөргән мин

¹¹ Самария менән боттарына ни эшләһәм, Шуны Йәрүсәлимгә һәм уның һындарына ҡыла алмаммы?“»

¹² Бөйөк Хаким Сион тауында һәм Йәрүсәлимдә эшен тамамлағандан һуң, былай тиер: «Ашшур батшаһын тәкәббер йөрәге, Текә ҡарашы өсөн язалаясаҡмын.

¹³ Сөнки ул: „Быны мин ҡулымдың көсө, Зирәк аҡылым менән эшләнем, Сөнки мин аҡыллымын: Халыҡтарҙы айырған сиктәрҙе юҡ иттем, Хазиналарын талап алдым, Батшаларҙы үгеҙ кеүек тәхеттән һөҙөп төшөрҙөм.

¹⁴ Халыҡтарҙың байлығын мин Ояны туҙҙырғандай туҙҙырҙым, Ташлап ҡалдырылған йомортҡа һымаҡ итеп, Бөтөн донъяны үҙемә йыйҙым. Ҡанатын ҡалҡытып, томшоғон асҡан, Пысҡылдаған һис кем табылманы!“»

¹⁵ Балта оҫтаһы алдында балта маһайырмы? Бысҡы уны тартыусы ҡаршыһында эреләнерме? Ҡулындағы таяғы кешенең үҙен күтәреп ырғытырмы? Күҫәк үҙен күтәргән кешене күтәрерме?

¹⁶ Шуға күрә бөйөк Хакимыбыҙ, Күк ғәскәрҙәре Раббыһы, Ашшурҙың көслө ғәскәрҙәренә Аҙаплы сир ебәрәсәк. Уның шөһрәте аҫтына гөлтләп янған ут һаласаҡ.

¹⁷ Исраилдың Нуры – ут, Исраилдың Изгеһе ялҡын булыр. Ашшурҙың сәнскәк-билсәндәрен Бер көн эсендә яндырып юҡ итер.

¹⁸ Данлыҡлы урмандары, Уңдырышлы ҡырҙары, Үлемесле сиргә тарыған әҙәмдәй, Тотошлай харап булыр.

¹⁹ Урмандарында тороп ҡалған ағастар Хатта бала һанап сығырҙай аҙ булыр.

Исраилдың иҫән ҡалғандары

²⁰ Ул көн Исраилдың иҫән ҡалғандары, Яҡуп нәҫеленең ҡасып тере ҡалғандары Үҙҙәренә һөжүм иткәндәргә түгел, Ысын күңелдән Раббыға, Исраилдың Изгеһенә, таянырҙар.

²¹ Һау ҡалғандар, Яҡуп нәҫеленең иҫән ҡалғандары Ҡөҙрәтле Аллаға кире ҡайтыр.

²² Эй Исраил, халҡың диңгеҙ ҡомо кеүек күп булһа ла, Уның бик аҙ өлөшө генә кире ҡайтыр. Һәләкәтең инде алдан билдәләнеп ҡуйылған, Һәм был ғәҙел хөкөм ташҡын булып килә.

²³ Шулай бөйөк Хаким, Күк ғәскәрҙәре Раббыһы, Был алдан билдәләнгән һәләкәтте Бөтә ер йөҙөндә ғәмәлгә ашырасаҡ.

²⁴ Бына бөйөк Хаким, Күк ғәскәрҙәре Раббыһы былай ти: «Эй һин, Сионда йәшәгән халҡым! Ашшурҙар, мысырҙар һымаҡ, Һине таяҡ менән туҡмап, Өҫтөңдә күҫәк күтәргән саҡта ҡурҡма.

²⁵ Оҙаҡламай, бик тиҙҙән һеҙгә булған асыуым үтер, Ярһыуым Ашшурҙы юҡ итеүгә йүнәлер.

²⁶ Шунда Күк ғәскәрҙәре Раббыһы, Мидйәндәрҙе Ғорев ҡаяһы янында тар-мар иткәндәге һымаҡ, Ашшурға ҡаршы ҡамсы күтәрер. Ҡасандыр Мысырҙағылай, Таяғын диңгеҙ өҫтөнә һуҙыр.

²⁷ Ул көн Ашшурҙың йөгө яурынығыҙҙан, Ҡалыбы муйынығыҙҙан төшөр. Һимергәнегеҙгә күрә ул ҡалып һынып сығыр».

Баҫҡынсыларҙың Йәрүсәлимгә һөжүме

²⁸ Ғайаҫ ҡалаһына еттеләр, Мигронды уҙҙылар, Михмаста йөктәрен бушаттылар;

²⁹ Тарлауыҡты үттеләр, «Гевағта ҡунайыҡ», – тинеләр. Рама ҡалаһы ҡурҡыуҙан ҡалтыраны, Шаул Гивғаһында йәшәгәндәр ҡасып китте.

³⁰ Галлим ҡыҙы, үкереп ила! Лайша халҡы, уны тыңла! Яуап ҡайтар уға, Ғанаҫоҫ!

³¹ Мадменаның халҡы ҡасты, Гевимда йәшәүселәр йәшенә.

³² Баҫҡынсылар бөгөн үк Нов ҡалаһында торасаҡ, Сион тауына, Йәрүсәлим ҡалҡыулығына йоҙроғон янаясаҡ.

³³ Бына бөйөк Хаким, Күк ғәскәрҙәре Раббыһы Дошманды дәһшәтле көсө менән Ағас ботағылай һындырасаҡ. Иң оҙон ағастар ҡырҡыласаҡ, Бейектәре йығып һалынасаҡ.

³⁴ Ул балта менән урман шырлығын ҡыра, Ливан Ҡөҙрәт Эйәһе алдына ҡолаясаҡ.